دەنساۋلىق ساقتاۋ مينيسترلىگى تۇسىندىرگەندەي, مەديتسينالىق جانە فارماتسەۆتيكالىق باقىلاۋ كوميتەتى پاتسيەنتتەردىڭ قارجىلىق جۇكتەمەسىن ازايتۋ جانە نەگىزسىز ۇستەمە باعالاردى بولدىرماۋ ءۇشىن ءدارى-دارمەكتەردىڭ شەكتى باعالارىن قالىپتاستىرۋ تەتىگىن ەنگىزدى.
باعالاردى قايتا قاراۋ ناتيجەسىندە وزگەرىستەر بولشەك ساۋدادا ساتىلاتىن شامامەن بەس مىڭعا جۋىق دارىلىك پرەپارات اتاۋىن قامتىدى. تىزىمگە جۇرەك-قان تامىرلارى جۇيەسىنىڭ, تىنىس الۋ مۇشەلەرىنىڭ سوزىلمالى اۋرۋلارىن, جۇقپالى جانە باسقا دا كەڭ تارالعان اۋرۋلاردى ەمدەۋگە ارنالعان دارىلەر ەنگىزىلدى. قازىرگى ۋاقىتتا 4994 ساۋدا اتاۋىنا شەكتى باعالار بەلگىلەنگەن.
ءدارىحانالار جانە فارماتسەۆتيكالىق قىزمەتتىڭ باسقا دا سۋبەكتىلەرى دارىلەردى بەلگىلەنگەن شەكتى دەڭگەيدەن اسپايتىن باعامەن ساتۋعا مىندەتتى.
سونىمەن قاتار, 1707 رەتسەپتىسىز ساتىلاتىن پرەپارات مەملەكەتتىك باعا رەتتەۋىنەن شىعارىلىپ, نارىقتىق قاعيداتتار بويىنشا ساتىلىپ جاتىر.
ەلدىڭ 20 وڭىرىندە جۇرگىزىلگەن مونيتورينگ قورىتىندىسى بويىنشا, 2026 جىلعى ناۋرىزدا 2025 جىلعى ماۋسىممەن سالىستىرعاندا 631 ءدارى اتاۋى بويىنشا باعا ورتا ەسەپپەن 24,6%-عا تومەندەگەنى تىركەلدى.
كوميتەتتە باعا مونيتورينگى تۇراقتى نەگىزدە جۇرگىزىلەتىنى حابارلاندى. بەلگىلەنگەن شەكتى باعالاردان اسقان جاعدايدا اكىمشىلىك جاۋاپكەرشىلىك قاراستىرىلعان. باعانىڭ نەگىزسىز جوعارىلاۋ فاكتىلەرى تۋرالى ازاماتتار DariKZ ءموبيلدى قوسىمشاسى ارقىلى نەمەسە مەديتسينالىق جانە فارماتسەۆتيكالىق باقىلاۋ كوميتەتىنىڭ وڭىرلىك دەپارتامەنتتەرىنە حابارلاي الادى.
