فوتو: https://parlam.kz/
رينات زايىتوۆتىڭ «ەلىمىزدە عالامتور ارقىلى, باسقا دا رەسۋرستاردا جاسالىپ جاتقان الاياقتىق فاكتىلەرىن جۇزەگە اسىرۋشىلاردىڭ 80%-ى – ناماز وقيتىن قاۋىم. وتىرىك دەسە, كەلىپ بەتىمە باسسىن. ءتىپتى بازارعا بارىڭىز, باسقا قوعامدىق ورىنداردا دا سونداي, ساقالىن سيپاپ, اۋزىندا اللاسى ايتىلعانىمەن شىنتاۋايتىندا ادام الداپ جاتىر» دەپ ايتقان پىكىرىنىڭ ءۇزىندىسى قىزۋ تالقىلانىپ جاتىر.
«كەيىنگى ەكى كۇندە ماعان قاراي ەكپىندى اقپاراتتىق جانە پسيحولوگيالىق شابۋىل باستالدى. ونى ءوزىم دە كۇتكەنمىن. سەبەبى, وعان ەتىم ۇيرەنگەن. مۇنداي شابۋىلدار ماعان 2008, 2011, 2019-ىنشى جىلدارى دا جاسالعان. جاسىرمايمىن, وڭاي ەمەس. بىراق شىداۋعا تۋرا كەلەدى. ەندى سىزدەرگە بۇل تەحنولوگيا قالاي جاساقتالاتىنىن تۇسىندىرۋگە تىرىسايىن. مىسالى وسى جولعى شابۋىلدىڭ تاقىرىبى مەنىڭ ناماز وقىپ ءجۇرىپ الاياقتىق جاسايتىن ادامدار جايلى ايتقان ءسوزىمدى العا تارتىپ, سول ارقىلى قوعامدى ماعان قارسى قويماق. ماقساتى بەلگىلى. ءبىرىنشىسى - مەنى قورقىتۋ, ەكىنشىسى - مەنىڭ جەكە باسىما قاستاندىق جاسالسا, وسى سەبەپتەن ەكەن دەگىزۋ. ءسوز جوق, اقىلدى ءجۇرىس. ەكەۋىنىڭ بىرەۋىنە جەتكەنشە ولاردىڭ توقتامايتىنىن دا بىلەمىن. تاۋەكەل. ماڭدايعا جازعانىن كورەمىز», دەدى ر.زايىتوۆ.
ءماجىلىس دەپۋتاتى ەشكىمنەن قورقىپ قاشپايتىنىن, ايتقان پىكىرىنەن اينىمايتىنىن, بار ارمانى ەلدىڭ گۇلدەنىپ كوركەيۋى ەكەنىن جازدى.
«ەشبىر توپتىڭ الدىندا تىزەرلەپ كەشىرىم سۇرامايمىن! ويتكەنى وعان سەبەپ كورىپ تۇرعان جوقپىن. الەۋمەتتىك جەلى شۋلادى ەكەن دەپ, دىرىلدەيتىن قورقاقتارىڭ مەن ەمەس. العا قويعان ناقتى ماقساتىم مەن جوسپارىم بار. سول جۇمىستاردى ءبىتىرۋىم كەرەك. ءماجىلىس مىنبەرىنەن حالىققا بەرگەن انتىم بار. بەرىلگەن مەرزىم - بەس جىل. سول بەس جىلىمدى حالىقتىڭ مۇددەسىن قورعاۋعا ارنايمىن. باسقاسى ءبىر جاراتقاننىڭ قۇزىرىندا.
تۇسىنەتىن شىعارسىزدار دەپ ويلايمىن», دەپ جازدى دەپۋتات.
كۇندەلىكتى جۇمىسقا ءبىر ءوزى ەشبىر وققاعارسىز جاياۋ بارىپ كەلەتىن اقىن قانداي قىسىم كورسەتىلسە دە قورىقپايتىنىن مالىمدەدى.
