مامانداردىڭ ايتۋىنشا, جاڭادان اشىلعان كاسىپورىنداردا جەرگىلىكتى ازاماتتاردى جۇمىسپەن قامتىپ قانا قويماي, قۇرىلىس سەكتورىنداعى يمپورتقا تاۋەلدىلىكتى ازايتۋ كوزدەلگەن. وسىلايشا, جەرگىلىكتى ءونىمدى وتكەرۋ ماقساتى قويىلىپ وتىر.
«Alit Holding» جشس-نىڭ ءمارمار ۇنتاعىن جانە قۇرعاق قۇرىلىس قوسپالارىن وندىرەتىن زاۋىتتاردىڭ اشىلۋ سالتاناتىنا ءوڭىر باسشىسىنىڭ ءبىرىنشى ورىنباسارى نۇرجان كالەندەروۆ, «بəيتەرەك» ۇلتتىق باسقارۋشى حولدينگى» اق, «Qazaqstan Investment Corporation» اق, «Baiterek Venture Fund» اق وكىلدەرى, سونداي-اق سالا ساراپشىلارى مەن ىسكەرلىك قاۋىمداستىق وكىلدەرى قاتىستى.
جالپى,وبلىس ورتالىعىندا كەيىنگى جىلدارى بىرنەشە ءوندىرىس وشاعى بوي كوتەرگەنى بەلگىلى. ال ەلىمىزدىڭ قۇرىلىس ماتەريالدارى نارىعىندا 30 جىلدىق تاجىريبەسى بار «Alit» كومپانياسىنىڭ تاراز شاھارىندا جاڭا زاۋىت اشۋى قۇپتارلىق قادام. ويتكەنى وبلىس ورتالىعىندا قۇرىلىس قارقىنى جىل وتكەن سايىن ارتىپ كەلەدى. تاراز تورىندە بۇعان دەيىن «Kazgyps» گيپس ونىمدەرى زاۋىتى سالىنعانىن دا ايتا كەتكەن ءجون.
«قۇرعاق قۇرىلىس قوسپالارى ءىس جۇزىندە كەز كەلگەن جوندەۋ جۇمىسىندا قولدانىلاتىنى ءمالىم. ءبىر پəتەرگە ورتا ەسەپپەن 2 توننا شاماسىندا وسىنداي ماتەريال قاجەت ەكەنى بەلگىلى. جاڭادان ىسكە قوسىلعان بۇل زاۋىتتار جىل سايىن ەلىمىز بويىنشا 70 مىڭعا دەيىن پəتەردى ماتەريالدارمەن قامتاماسىز ەتۋگە مۇمكىندىك بەرەدى», دەدى كومپانيانىڭ اتقارۋشى ديرەكتورى باعلان الجانقۇلوۆ جاڭا كاسىپورىنداردىڭ الەۋەتى تۋرالى وي ءبولىسىپ.
اۋقىمدى جوبا «بəيتەرەك» ۇلتتىق باسقارۋشى حولدينگى» اق قۇرىلىمىنا كىرەتىن «Qazaqstan Investment Corporation» اق تاراپىنان, «Baiterek Venture Fund» اق تىكەلەي ينۆەستيتسيالار قورى ارقىلى قارجىلاي قولداۋىمەن جۇزەگە اسىرىلدى. تارتىلعان ينۆەستيتسيانىڭ جالپى سوماسى 3,8 ملرد تەڭگەنى قۇراپ وتىر. قاراجات وڭدەۋ ونەركəسىبىن دامىتۋعا, جەرگىلىكتى جەردەگى ءوندىرىستى كەڭەيتۋگە, وتاندىق قۇرىلىس ماتەريالدارى وندىرۋشىلەرىنىڭ مۇمكىندىگىن نىعايتۋعا باعىتتالعان.
ماماندار كەلتىرگەن دەرەككە سەنسەك, ەلىمىزدەگى قۇرعاق قوسپالار نارىعىنداعى جاعداي سۇرانىستىڭ ارتقانىن بايقاتادى. ناقتىراق ايتساق, 1-1,3 ملن تونناعا دەيىن جەتكەن. ەل اۋماعىندا جىل سايىن 20 ملن شارشى مەتردەن استام تۇرعىن ءۇي پايدالانۋعا بەرىلەدى. بۇل ءوز كەزەگىندە ساپالى قۇرىلىس ماتەريالدارىنا دەگەن سۇرانىستى ارتتىرماسا, ازايتپاسى انىق.
تارازدا سالىنعان قۇرعاق قۇرىلىس قوسپالارىن وندىرەتىن جاڭا زاۋىتتىڭ قۋاتتىلىعى جىلىنا شامامەن 150 مىڭ توننا ءونىمدى قۇرايدى. بۇل جىل سايىن 70 مىڭعا دەيىنگى پəتەردى جوندەۋگە قاجەتتى ماتەريال كولەمىمەن شامالاس. وڭىردە مəرمəر ۇنتاعىن وندىرەتىن زاۋىتتىڭ ىسكە قوسىلۋى كومپانياعا شيكىزاتتان باستاپ دايىن ونىمگە دەيىن تولىق وندىرىستىك تسيكل قالىپتاستىرۋعا مۇمكىندىك بەرەدى.
كومپانيادا شيكىزاتقا تاۋەلدىلىك جوق. ويتكەنى وندىرىستىك كەشەننىڭ ءوزىنىڭ شيكىزات بازاسى بار. ۇلكەن بۋرىل كەن ورنى شيكىزاتپەن تولىقتاي قامتىپ وتىر ەكەن. جوبا اياسىندا 100 جاڭا جۇمىس ورنى اشىلاتىنىن دا ايتا كەتكەن ءجون.
«تارازدا ەل اۋماعىندا بالاماسى جوق زاۋىت اشىلعانىنا قۋانىشتىمىز. ويتكەنى بۇل – اۆتوماتتاندىرىلعان كاسىپورىننىڭ العاشقىسى. مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس, ءار جىلدىڭ مەجەلى جوسپارى ءوسىپ كەلە جاتقانىن ايتپاي كەتۋگە بولماس. ماسەلەن, وتكەن جىلى 246 ملرد تەڭگە شاماسىندا ينۆەستيتسيا تارتىلعان بولسا, وسى جىلى كورسەتكىشتى 361 ملرد تەڭگەگە جەتكىزۋ مەجەسى قويىلىپ وتىر. جاڭا ءوندىرىس وشاقتارىن اشۋ ارقىلى جەرگىلىكتى جۇرتتى جۇمىسپەن قامتۋ مۇمكىندىگى دە ارتاتىنى بەلگىلى», دەيدى تاراز قالاسى اكىمىنىڭ ورىنباسارى گۇلدانا جاۋىنبەكوۆا.
قالاي دەسەك تە وڭىردە كەيىنگى جىلدارى ينۆەستيتسيا تارتۋ جۇمىسى قارقىندى جۇرگىزىلىپ جاتقانى بەلگىلى. اسىرەسە وڭدەۋ ونەركاسىبىن وركەندەتۋگە باسىمدىق بەرىلىپ وتىر. وسىلايشا, جەرگىلىكتى اتقارۋشى بيلىك وكىلدەرى مەملەكەت باسشىسىنىڭ تاپسىرماسىن ساپالى تۇردە جۇزەگە اسىرۋعا بەل بۋىپ وتىرعانى كوڭىل توعايتادى.
تاراز
