قارا شاڭىراقتىڭ مەرەيتويى وسى وقۋ ورنىندا ەڭبەك ەتىپ, ەلىمىزدىڭ ءبىلىم, عىلىم سالاسىنا ايرىقشا ۇلەس قوسقان عالىمداردى, وقىتۋشىلاردى ماراپاتتاۋ راسىمىمەن باستالدى.
وسى ورايدا ۋنيۆەرسيەتەت ۇجىمىنا قۇتتىقتاۋ جولداعان عىلىم جانە جوعارى ءبىلىم ءمينيسترى ساياسات نۇربەك: «بۇگىن وتاندىق عىلىم مەن جوعارى ءبىلىم سالاسىندا ايتۋلى مەرەكە. ۋنيۆەرسيتەت بۇگىندە تەك ورتالىق ازيا كەڭىستىگىندە عانا ەمەس, الەمدىك دەڭگەيدەگى ىرگەلى جوعارى وقۋ ورنىنا اينالدى. 90 جىلدىق تاريحى بار قارا شاڭىراق بۇگىندە زامان سۇرانىسىنا جاۋاپ بەرە الاتىن, بىلىكتىلىگى مەن ءبىلىمى, تاجىريبەسى مەن تالانتى ءبىر ارناعا توعىسقان سالا يەلەرىن دايارلاۋدى ايقىن ماقسات ەتىپ كەلەدى. الەمنىڭ ەكىنشى ۇستازىنىڭ ەسىمىن يەلەنگەن قارا شاڭىراق عىلىم مەن ءبىلىم ايدىنىندا جۇكتەلگەن مىندەتتەردى جوعارى ناتيجەمەن جۇزەگە اسىرىپ وتىر. بۇگىنگى ناتيجەلى جۇمىس پەن ىرگەلى بەلەستەر ۋنيۆەرسيتەت ۇجىمىنىڭ تاباندى ەڭبەگىنىڭ ارقاسى دەپ باعامدايمىن. قازۇۋ-دىڭ 90 جىلدىق تورقالى تويى 100 جىلدىق تۇعىرى بيىك عاسىر تويىنا ۇلاسسىن», دەپ اتاپ ءوتتى.
جيىن بارىسىندا عىلىم جانە جوعارى ءبىلىم ءمينيسترى عاني بەكتاەۆتىڭ قۇتتىقتاۋى وقىلىپ, ۆيتسە-مينيستر دارحان احمەد-زاكي, الماتى قالاسىنىڭ اكىمى ەربولات دوساەۆ ءسوز سويلەپ, ۋنيۆەرسيتەت مەرەيتويىنىڭ ماڭىزدىلىعىنا توقتالىپ, قارا شاڭىراقتاعى عالىمداردىڭ جەتىستىگى تۋرالى ايتىپ ءوتتى.
قازۇۋ-دىڭ باسقارما توراعاسى-رەكتور جانسەيىت تۇيمەباەۆ وقۋ ورنى ۇجىمىن 90 جىلدىق مەرەيتويىمەن قۇتتىقتاپ, بۇل مەرەيلى بەلەسكە ۋنيۆەرسيتەت ۇلكەن تابىستارمەن جەتكەندىگىنە توقتالدى. وسى ورايدا ۋنيۆەرسيتەت عالىمدارى مەدالدارمەن, العىس حاتتارمەن ماراپاتتالدى.
«قازۇۋ حالىقارالىق QS رەيتينگىندە 230-ورىندا. QS Asia ۋنيۆەرسيتەتتەرى رەيتينگى بويىنشا 29-شى ساتىدا. 90 جىلدىق تاريحى بار ۋنيۆەرسيتەتتە 3354 وقىتۋشى-پروفەسسور تابىستى ەڭبەك ەتۋدە. ونىڭ ىشىندە 11 قر ۇعا اكادەميگى, قر جوعارى مەكتەبىنىڭ ءۇش اكادەميگى, جوعارى مەكتەبى عىلىم اكادەمياسىنىڭ سەگىز اكادەميگى, جەتى ۇعا كوررەسپوندەنت-مۇشەسى بار. سونداي-اق 603 دوكتور, 736 عىلىم كانديداتى, 512 PhD جۇمىس ىستەيدى. بيىل 32 وقىتۋشى «جوعارى وقۋ ورنىنىڭ ۇزدىك وقىتۋشىسى – 2023» رەسپۋبليكالىق بايقاۋىندا جەڭىمپاز اتاندى. كەز كەلگەن ۋنيۆەرسيتەت مارتەبەسى وقىتۋشى عالىمداردىڭ ەڭبەگىمەن, تۇلەكتەرىنىڭ ساپاسىمەن ولشەنەدى. قازۇۋ تۇلەكتەرىنىڭ اراسىندا مەملەكەت جانە قوعام قايراتكەرلەرى, كورنەكتى عالىمدار, قالامگەرلەر, كاسىپكەر-مەتسەناتتار, تاجىريبەلى ديپلوماتتار جەتكىلىكتى. قازۇۋ-دا جىلدار بويى قالىپتاسقان بەلگىلى قايراتكەر تۇلعالاردىڭ, مىقتى