سۋرەتتى تۇسىرگەن – باعدات شويباسوۆ
«كەشەنىمىز تاۋارلىق بالىق شارۋاشىلىعىن قولعا العانىنا ءبىر جىلعا جۋىق ۋاقىت ءوتتى. بۇل اسىل تۇقىمدى بالىقتارىمىز جىل بويى جابىق سۋمەن قامتاماسىز ەتۋ جۇيەسى بار جاساندى توعانىمىزدا وسەتىن بولادى. بارلىعى زاماناۋي تەحنولوگيامەن جابدىقتالعان. بەكىرە تۇقىمداس بالىقتاردى وسىرۋگە جانە ۇستاۋعا ونى كوبەيتۋگە وتە قولايلى. بۇگىنگى جاڭادان كەلگەن انالىق بەكىرەلەرىمىزدى ءوسىرىپ, ونىڭ ۋىلدىرىعىن الىپ, ءبىزدىڭ كليماتىمىزعا لايىقتى جاعدايعا جەتكىزەمىز. بۇل ۇدەرىستىڭ ءوزى 4-5 جىلدىڭ كولەمىندە جۇرگىزىلەدى. وسى باعىتتا اۋدانىمىزدى عانا ەمەس, الىس-جاقىن شەتەلدەرگە دە ەكسپورتتايتىن بولامىز», دەيدى «Asanov Club» جشس-نىڭ ديرەكتورى ەدۋارد انتونەنكو.
بالىق كەشەنى ۋىلدىرىقتى ۇزاق جىلدار بويى الۋدىڭ كۇردەلى تەحنولوگياسىن يگەرۋىمەن ەرەكشەلەنەدى. ون جىلدىڭ كولەمىندە ۇزدىكسىز ءومىر سۇرە بەرەتىن بولادى.
بۇگىنگى كۇنى بالىق شارۋاشىلىعىن دامىتۋدى مەملەكەتتىك قولداۋ ماقساتىندا جەرگىلىكتى بيۋدجەتتەن 2022 جىلعا سۋبسيديالاۋعا 70,0 ملن تەڭگە ءبولىندى. بۇل سوما «Qoldau» پورتالىندا بەرىلگەن 17 ءوتىنىم بويىنشا يگەرىلدى. 2023 جىلعا جەرگىلىكتى بيۋدجەتتەن وسى ماقساتتارعا سۋبسيديالار كولەمى ەكى ەسەگە ۇلعايىپ, 150,0 ملن تەڭگەگە دەيىن ينۆەستيتسيالىق شىعىنداردى وتەۋگە رەسپۋبليكالىق بيۋدجەتتەن 436,7 ملن تەڭگە بولىنگەنى تۋرالى الماتى وبلىستىق تابيعي رەسۋرستار باسقارماسىنىڭ باسشىسى ايدار ماعزۇموۆ حاباردار ەتتى.
«وسى جىلدىڭ 14 ماۋسىمىندا الماتى وبلىسى اكىمدىگىنىڭ «2023 جىلعا ارنالعان اكۆاوسىرۋ (بالىق ءوسىرۋ شارۋاشىلىعى) ءونىمىنىڭ ونىمدىلىگى مەن ساپاسىن ارتتىرۋدى, سونداي-اق اسىل تۇقىمدى بالىق ءوسىرۋدى دامىتۋدى سۋبسيديالاۋ كولەمدەرىن بەكىتۋ تۋرالى» №179 قاۋلىسى شىعىپ, بۇگىنگى كۇنگە «Kezekte» اقپاراتتىق جۇيەلەر پلاتفورماسىنداعى «Balyqsy» سەرۆيسى ارقىلى 138 971 469 تەڭگە سوماسىنا 30 ءوتىنىم تولەندى, 1 ءوتىنىم قاراۋ ساتىسىندا جانە ينۆەستيتسيالىق شىعىنداردى وتەۋگە 14 ءوتىنىم بەرىلدى. قازىرگى ۋاقىتتا وتىنىمدەر قارالىپ جاتىر», دەدى باسقارما باسشىسى ايدار ماعزۇموۆ.
«Asanov Club» توعان شارۋاشىلىعى العاشقى بالىق اۋلاۋدى بىلتىرعى جىلدىڭ قىركۇيەگىندە جۇزەگە اسىرىپ, بالىق ينسپەكتسياسىمەن بىرلەسىپ «بالىق ءوسىرۋ – بيولوگيالىق نەگىزدەمەسى» اتتى جوبا جاسالىپ, توعاندار پايدالانۋعا بەرىلگەن. قازىر 2 گەكتار جەردە 3 توعان جۇمىس ىستەۋدە.
سەرىكتەستىك ديرەكتورى ەدۋارد انتونەنكونىڭ مالىمدەۋىنشە, بۇل وڭىردەگى بەكىرە تۇقىمداس بالىق تۇرلەرىن وسىرۋمەن اينالىساتىن جالعىز توعان, وندا 19 توننا بالىق بار ەكەن.
ەلىمىزدە بالىق شارۋاشىلىعىن دامىتۋدىڭ 2021-2030 جىلدارعا ارنالعان باعدارلاماسىنا سايكەس, الماتى وبلىسى بويىنشا نەگىزگى نىسانالى ينديكاتورلار 2030 جىلعا قاراي اكۆاوسىرۋ ءوندىرىسىن 3,7 مىڭ توننادان 20 مىڭ تونناعا دەيىن جەتكىزۋگە قامدانىپ وتىر. 2023 جىلى تاۋارلى بالىق ءوسىرۋ جوسپارى 5 568 تونناعا جوسپارلاندى. الماتى وبلىسىندا 2026 جىلعا قاراي 329 جاڭا جۇمىس ورنىن قۇرۋ ارقىلى جالپى قۇنى 80,6 ملرد تەڭگەنى قۇرايتىن, جالپى قۋاتتىلىعى 16,3 مىڭ توننا تاۋارلىق بالىق قۇرايتىن 10 جوبانى ىسكە اسىرۋ جوسپارلانۋدا.
الماتى وبلىسى
