ماسەلەنىڭ ءمانىسىن انىقتاۋ ءۇشىن مەملەكەتتىك ورتا ءبىلىم بەرۋ ۇيىمدارىندا تاماقتانۋ ساپاسىنا مونيتورينگ جۇرگىزۋ جونىندەگى كوميسسيالار جۇمىس ىستەگەن بولاتىن. ونىڭ قۇرامىندا مەديتسينا قىزمەتكەرلەرى, مەكتەپ اكىمشىلىگى جانە اتا-انالار كوميتەتتەرىنىڭ وكىلدەرى بار.
تاماقتانۋدىڭ نورمالار مەن ستاندارتتارعا سايكەستىگىن قامتاماسىز ەتۋ ماقساتىندا توپ جۇمىسى قالانىڭ بارلىق مەكتەبىندە بەكىتىلگەن داستارقان ءمازىرىن قاداعالايدى. ءمازىر تاماقتانۋ نورمالارىن, قازاق تاماقتانۋ اكادەمياسىنىڭ ۇسىنىمدارىن, بالالاردىڭ جاس ەرەكشەلىكتەرىن ەسكەرە وتىرىپ ازىرلەنگەنى بەلگىلى. مەكتەپ ءمازىرى تۋرالى اقپارات اشىقتىق پەن قولجەتىمدىلىكتى قامتاماسىز ەتۋ ءۇشىن ءبىلىم باسقارماسىنىڭ جانە ءبىلىم بەرۋ ۇيىمدارىنىڭ ينتەرنەت-رەسۋرستارىندا جاريالاناتىن بولادى.
مەملەكەتتىك ورتا ءبىلىم بەرۋ مەكەمەلەرىندە ءبىلىم الۋشىلار بيىل 830 تەڭگەگە تاماقتانادى. وسى جىلى باعاسىنا ساي تاعام تۇرلەرى دە كوبەيگەن. بۇل بالالارعا ساپالى تاماقتانۋعا مۇمكىندىك بەرەدى.
الماتى قالاسى ءبىلىم باسقارماسىنىڭ باسشىسى ءلاززات جىلقىباەۆانىڭ ايتۋىنشا, مەملەكەتتىك ءبىلىم بەرۋ مەكەمەلەرىندە تاماقتانۋ ساپاسىن باقىلاۋ جانە قامتاماسىز ەتۋ جۇيەسى بالالار مەن جاسوسپىرىمدەردىڭ دەنساۋلىعى مەن بولاشاعىنا قامقورلىق جاساۋدا شەشۋشى ءرول اتقارادى. وقۋشىلاردىڭ تاماقتانۋىن باقىلاۋ جانە قاداعالاۋ جوعارى ستاندارتتارعا جەتۋدى كوزدەۋمەن قاتار بولاشاق ۇرپاققا قامقورلىقتى كورسەتەدى. بيىل بيۋدجەت ەسەبىنەن 1-4-سىنىپ وقۋشىلارىن تەگىن تاماقپەن قامتاماسىز ەتۋگە 18,6 ملرد تەڭگە جانە حالىقتىڭ الەۋمەتتىك وسال توپتارى ساناتىنداعى 5-11-سىنىپتا وقيتىن وقۋشىلاردى تەگىن تاماقپەن قامتاماسىز ەتۋگە 1,8 ملرد تەڭگە ءبولۋ جوسپارلانعان. تەگىن تاماقتانۋعا ارنالعان جالپى بيۋدجەت 20,4 ملرد تەڭگەنى قۇرايدى.
تاماقتانۋ ساپاسىنا قاتىستى وتىنىشتەر مەن شاعىمدار تۇسكەن جاعدايدا, ۆەدومستۆوارالىق ساراپتاما توبى مەكتەپتەردە تاماقتانۋدى ۇيىمداستىرۋدى جاقسارتۋ ءۇشىن تەكسەرۋ جۇرگىزەدى. بۇل باقىلاۋدى قامتاماسىز ەتە وتىرىپ, ساپا ستاندارتتارىن ساقتاۋعا جانە وقۋشىلاردىڭ دۇرىس تاماقتانۋىن قامتاماسىز ەتۋگە ىنتالاندىرادى.
قازىرگى ۋاقىتتا تاماقتانۋ ساپاسىن باقىلاۋ جونىندەگى ۆەدومستۆوارالىق ساراپتاما توبىنىڭ ەرەجەسى قالالىق اكىمدىك قاۋلىسىمەن بەكىتىلىپ, مونيتورينگ اكتىسىنە وراي ۇسىنىمدار ازىرلەندى.
الماتى
