سۋرەتتى تۇسىرگەن – جۇماباي مۇسابەكوۆ
اسقاق الاتاۋدىڭ كورىكتى تابيعاتىنىڭ توسىندە ات تۇياعىن دۇبىرلەتىپ جۇرگەن قىز-جىگىتتەردىڭ شەبەرلىگى تالايدى ءتانتى ەتىپ كەلەدى. ات جالىندا وينايتىن جاستاردىڭ دەنى تالعار اۋدانىنىڭ رىسقۇلوۆ, بەرەكە اۋىلدارىنان بولسا, اراسىندا الماتىلىق ارۋلار دا بار.
«بۇگىندە كوپكە ءمالىم «عۇندار» ەتنواۋىلىنا كەلىپ دەمالۋشىلارعا ۇلتتىق سالت-داستۇرلەرمەن بىرگە, ۇلتتىق ويىندار, سونىڭ ىشىندە ات سپورتىن تاماشالاۋعا مۇمكىندىك جاسالعان. ەتنواۋىل باسشىسى اسىلحان مىرزابەكقىزىنىڭ ۇيىتقى بولۋىمەن 2017 جىلدان باستاپ «سارباز رۋحى» دەگەن اتاۋعا يە كوماندا جاساقتالىپ, ۇلتتىق ونەرىمىزدى كورسەتۋمەن اينالىسىپ كەلەمىز. كوماندا ساپىنداعى ويىنشىلار سانى 100-گە جەتتى. ولاردىڭ قۇرامىندا ەلىمىزدىڭ ءار تۇكپىرىنەن كەلگەن اتسۇيەر سپورتشى جاستار بار. ماقساتىمىز – جاستاردى ات سپورتىنا باۋلۋ, ۋاقىتتارىن ءتيىمدى وتكىزۋگە اتسالىسۋ», دەيدى كوماندا جاتتىقتىرۋشىسى قۋان سوپىبەكوۆ.
ات سپورتىنا اۋەس جاستاردىڭ تاقىمى قاتايىپ, تاجىريبەسى شىڭدالعان سوڭ ولاردى ەلىمىزدىڭ ءار ايماعىنداعى ءتۇرلى ۇلتتىق ويىن-ساۋىقتارعا قاتىستىرۋ, وعان قوسا شەتەلدەرگە شىعارۋ جۇيەلى تۇردە جولعا قويىلۋى كوماندا قۇرامىن قاناتتاندىرا ءتۇستى. ات جالىندا وينايتىن 18 بەن 25 جاس ارالىعىنداعى قىز-جىگىتتەر نايزا لاقتىرۋ, ساداق اتۋ, تەڭگە ءىلۋ, قىز قۋمەن قاتار, ات ۇستىندە ءتۇرلى ويىن ورنەگىن قۇرۋعا ابدەن ماشىقتالعان.
«كوماندامىزداعى الماتىلىق ايسەل امانعاليەۆا, ارۋجان توقتاربەك, رايىمبەك اۋدانىنان كەلگەن ديانا جاعالباەۆا سەكىلدى ارۋلاردىڭ ات ۇستىندە ونەر كورسەتەتىن شەبەرلىكتەرىندە ءمىن جوق. جۇرەكتى قىزدارىمىز ات قۇلاعىندا ويناعاندا تالايدىڭ تاڭدايىن قاقتىرىپ كەلەدى. ءبىز ولارمەن ءاردايىم ماقتانامىز», دەيدى تالانتتى جاس ءبىرجان ساعىمجان.
ەندەشە «عۇندار» ەتنواۋىلىنداعى ۇلتتىق سپورتتىڭ مايەگىنە اينالعان «سارباز رۋحى» كومانداسىنا ساتتىلىك تىلەيمىز.
الماتى وبلىسى