وقىتۋشى-پروفەسسورلارىمىزدىڭ عىلىمي مەكتەپتەرى قالىپتاسقان. ۋنيۆەرسيتەت وسى عىلىمي مەكتەپتەردى ارى قاراي جالعاستىرىپ, جاڭا باعىتتا دامىتا بەرەتىن بولادى. قازىر 25 مىڭنان استام ستۋدەنتىمىز بار. ستۋدەنتتەرىمىز اقش, ەۋروپا, ازيانىڭ وزىق ۋنيۆەرسيتەتتەرىندە ءبىلىمىن جەتىلدىرۋدە. قازۇۋ الەمنىڭ 650-دەن استام جوعارى وقۋ ورىندارى جانە ۇيىمدارىمەن تىعىز قارىم-قاتىناستا. 2022 جىلى مەملەكەت باسشىسى قاسىم-جومارت توقاەۆتىڭ تۇركيا مەن قىرعىزستانعا رەسمي ساپارى اياسىندا ىستامبۇل, بىشكەك قالالارىندا قازۇۋ فيليالدارى اشىلدى. ۋنيۆەرسيتەت بازاسىندا رەسەيدىڭ ميفي ۇلتتىق يادرولىق زەرتتەۋ ۋنيۆەرسيتەتىنىڭ فيليالى جۇمىس ىستەيدى. 2023 جىلى قازاقستان پرەزيدەنتىنىڭ قىتايعا مەملەكەتتىك ساپارى بارىسىندا قازۇۋ بازاسىندا سولتۇستىك-باتىس پوليتەحنيكالىق ۋنيۆەرسيتەتىنىڭ فيليالىن اشۋ تۋرالى كەلىسىلدى. فيليال 12 قازاندا اشىلدى», دەدى رەكتور ءوز سوزىندە.
قازۇۋ 2022 جىلى زەرتتەۋ ۋنيۆەرسيتەتى مارتەبەسىن العاننان كەيىن عىلىمعا باسىمدىق بەرە باستادى. سوڭعى ءۇش جىلدا ۋنيۆەرسيتەت عىلىمىنان تۇسكەن تابىس ەكى ەسەگە جۋىق ءوستى. قازىرگى تاڭدا 8,5 ميلليارد تەڭگەنىڭ گرانتتىق جوبالارى ورىندالىپ جاتىر. 2023 جىلى قازۇۋ عالىمدارى قر عىلىم جانە جوعارى ءبىلىم مينيسترلىگىنىڭ عىلىم كوميتەتىنەن 3,8 ملرد تەڭگەنىڭ مەگاگرانتىن ۇتىپ الدى.
2024-2027 جىلدار ارالىعىندا مەملەكەت باسشىسى قاسىم-جومارت كەمەل ۇلى توقاەۆتىڭ قولداۋىمەن قازۇۋ قۇرىلىسىنىڭ ءىى كەزەڭى وتەدى. ارقايسىسى 1060 ورىندىق, جالپى 3180 ورىنعا ارنالعان زاماناۋي ءۇش جاتاقحانا قۇرىلىسى ءجۇرىپ جاتىر. بۇدان بولەك, وقۋ كورپۋستارى, سپورتتىق-ساۋىقتىرۋ ورتالىعى, يننوۆاتسيالىق ورتالىق, عىلىمي-زەرتتەۋ ورتالىعى, تەحنوپارك جوسپارلانعان. وقۋ ورنىنىڭ 90 جىلدىق مەرەيتويىنا وراي, قازۇۋ-دا ورتالىق ازياداعى العاشقى يندۋستريا 4.0 مودەلدىك فابريكاسىن قۇرۋ جوسپارلانىپ وتىر. بۇل جوبانى قازۇۋ Tech Garden «يننوۆاتسيالىق تەحنولوگيالار پاركى» دەربەس كلاستەرلىك قورىمەن بىرلەسىپ ىسكە اسىرادى. روبوتوتەحنيكا جانە روبوتتاندىرۋ سالاسىنداعى جاڭا ستارتاپتارعا قولداۋ كورسەتەتىن ورتالىق بيىلعى جىلدىڭ ەكىنشى توقسانىندا اشىلادى. بۇدان بولەك قازۇۋ-دا قىتاي ۇكىمەتىمەن كەلىسىلگەن Silicon Valley مودەلى بويىنشا IT-تەحنوپارك قۇرۋ جونىندەگى بىرلەسكەن جوبا قولعا الىنۋدا. سەكۋندىنا 1800 (1800 تفپ) جۇزەگە اسىراتىن سۋپەركومپيۋتەرگە قاراجات قحر ۇكىمەتى ەسەبىنەن ءبولىنىپ, قازۇۋ-دا ورناتىلادى. بۇگىن مەرەيتويعا وراي, حيميا جانە حيميالىق تەحنولوگيا فاكۋلتەتى جانىنان گالۆانيكالىق قاپتامالاردىڭ Chemical Coatings Innovations (سhemCoIn) عىلىمي-وندىرىستىك ورتالىعى اشىلدى.
