بۇل تۋرالى وقۋ-اعارتۋ مينيسترلىگىنىڭ اپپارات جينالىسىندا ايتىلدى. اتالعان ورگان باسشىسىنىڭ ورىنباسارى ايبات ءىلياسوۆ بىرىڭعاي بازانىڭ جوباسى ءتيىمدى قارجىلاندىرۋدى كوزدەيتىنىن جەتكىزدى.
«بۇگىنگە دەيىن بالالاردى كەزەككە قويىپ, بالاباقشاعا بەرۋ كەزىندە: مالىمەتتەر بازاسىنىڭ شاشىراڭقىلىعىنا بايلانىستى بالالاردى كەزەككە قويۋدا قايتالاۋلاردىڭ بولۋى; جالپى كەزەك قۇرىلادى جانە جولداما الۋ ءۇشىن اتا-انالاردىڭ بالاباقشادان ورىن «ۇستاپ الۋعا» (اتا-انالار تاڭعى 6-دان تۇرىپ كومپيۋتەر الدىندا ءبىر تۇيمەنى باسىپ قالۋ ءۇشىن جانتالاسادى – رەد.) ماجبۇرلىگى نەمەسە دەلدالدارعا جۇگىنۋى; بالاباقشاعا قابىلداۋ كەزىندە قاعاز قۇجاتتارىن جيناۋ سەكىلدى بىرقاتار كەمشىلىكتەر بولدى. وسىعان وراي ساراپتامالىق قوعامداستىقتىڭ ۇسىنىستارى مەن اتا-انالاردىڭ پىكىرلەرىن ەسكەرە وتىرىپ, قىزمەت كورسەتۋدىڭ جاڭا مودەلى انىقتالدى. جوبانىڭ نەگىزگى ماقساتى – ءتيىمدى قارجىلاندىرۋ جانە بالالاردى مەكتەپكە دەيىنگى تاربيەمەن قامتۋدى قامتاماسىز ەتۋ. جاڭا ۇلگى ءاربىر وتباسىنا جەكە قاجەتتىلىكتەرى مەن قاراۋلارىنا قاراي ءتورت بالاباقشاعا دەيىن تاڭداۋعا مۇمكىندىك بەرەدى. بۇل قىزمەت كورسەتۋ ۇدەرىسىن اشىق ەتەدى جانە الدىن الا SMS حابارلاۋ ارقىلى بالاباقشالارداعى ورىندى «ۇستاپ الۋعا» ماجبۇرلەمەيدى, – دەدى ۆيتسە-مينيستر ا.ءىلياسوۆ.
مينيسترلىك وكىلىنىڭ مالىمدەۋىنشە, وتباسىندا ەكىدەن كوپ بالا بولسا, اتا-انالار بالالارىن ءبىر بالاباقشاعا بەرە الادى. مەملەكەتتىك دەرەكقورلاردان ينتەگراتسيا ارقىلى جەڭىلدىك مارتەبەسىن راستاۋ ءۇشىن قاعاز انىقتامالاردى جيناۋ جانە تىركەۋ الىنىپ تاستالادى. تۇرعىندارعا ىڭعايلى بولۋ ءۇشىن ءوتىنىش بەرۋدىڭ بىرنەشە ءتاسىلى قاراستىرىلعان, ياعني اتا-انا ەلەكتروندى ۇكىمەت پورتالى, ەكىنشى دەڭگەيلى بانكتەردىڭ ءموبيلدى قوسىمشالارى, جەرگىلىكتى اتقارۋشى ورگانداردىڭ پلاتفورمالارىنىڭ بىرەۋىن تاڭداپ, ء«بىر تەرەزەدەن» عانا بالاسىن بالاباقشاعا ورنالاستىرا الادى.
«مەملەكەتتىك قىزمەت ەكى كەزەڭنەن تۇرادى. ءبىرىنشى كەزەڭدە قىزمەت الۋشى كەزەككە قويۋعا ءوتىنىش بەرگەن كەزدە جەڭىلدىك مارتەبەسى اۆتوماتتى تۇردە راستالادى جانە بالاباقشانى تاڭداعاننان كەيىن قىزمەت الۋشىعا كەزەك ءنومىرى بەرىلەدى. ومىرلىك جاعدايى وزگەرسە, قىزمەت الۋشىعا بالاباقشانى اۋىستىرۋ, كەزەك ءنومىرىن قاراۋ نەمەسە قاجەت بولسا, كەزەكتەن شىعارۋ مۇمكىندىگى بەرىلەدى. ەكىنشى كەزەڭدە تاڭدالعان بالاباقشادا ورىن بوساعان كەزدە قىزمەت الۋشىعا SMS حابارلاما تۇسەدى جانە كەلىسىم بەرۋ ارقىلى بالانىڭ بالاباقشاعا قابىلداۋىن راستايدى. بالانىڭ دەنساۋلىعى تۋرالى قاجەتتى قۇجاتتار دەنساۋلىق ساقتاۋ مينيسترلىگىنىڭ دەرەكتەر بازاسىنان اۆتوماتتى تۇردە الىنادى. بالانى بالاباقشاعا قابىلداۋ ءۇشىن بالاباقشا مەن قىزمەتتى الۋشى اراسىنداعى شارتقا قول قويۋ ونلاين رەجىمدە جاسالادى. اتا-انالارعا بالاباقشا, كەزەك پەن بوس ورىندار تۋرالى اقپاراتتى زەردەلەۋ, سونداي-اق بالاباقشا تاڭداۋ مۇمكىندىگىن بەرۋ ماقساتىندا كارتا ازىرلەندى. وسى كارتا ەلەكتروندى ۇكىمەتتىڭ پورتالىندا بولادى. اتا-انا سول كارتاعا سۇيەنىپ, تۇرعىلىقتى جەرىنە, جۇمىسىنا جاقىن نەمەسە باسقا دا جەكە قالاۋى بويىنشا بالاباقشانى تاڭداي الادى», دەدى ءمينيستردىڭ ورىنباسارى.
جاۋاپتى مينيسترلىكتىڭ حابارلاۋىنشا, بىرىڭعاي ەسەپكە الۋ بازاسى تولىقتاي ازىرلەنگەن. مەملەكەتتىك قىزمەت كورسەتۋ قاعيدالارىنىڭ جوباسى دا دايىندالىپتى. قاناتقاقتى جوبا قاراعاندى وبلىسىنداعى شاحتينسك قالاسىندا جانە سولتۇستىكتەگى پەتروپاۆل قالاسىندا ىسكە قوسىلدى. قاناتقاقتى جوبانىڭ ۋاقىتى اياقتالعاننان كەيىن, ياعني 2024 جىلدىڭ قاڭتارىنان باستاپ جاڭا جۇيە رەسپۋبليكا بويىنشا جۇمىس ىستەيدى.
