مازمۇندى كەزدەسۋگە سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ, سەنات دەپۋتاتى بەكبولات ورىنبەكوۆ, ەۇۋ باسقارما توراعاسى-رەكتورى ەرلان سىدىقوۆ, ەۇۋ ديرەكتورلار كەڭەسىنىڭ توراعاسى دارحان مىڭباي قاتىستى. ەكوساعاتقا ۋنيۆەرسيتەتتىڭ 500-دەن استام ستۋدەنتى جيىلسا, ەلىمىزدىڭ وزگە جوعارى وقۋ ورىندارىنان 2000-نان استام ستۋدەنت ونلاين فورماتتا قوسىلدى. قوناقتار ستۋدەنتتەرگە بىلتىر قابىلدانعان سۋ كودەكسىندەگى جاڭاشىلدىقتى, ەكونوميكا سالالارىندا سۋدى ۇنەمدەۋدى قامتاماسىز ەتۋ بويىنشا اتقارىلىپ جاتقان جۇمىستى جان-جاقتى باياندادى. سول سەكىلدى تۇرمىستىق جاعدايدا سۋدى ۇنەمدەۋ تاسىلدەرى, سولتۇستىك ارالدى ساقتاۋ, سۋ شارۋاشىلىعى ينفراقۇرىلىمىن دامىتۋ, جەراستى سۋىن يگەرۋ باعىتىنداعى جوبالار نازاردان تىس قالمادى. مەملەكەت دەڭگەيىندە ىسكە اسىپ جاتقان جوبالاردىڭ رەتىن, نەگىزگىسىن سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ايتىپ بەردى.
«قازىر الەمدە اۋىزسۋ تاپشىلىعىن كورىپ وتىرعان ەلدەر بار. سوندىقتان سۋ ماسەلەسى ەكولوگيالىق تاقىرىپ قانا ەمەس, ەلدىڭ تۇراقتى دامۋى مەن قاۋىپسىزدىگى ماسەلەسىنە اينالىپ كەلە جاتىر. مەملەكەت باسشىسى اتاپ وتكەندەي, سۋ رەسۋرستارىن ءتيىمدى ءارى ۇقىپتى پايدالانۋ – ەلدىڭ ورنىقتى دامۋىنىڭ نەگىزگى باسىمدىقتارىنىڭ ءبىرى. سوندىقتان سۋدى ۇنەمدەۋ مەملەكەتتىڭ عانا ەمەس ءاربىر ازاماتتىڭ ورتاق جاۋاپكەرشىلىگى دەپ ءتۇسىنۋ كەرەك. وسىعان دەيىن سۋ رەسۋرستارىن باسقارۋ جۇيەسىن دامىتۋدىڭ 2024–2030 جىلدارعا ارنالعان تۇجىرىمداماسىن بەكىتتىك. سول تۇجىرىمدامادا 17 ينديكاتور بەلگىلەدىك, بولجامداردى قاپەرگە الدىق. جاس ماماندار سۋ رەسۋرستارىن ءتيىمدى باسقارۋ, جاڭا تەحنولوگيالاردى ەنگىزۋ, ەكولوگيالىق مادەنيەتتى قالىپتاستىرۋ ىسىندە ايرىقشا ءرول اتقارادى. سىزدەردىڭ بىلىمدەرىڭىز بەن جاڭا يدەيالارىڭىز كەلەشەكتە سۋ قاۋىپسىزدىگىن قامتاماسىز ەتۋگە ۇلكەن ۇلەس قوسا الادى», دەدى ن.نۇرجىگىتوۆ.
بۇدان سوڭ ەۇۋ ديرەكتورلار كەڭەسىنىڭ توراعاسى دارحان مىڭباي ۋنيۆەرسيتەتتىڭ مامان دايارلاۋ ىسىنە قوسقان ۇلەسى تۋرالى باياندادى.
«بىلتىر جەلتوقساندا ۋنيۆەرسيتەت ديرەكتورلار كەڭەسىنىڭ شەشىمىمەن «جاراتىلىستانۋ عىلىمدارى فاكۋلتەتى» «جاراتىلىستانۋ عىلىمدارى ينستيتۋتى» بولىپ قايتا قۇرىلدى. ينستيتۋت حيميا, گەوگرافيا, بيوتەحنولوگيا, بيولوگيا, ەكولوگيا سالالارىندا عىلىم-ءبىلىم بەرۋ كادرلارىن قالىپتاستىرادى. بۇگىندە ينستيتۋتتا 2 702 ستۋدەنت ءبىلىم الىپ جاتىر. ينستيتۋت قۇرىلىمىندا گيدرولوگيا جانە سۋ رەسۋرستارى سالاسىنا مامان دايارلاۋ ەرەكشە ورىن الادى. وسى كۇنگە دەيىن ۋنيۆەرسيتتەن 316 گيدرولوگ مامان ءبىلىم الدى, ءالى دە وقىپ جاتقان ستۋدەنتتەر بارشىلىق. 2024 جىلى تاراز قالاسىندا قازاق ۇلتتىق سۋ شارۋاشىلىعى جانە يرريگاتسيا ۋنيۆەرسيتەتى اشىلدى. بۇل ەلىمىز ءۇشىن وتە ماڭىزدى قادام بولعانى انىق», دەدى د.مىڭباي.
وسى كۇنى ەۋرازيا ۋنيۆەرسيتەتى ستۋدەنتتەرىنىڭ, وقىتۋشىلارى مەن جاس عالىمدارىنىڭ ۇزدىك زەرتتەۋ جۇمىستارى مەن جوبالارى تانىستىرىلدى. ەكوساعات قورىتىندىسىندا قوناقتار ستۋدەنتتەردى قىزىقتىرعان سۇراقتارعا جاۋاپ بەردى.
