«قازگيدرومەت» رمك ەلىمىزگە قالىڭ قار قاشان جاۋاتىنىن بولجادى. ول مالىمەت بويىنشا قازاقستاننىڭ باسىم بولىگىندە قار جامىلعىسى جەلتوقساننىڭ ءبىرىنشى ونكۇندىگىنىڭ سوڭىندا تۇسەدى. ال رەسپۋبليكانىڭ وڭتۇستىك-باتىسىندا, وڭتۇستىگىندە جانە وڭتۇستىك-شىعىسىندا ايدىڭ ەكىنشى جارتىسىندا قار جاۋادى.
جەلتوقسان ايىنىڭ باسىندا قازاقستاننىڭ باسىم بولىگىندە جاۋىن-شاشىن جاۋادى. سونداي-اق تۇمان, كوكتايعاق كۇتىلەدى. سولتۇستىك وڭىرلەردە جەل كۇشەيىپ, جاياۋ بۇرقاسىن سوعۋى مۇمكىن.
جەلتوقساننىڭ ءبىرىنشى ونكۇندىگىنىڭ ەكىنشى جارتىسىندا وڭتۇستىك ايماقتاردى قوسپاعاندا, ەلدىڭ باسىم بولىگىندە اياز كۇتىلەدى. قار جاۋىپ, بۇرقاسىندى جەل كۇشەيەدى, تەرمومەترلەردىڭ باعاندارى تۇنگى ۋاقىتتا -10-20°س-قا, كۇندىز-3-10°س-قا دەيىن تومەندەيدى دەگەن بولجام بار.
بيىل كۇز نەگە جىلى بولدى؟
جىلى كۇز بەن قىستىڭ كەش كەلۋى باتىس جانە وڭتۇستىك تسيكلونداردىڭ ءجيى ورىن الۋىنا, سونداي-اق يران مەن جەرورتا تەڭىزى اۋداندارىنان جىلى اۋا ماسسالارىنىڭ كەلۋىنە بايلانىستى. وسىعان بايلانىستى قازاقستان اۋماعىنداعى تەمپەراتۋرالىق فون كليماتتىق نورمادان 3-10° جوعارى بولدى. مەتەوباقىلاۋ تاريحىندا وسى جىلدىڭ قاراشا ايى وتە جىلى بولدى, جىلى اۋا رايىنىڭ جوعارعى شەگى 17-18 قاراشا ارالىعىندا بايقالدى. سوڭعى رەت جىلى قاراشا 2010 جىلى بولدى, ول كەزدە اۋا تەمپەراتۋراسى نورمادان 2-7° اۋىتقىدى.
مۇنداي اۋا رايى تاريحىمىزدا سوڭعى رەت قاشان بايقالدى؟
كوپجىلدىق باقىلاۋلار بويىنشا استانا قالاسىندا قار جامىلعىسىنىڭ ەڭ كەش جايعاسۋى 1967 جىلعى 15 جەلتوقساندا (56 جىل بۇرىن) جانە 2008 جىلعى 14 جەلتوقساندا (15 جىل بۇرىن) تىركەلدى.
تاريحي دەرەكتەرگە سۇيەنەتىن بولساق, ەلوردادا قار جامىلعىسىنىڭ ەرتە جايعاسۋى – 10 قازان, ورتاشا جايعاسۋى – 10 قاراشا, ال كەش جايعاسۋى - 15 جەلتوقسان. سوڭعى ءۇش جىلدا – 2020, 2021, 2022 جىلدارى قاراشانىڭ ءبىرىنشى ونكۇندىگىنىڭ سوڭىندا, ەكىنشى ونكۇندىگىنىڭ باسىندا تۇراقتى قار جامىلعىسى تىركەلىپ, ورتاشا بيىكتىگى 8-13 سم قۇرادى.
