كەنت ورتالىعىنداعى دۇكەندەرگە جانە باسقا دا ساۋدا ورىندارىنا توقاشىن, ءبالىشىن اپارسا, كوپ ۇزاماي تەلەفون سوعىپ «تاعى دا اكەلەسىڭ بە؟», دەيتىن بولدى. بۇل, ارينە, مۇنى قۋانتىپ تاستايتىن. ءسويتىپ, 3-4 جىل ۋاقىت ءوتتى. قالتاعا تيىن-تەبەن ءتۇستى, كوڭىلگە ءۇمىت پەن سەنىم ۇيالادى.
«مىناۋ پايدالى كاسىپ, جاقسى ءناسىپ بولعالى تۇر ەكەن». كەنت ورتالىعىنا ناۋبايحانانىڭ كەرەكتىگى سەزىلىپ تۇردى. گۇلنار نان جانە نان ونىمدەرىن شىعاراتىن شاعىن ناۋبايحانا ۇيىمداستىرۋعا بەكىندى. سوعان ىڭعايلى عيماراتتى جالعا الدى. ء«ىنجۋ» جەكە كاسىپورنىن اشتى. بۇل – 2016 جىل بولاتىن.
ەڭبەك ەتسە, ءىستىڭ كوزىن تابا بىلسە, شارۋا وڭىنان دوڭگەلەنىپ سالا بەرەدى ەكەن عوي. ارينە, قيىنشىلىقتار دا كەزدەسپەي قالمايدى. بىراق ىسكە بەرىلىپ كەتكەن كەزدە سول قيىندىقتار دا بايقالماي كەيىن ىسىرىلىپ قالا بەرەدى ەكەن. كەشەگى مۇمكىن ەمەس دەگەنىڭە قولىڭ جەتكەن سايىن العا ۇمتىلا تۇسەدى ەكەنسىڭ. 2020 جىلى ۇلىتاۋ اۋدانىنىڭ اكىمى جاس كاسىپكەرلەردى قولداۋ ماقساتىندا گرانت جاريالاعان ەدى. قاتىسىپ كورىپ ەدى, جەڭىمپازدار قاتارىنان تابىلدى. سول گرانتتىڭ قارجىسىنا ءوز قالتاسىنداعىنى قوسىپ, عيماراتتى تولىقتاي ءوز مەنشىگىنە ساتىپ الدى. ەندى بيزنەس بۇرىنعىدان گورى ءتيىمدى دە پايدالى بولا ءتۇستى.
قازىر گۇلنار جانالينوۆانىڭ ء«ىنجۋ» جەكە كاسىپورنىنا قاراستى ناۋبايحاناسىندا كۇنىنە 500-600 بولكە نان پىسىرىلەدى. كەنتتەگى 5-6 دۇكەن مەن بىرنەشە ۇيىمداردىڭ اسحاناسىنان كۇن سايىن تاپسىرىس ۇزىلمەيدى. «ىستىق نان» جەگىسى كەلگەندەر ناۋبايشىنىڭ وزىنە كەلىپ تە الىپ كەتىپ جاتادى.
– قازىر قاراماعىمدا 4 ناۋبايشى بار. ولار پىسىرەدى, تاپسىرىس بەرۋشىلەرگە جەتكىزۋشى – ءوزىم. جەڭىل كولىگىم بار. ۇندى دا جەزقازعاننان سول كولىگىم ارقىلى ءوزىم اكەلەمىن, – دەگەن گۇلناردىڭ سوزىنەن ونىڭ تىنىمسىزدىعى بايقالادى. ءوزى ايتقانداي, «ايتپەسە, بيزنەس جۇرمەيدى عوي».
ء«ىنجۋ» بۇگىندە كونديتەرلىك ونىمدەر دە شىعارا باستادى. ويتكەنى سۇرانىس بار.
اسىرەسە كۇزدەن كوكتەمگە دەيىن ەل كۇزدىك سوعىم سويىپ, ءبىر-ءبىرىن قوناققا شاقىرىپ جاتادى عوي. مىنە, سوندايدا داستارقاننىڭ ءسانىن كەلتىرەتىن تاتتىلەردى بۇرىندارى قالالى جەرلەردەن تاسىمالداپ جۇرەتىن جۇرتشىلىق ەندى جەزدىنىڭ ءوز باسىنان الاتىن بولدى. ەلگە – ىڭعايلى, كاسىپكەرگە – وڭتايلى.
كوپتەگەن كاسىپكەر ءتارىزدى گۇلنار دا قايىرىمدى, مەيىرىمدى شارۋالاردان شەت قالعان ەمەس. ءاربىر جۇما سايىن بەلگىلى ءبىر مولشەردە ناندى تەگىن تاراتادى. سول سياقتى ورازا كەزىندە كەنتتەگى جوق-جىتىك جاندارعا تەگىن تاراتۋ ماقساتىندا مەشىتكە كۇن سايىن نان جەتكىزىپ تۇرادى.
ەتكەن ەڭبەك ەش كەتپەيدى. 2020 جىلى گۇلنار جانالينوۆانىڭ ۇلىتاۋ اۋدانىنىڭ «ۇزدىك كاسىپكەرى» اتاندى. 2023 جىلى 8 ناۋرىز قارساڭىندا وبلىستىڭ ىسكەر ايەلدەرى قۇرامىندا وبلىس اكىمىنىڭ قابىلداۋىندا بولدى.
– قازىرگى كەزدە كاسىپكەرلىككە قولداۋ كوپ. اۋدان, وبلىس دەڭگەيىندە ءارتۇرلى گرانت بەرىلىپ جاتادى. «كاسىپ اشامىن» دەگەنگە مۇمكىندىك تە مول. ەنجارلىق, جالقاۋلىق – كاسىپكەردىڭ قاس جاۋى. نيەت, ۇمتىلىس, ىزدەنىس – دوستارى. سوندىقتان جۇمىس جوق دەي بەرمەگەن دۇرىس. مەملەكەت بارلىق مۇمكىندىكتى جاساپ وتىر, تەك سونى پايدالانا ءبىلۋ كەرەك. كاسىپكەر بولۋ ءۇشىن ەشقانداي «كوكە» كومەكتەسە المايدى. اركىم ءوزى ۇمتىلا ءبىلسىن! – دەيدى كاسىپكەر گ.جانالينوۆا. ءوزىنىڭ باسىنان وتكەنىنە قاراپ تۇيگەن ويى – وسى. جيناعان تاجىريبەسىن كوپپەن بولىسكەنى.
تۇتاس ءبىر كەنتتى نانمەن قامتاماسىز ەتىپ وتىرعان كاسىپكەردىڭ ىسىنە قالايشا سۇيسىنبەسكە؟
ايتپاقشى, گۇلنار جانالينوۆا كەزىندە جۋرناليست بولۋدى ارمانداعان ەكەن. گازەت رەداكتسياسىندا جۇمىس ىستەگەن دە كورىنەدى. بىراق ءومىر باسقاشا جول ۇسىنىپتى. وقاسى جوق, نانىن جۋرناليستيكادان جەي الماسا دا, ەندى, مىنە, جاقسى كەيىپكەرلەرىنىڭ بىرىنە اينالىپ, جۋرناليسكە دە نان تاۋىپ بەرىپ وتىر. ول ەلگە قانداي جولمەن بولسا دا نان سىيلاۋعا جاراتىلعان-اۋ.
ۇلىتاۋ وبلىسى,
جەزدى كەنتى
