بيىلدان باستاپ اسكەري بورىشىن وتەگەن وتانداستارىمىزعا ءبىرشاما جەڭىلدىك قاراستىرىلعان. بۇل تۋرالى وڭىرلىك كوممۋنيكاتسيالار قىزمەتى الاڭىندا اباي وبلىستىق قورعانىس ىستەرى جونىندەگى دەپارتامەنت باستىعىنىڭ ورىنباسارى قانات ءشارىپحانوۆ باق وكىلدەرىمەن كەزدەسۋىندە مالىمدەدى.
– بيىلدان باستاپ اسكەري قىزمەت وتكەرۋ كەزەڭىندە ءتارتىبى جاقسى, جاۋىنگەرلىك دايىندىقتا جوعارى ناتيجەلەرگە قول جەتكىزگەن ۇزدىك اسكەري قىزمەتشىلەرگە جوو گرانتى ەسەبىنەن تەگىن جوعارى ءبىلىم الۋعا مۇمكىندىك بەرىلەدى. قازىرگى تاڭدا قورعانىس مينيسترلىگى 70-تەن استام جوعارى جانە جوعارى وقۋ ورنىنان كەيىنگى ءبىلىم بەرۋ مەكەمەسىمەن كەلىسىمشارت جاساپ وتىر. سونداي-اق اسكەري قىزمەتكە بارعان جاستاردىڭ نەسيە تولەۋ مەرزىمى شەگەرىلىپ, 13 اي بويى كرەديتتىك دەمالىس مۇمكىندىگىن الادى, – دەيدى قانات ءشارىپحانوۆ.
قورعانىس ىستەرى دەپارتامەنتىنىڭ ناقتى دەرەگىمەن ايتار بولساق, اباي وبلىسى بويىنشا اسكەرگە جارامدى ازامات سانى 21 مىڭنان اسادى. ال وسى كۇزگى ناۋقاندا 700 ازامات اسكەري قىزمەتكە جارامدىلار قاتارىندا. ونىڭ ىشىندە قارۋلى كۇشتەر قاتارىنا – 290, ۇلتتىق ۇلانعا – 240, ۇقك شەكارا قىزمەتىنە – 120, مەملەكەتتىك كۇزەت قىزمەتىنە – 10 جانە توتەنشە جاعدايلار مينيسترلىگىنە 40 بوزبالا شاقىرىلادى.
شەكارا قىزمەتى دەپارتامەنتىنىڭ تاربيە, يدەولوگيالىق جانە كادرلىق جۇمىستار ءبولىمىنىڭ باسشىسى ايدىن شۇرىمباەۆ ساربازدار ءۇشىن تاعى ءبىر وڭتايلى جايدان حاباردار ەتتى. اسكەر قاتارىنا الىنعان ازاماتتار ەل الدىنداعى بورىشىن ەندى ءوز وڭىرىندە وتەۋىنە دە مۇمكىندىك قاراستىرىلعان. بۇل قادام ۆەدومستۆولىق ءتارتىپتىڭ, مورالدىق-پسيحولوگيالىق احۋالدىڭ جاقسارۋىنا, سونىمەن قاتار اسكەري قىزمەتشىنىڭ ءوز وڭىرىندە كەلىسىمشارت بويىنشا قىزمەتكە شاقىرىلۋىنا دا مۇمكىندىك بەرەدى.
