ەليتالى كەزەڭنىڭ العاشقى تۋرىندا رۋمىنيا ءوز الاڭىندا ازەربايجان قۇراماسىن قابىلداپ, قارسىلاستارىن 3:1 ەسەبىمەن تىزە بۇكتىرگەن سوڭ, تۋرنير كەستەسىندە گول سانىنىڭ كورسەتكىشى بويىنشا قازاقستان قۇراماسىنىڭ الدىن وراپ كەتكەن ەدى. بىراق رۋمىنيالىق فۋتزالشىلاردىڭ دا, جانكۇيەرلەردىڭ دە توپتىق سايىستا تورگە وزدىق دەگەن قۋانىشتارى كوپكە سوزىلعان جوق. الماتىداعى بالۋان شولاق سپورت سارايىندا وتكەن تارتىستى ويىندا ريكاردو كاكا شاكىرتتەرىنىڭ باعى جانىپ, قارسىلاستارىن تۋرنير كەستەسىندە ەكىنشى ورىنعا سىرعىتتى.
ء تورت مىڭعا جۋىق جانكۇيەر تاماشالاعان قازاقستان – رۋمىنيا ماتچىنىڭ ءبىرىنشى تايمىندا جەرلەستەرىمىز قارسىلاستار قاقپاسىن ءتورت مارتە ءدال كوزدەپ, سپورت كەشەنىنە جينالعان جۇرتتىڭ ەڭسەسىن كوتەرىپ تاستادى. ويىننىڭ نەبارى ەكىنشى مينۋتىندا دۋگلاس جۋنيور ءوزى باستاعان شابۋىلدى ادەمى گولمەن تۇيىندەسە, ارادا كوپ ۋاقىت وتپەي البەرت اقبالىقوۆ مەرگەندىگىمەن كوزگە ءتۇسىپ, جانكۇيەرلەردىڭ قوشەمەتىنە بولەندى. ال باسەكەنىڭ 16-مينۋتىندا ەدسون قارسىلاستىڭ ەكى بىردەي قورعاۋشىسىن قاپى قالدىرىپ, قازاقستان قۇراماسىنىڭ ءۇشىنشى گولىن سوقتى. ءبىرىنشى تايمنىڭ اياقتالۋىنا ساناۋلى سەكۋندتار قالعاندا بىلتىرعى ەۋروپا چەمپيوناتىنىڭ ۇزدىك سۇرمەرگەنى اتانعان ءبىرجان ورازوۆ ەدسوننىڭ پاسىنان كەيىن تابلوداعى كورسەتكىشتى 4:0-گە جەتكىزدى. العاشقى 20 مينۋتتا قوناقتار ساپىنان مانيا سابوليچ مەرگەندىك تانىتتى.
ءبىرىنشى تايمداعى باسىمدىقتان كەيىن ءبىزدىڭ جىگىتتەر ەكىنشى تايمدى اسا ساقتىقپەن باستاپ, شابۋىلعا كوپ شىعا قويعان جوق. ويتكەنى تابلوداعى كورسەتكىش ءبىزدىڭ قۇراما ءۇشىن قاناعاتتانارلىق ناتيجەنى كورسەتىپ تۇرعان ەدى. ەسەسىنە رۋمىنيا فۋتزالشىلارى ويىن تىزگىنىن ءوز قولدارىنا الۋعا تىرىسىپ, بەلسەندى شابۋىل ۇيىمداستىرا باستادى. العاشقى 10 مينۋتتا قارسىلاستارىمىز تىنىمسىز شابۋىلدارىنان ەشتەڭە وندىرە العان جوق. تەك ەكىنشى تايمنىڭ بەل ورتاسىنان اسقاندا عانا يگيتا قورعاعان قاقپادان ساڭىلاۋ تابا ءبىلدى. 32-مينۋتتا اندرە لۋي ساسسە گول سوقسا, 36-مينۋتتا مانيا ءدۋبلدىڭ اۆتورى اتاندى. قورىتىندى ەسەپ – 4:3. وسىلايشا, ەل قۇراماسى توپتىق كەزەڭدەگى ەكىنشى ويىنىندا دا جەڭىسكە جەتىپ, التى ۇپايمەن ا توبىندا جەكە-دارا كوش باستادى. ءبىر جەڭىس, ءبىر جەڭىلىسى بار رۋمىنيا قۇراماسى ەكىنشى ورىنعا سىرعىدى.
ال ءبىزدىڭ توپتا قاتار وتكەن ەكىنشى ماتچتا ازەربايجان ۇلتتىق قۇراماسى ءوز الاڭىندا نيدەرلاندتى قابىلدادى. باكۋدە وتكەن باسەكەدە الاڭ قوجايىندارى قارسىلاستارىنا بەت قاراتقان جوق – 6:1. بۇل ويىندا ازەربايجان ساپىنان رافاەل ۆيلەلا مەن فيليپينو ءدۋبلدىڭ اۆتورى اتانسا, گاللو مەن مانەكا ءبىر-ءبىر گولمەن كوزگە ءتۇستى. ال نيدەرلاند قۇراماسىنىڭ جالعىز گولىن يلياس بۋزيت سوقتى.
ەندى ريكاردو كاكا شاكىرتتەرى كەلەسى كەزدەسۋىن 6 قازان كۇنى سىرت الاڭدا ازەربايجان قۇراماسىمەن وتكىزسە, بەس كۇننەن كەيىن ازەربايجاندىق فۋتزالشىلاردى ءوز الاڭىندا قابىلدايدى.
ەليتالى كەزەڭنىڭ ەرەجەسى بويىنشا كەلەسى جىلعى الەم چەمپيوناتىنىڭ فينالدىق كەزەڭىنە ءار توپتىڭ جەڭىمپازدارى تىكەلەي جولداما السا, ەكىنشى ورىن العان ەڭ ۇزدىك ءتورت قۇراما قالعان ەكى جولدامانى ساراپقا سالادى. ىرىكتەۋ ماتچتارى وسى جىلدىڭ جەلتوقسان ايىندا مارەسىنە جەتسە, ەلەكتىك ماتچتار 2024 جىلدىڭ 8-17 ءساۋىر كۇندەرىنە جوسپارلانعان. ال وزبەكستاننىڭ باس شاھارى – تاشكەنتتە الەم چەمپيوناتى 16 قىركۇيەك پەن 6 قازان ارالىعىندا ۇيىمداستىرىلادى.
