ارينە, بۇل – قازاقستان ۇلتتىق قۇراماسىنىڭ فيفا مۇشەلىگىنە ەنگەن 1994 جىلدان بەرگى ەڭ ۇزدىك كورسەتكىشى ەمەس. ۇلتتىق قۇرامانىڭ فيفا رەيتينگىندەگى ستاتيستيكاسىنا كوز جۇگىرتەر بولساق, 2001 جىلى جەرلەستەرىمىز ۋەفا قۇرامىنا وتپەي تۇرىپ رەيتينگتە 97-ورىنعا دەيىن كوتەرىلىپ, وزىندىك رەكورد ورناتقان بولسا, اراعا 15 جىل سالىپ 2016 جىلى 83-ورىنعا دەيىن كوتەرىلگەن ەدى. سول جىلى وتاندىق مامان تالعات بايسۋفينوۆ قۇراما تىزگىنىن ۇستاعان ۋاقىتتا وتانداستارىمىز ءتاۋىر ويىنىمەن جانكۇيەرلەردىڭ قۋانىشىنا بولەنىپ, ءوز جەرىمىزدە ازۋلى پولشا قۇراماسىمەن 2:2 ەسەبىمەن تەڭ ويناعاننان كەيىن رەيتينگتە بىردەن 13 ساتى جوعارىلاپ, 83-ورىننان كورىنگەن ەدى.
بيىل جىل سوڭىنا دەيىن جەرلەستەرىمىز فيفا رەيتينگىندەگى ءوز رەكوردىن جاڭارتا الماس. ويتكەنى جاڭا جىلعا دەيىن ۇلتتىق قۇرامانىڭ ساناۋلى ويىندارى قالدى. ەگەر كەلەسى جىلى دا ۇلتتىق قۇراما فۋتبولشىلارى ءدال وسىلاي ونەر كورسەتەتىن بولسا, وندا ناتيجەمىزدى جاقسارتۋعا مول مۇمكىندىگىمىز بولادى.
جۋىردا عانا جاريالانعان فيفا رەيتينگىنە نازار اۋداراتىن بولساق, الەمدىك رەيتينگتىڭ كوشىن باستاپ تۇرعان العاشقى وندىقتا دا ازداعان وزگەرىستەر ورىن العانىن بايقايمىز. ماسەلەن, 2016 جىلعى ەۋروپا چەمپيوندارى پورتۋگاليا سەگىزىنشى ورىنعا كوتەرىلىپ, قارت قۇرلىق بىرىنشىلىگىنىڭ ەڭ كەيىنگى جەڭىمپازى يتاليانى (2021) توعىزىنشى ورىنعا ىعىستىردى. ال ۇزدىك ۇشتىك بۇل جولى دا وزگەرىسسىز قالدى. رەيتينگتىڭ كوشىن بىلتىرعى الەم چەمپيوندارى ارگەنتينا قۇراماسى باستاپ تۇرعان بولسا, ەكىنشى ورىنعا فرانتسيا فۋتبولشىلارى, ءۇشىنشى ساتىعا برازيليا قۇراماسى جايعاسقان.
ەۋروپا چەمپيوناتىنىڭ بيىلعى ىرىكتەۋ كەزەڭىندە قازاقستان قۇراماسىمەن ءبىر توپتا ونەر كورسەتىپ جاتقان قۇرامالارعا توقتالار بولساق, ازىرگە ءبىزدىڭ توپتاعى ەڭ ۇزدىك ناتيجە دانيا قۇراماسىنا تيەسىلى. ولار 1606.84 ۇپايمەن 18-ورىندا تۇر. كەيىنگى ساتىلارعا فينليانديا (54-ورىن), سلوۆەنيا (59), سولتۇستىك يرلانديا (74) جانە سان-مارينو (207) فۋتبولشىلارى ورنالاسقان.
قازاقستان قۇراماسى قىركۇيەك ايىندا ەۋرو-2024 ىرىكتەۋ كەزەڭى اياسىندا ەكى ويىن وتكىزىپ, العاشقىسىندا فينلياندياعا ەسە جىبەرسە (0:1), ەكىنشى ويىندا سولتۇستىك يرلانديادان 1:0 ەسەبىمەن باسىم تۇسكەن ەدى. سول ناتيجەسىنىڭ ارقاسىندا جەرلەستەرىمىز رەيتينگتە قوسىمشا 9 ۇپايعا يە بولىپ, جالپى 1206.94 ۇپايمەن 100-ورىنعا كوتەرىلىپ الدى. بۇعان دەيىنگى رەيتينگتە جەرلەستەرىمىز 104-ساتىعا ورنالاسقان ەدى.
ايتا كەتەيىك, وتانداستارىمىز ىرىكتەۋ باسەكەلەرىنىڭ العاشقى التى تۋر ويىندارىنان كەيىن ەل فۋتبولى تاريحىنداعى رەكوردتىق 12 ۇپايدى جيناپ, قوسىمشا كورسەتكىشتەر بويىنشا فينليانديادان (12 ۇپاي) كەيىنگى ءتورتىنشى ورىنعا جايعاستى. سلوۆەنيا مەن دانيا قۇرامالارى كوش باستاپ تۇر (ارقايسىسىندا 13 ۇپايدان). قازاقستان قۇراماسى ەۋرو-2024 ىرىكتەۋ كەزەڭىندەگى كەلەسى ەكى ماتچىن سىرت الاڭدا وتكىزەدى. ماگومەد اديەۆ شاكىرتتەرى 14 قازاندا دانيامەن, 17 قازاندا فينليانديا قۇرامالارىمەن كەزدەسەدى.
