Instagram, Facebook الەۋمەتتىك جەلىلەرىندە قاراعاندى وبلىسى شاحتينسك قالاسىنىڭ اتا-انالارى قالالىق ءبىلىم باسقارماسى مينيسترلىكتىڭ بۇيرىعىن بۇزىپ وتىرعانىنا شاعىمداندى. Instagram جەلىسىندەگى «ۆەچەرنيايا كاراگاندا» پاراقشاسىندا جاريالانعان ۆيدەودا شاحتينسك قالاسىنىڭ بىرنەشە مەكتەبىنە (№1, 5, 6, 7 مەكتەپتەر) بالالارى باراتىن اتا-انالار قارسىلىعىن بىلدىرگەن.
«ەلىمىزدەگى وقۋشىلاردىڭ ءبارى اپتاسىنا 5 كۇن وقىعاندا, ءبىز نەگە 6 كۇن وقيمىز؟ شاحتينسك قالاسىنىڭ ءبىلىم ءبولىمى وقۋ-اعارتۋ مينيسترلىگىنىڭ №153 بۇيرىعىن بۇزىپ وتىر. ءبولىم باسشىسى نيكولاي ونسوۆيچ وزىنە قالاي ىڭعايلى بولسا, سولاي جاساپ جاتىر. كەشە ءبىز ونى كەزدەسۋگە شاقىردىق, بىراق كەلمەدى. جاقىندا قالالىق ءبىلىم ءبولىمىنىڭ چاتىندا ونىڭ حاتى جاريالاندى. وندا نيكولاي ونسوۆيچ ءوزىنىڭ وسى شەشىمى ارقىلى بالالارىمىزدىڭ دەنساۋلىعى مەن بوس ۋاقىتىنا قامقورلىق تانىتىپ وتىرعانىن ايتقان. شىن مانىندە ءبىلىم ءبولىمىنىڭ باسشىسى كەرىسىنشە ساباق ۋاقىتىن 40 مينۋتتان 45 مينۋتقا كوبەيتىپ جىبەردى. سونىڭ كەسىرىنەن ەكىنشى اۋىسىم ۋاقىتى شەگەرىلىپ, تۇستەن كەيىن وقيتىن وقۋشىلار مەكتەپتەن كەش قايتاتىن بولدى. بوس ۋاقىتى دەيدى, قايتا بالالاردى وتباسىندا وتكىزەتىن ارتىق ءبىر كۇندىك دەمالىسىنان ايىرىپ, سەنبى كۇنىنە دە ساباق قويدى. ەندى بالالارىمىز جەكسەنبى كۇنى عانا دەمالادى», دەدى شاعىمدانعان اتا-انالاردىڭ ءبىرى.
جاڭا وقۋ جىلى باستالاردا وقۋ-اعارتۋ مينيسترلىگى ورتا ءبىلىم كوميتەتىنىڭ توراعاسى قانىبەك جۇماشەۆ وقۋ جىلىنىڭ ۇزاقتىعى بۇرىنعى قالپىنا كەلۋىنە بايلانىستى تۇبەگەيلى وزگەرىستەر بولمايتىنىن ايتقان-دى.
«جۇمىس اپتاسىنىڭ ۇزاقتىعى بەس كۇن بولىپ قالادى. مەكتەپتەر ءمينيستردىڭ 2020 جىلعى 21 ساۋىردەگى №153 بۇيرىعىن باسشىلىققا الۋعا ءتيىس. بارلىق ءبىلىم بەرۋ ۇيىمى بۇرىنعىداي شتاتتىق تارتىپتە جۇمىس ىستەيدى. ءبىلىم بەرۋ ۇيىمدارىنىڭ اكىمشىلىگى ساباق كەستەسىن, كۇنتىزبەلىك جوسپارلارىن جانە ساعاتتاردى بولۋدە ادەتتەگىدەي وزدەرى جاۋاپتى. قازىرگى ۋاقىتتا وقۋ جىلىنىڭ ۇزاقتىعى تۋرالى بۇيرىق كەلىسۋگە جولداندى. الدا بەكىتىلەدى. وسى بۇيرىقتا 34 اپتالىق وقۋ جىلى 1 قىركۇيەكتەن باستالىپ, 25 مامىردا اياقتالاتىنى ناقتى كورسەتىلگەن», دەگەن ەدى ق.جۇماشەۆ.
جۇمىس اپتاسىنىڭ ۇزاقتىعى بەس كۇن بولىپ قالادى دەپ انىق ايتىلدى. سوعان قاراماستان مەكتەپتەر 6 كۇندىك وقۋ اپتاسىنا كوشىپ جاتىر. سوندا مينيسترلىكتىڭ سوزىنە وڭىرلەر, مەكتەپتەر ءمان بەرمەي وتىر ما؟ مينيسترلىككە سەبەبىن سۇراپ بايلانىسقا شىعىپ ەدىك, ءبىلىم باسقارمالارىنا سىلتەدى. ءارى 1 قىركۇيەكتەگى ماتەريالىمىزدا بەرىلگەن ق.جۇماشەۆتىڭ ءسوزىن قايتا جىبەرىپ, ۆەدومستۆونىڭ رەسمي جاۋابى وسى ەكەنىن جەتكىزدى.
ال قاراعاندى وبلىستىق ءبىلىم باسقارماسىنىڭ باسشىسى گۇلسىم قوجاحمەتوۆا ءوزىنىڭ Facebook الەۋمەتتىك جەلىسىندەگى رەسمي پاراقشاسىندا اتا-انالاردىڭ شاعىمىنا «اتا-انالاردان كەلىپ تۇسكەن وتىنىشتەردى نازارعا الا وتىرىپ, قالالار مەن اۋدانداردىڭ ءبىلىم بولىمدەرىنىڭ باسشىلارىنا بەس كۇندىك رەجىمگە كوشۋ ءۇشىن كەستە قۇرۋ مۇمكىندىگىن قاراستىرۋ ۇسىنىلدى. سونىمەن قاتار وقۋ جوسپارىندا كوزدەلگەن گيمنازيا جانە ليتسەي سىنىپتارى ءۇشىن قوسىمشا ساعاتتاردى سەنبى كۇندەرى وتكىزۋدى ۇسىنامىز», دەپ جاۋاپ بەرگەن.
شاحتينسك قالالىق ءبىلىم ءبولىمىنىڭ باسشىسىنا حابارلاسىپ ەدىك, وكىنىشكە قاراي, تەلەفونىن كوتەرمەدى. وسىندايدا «ەرىكسىز وزگەرتىلە بەرەتىن بۇيرىق نەگە شىعارىلادى؟ بۇيرىعى جۇرمەيتىنى بار, مينيسترلىك نەسىنە قۇرىلادى؟» دەيسىڭ...
