وڭىردە ءۇش اۋىسىمدى مەكتەپتەردى جانە ورىن تاپشىلىعىن جويۋ ماقساتىندا بىلتىر 710 ورىندىق 4 مەكتەپ سالىنىپ, قولدانىسقا بەرىلگەن ەدى. بيىل 16 مەكتەپتىڭ قۇرىلىسى جۇرگىزىلىپ جاتىر. ونىڭ 9-ى 1 قىركۇيەكتە پايدالانۋعا بەرىلدى. سونىڭ ءبىرى – ەڭبەكشىقازاق اۋدانىنىڭ ورتالىعى ەسىك قالاسىنداعى №6 مەكتەپ-ليتسەيى. ونىڭ اشىلۋ سالتاناتىنا الماتى وبلىسى اكىمىنىڭ ورىنباسارى نۇرجان قۇدايبەرگەنوۆ قاتىسىپ, ۇستازدار مەن وقۋشىلاردى, اتا-انالاردى جاڭا وقۋ جىلىنىڭ باستالۋىمەن قۇتتىقتادى.
– وبلىسىمىزدا الداعى ۋاقىتتا «جايلى مەكتەپ» ۇلتتىق جوباسى اياسىندا 53 مەكتەپ سالۋ جوسپارلانىپ وتىر. سونداي-اق وڭىردە جەكە ينۆەستوردىڭ ەسەبىنەن 1 800 ورىندىق 2 مەكتەپ سالىنىپ جاتىر. بۇگىن پايدالانۋعا بەرىلگەن 1 500 ورىندىق جاڭا مەكتەپ بۇعان دەيىن ءۇش اۋىسىمدا جۇمىس ىستەپ كەلگەن تەرەشكوۆا, توقاتاەۆ, №1 راحات ورتا مەكتەپتەرىنىڭ پروبلەماسىن شەشىپ وتىر. مەكتەپ قۇرىلىسىن «BI Global» سەرىكتەستىگى جۇرگىزدى. ەندىگى كەزەكتە وسىنداي ءزاۋلىم مەكتەپتە وقيتىن بالالار ءبىزدى جاقسى جەتىستىكتەرىمەن قۋانتادى دەپ سەنەمىز, – دەدى ول.
جاڭادان سالىنعان مەكتەپ-ليتسەي وقۋشىلاردى تەك قازاق تىلىندە وقىتادى. ءبىلىم ورداسى سوڭعى ۇلگىدەگى تەحنولوگيامەن جابدىقتالعان 82 كابينەتتەن تۇرادى. سونداي-اق ليتسەيدە كىتاپحانا, ەكى سپورت زالى, ونىڭ ءبىرى 310 ورىندىق جىلجىمالى ەلەكتر پلاتفورماسى بار اكت زالىمەن بىرىكتىرىلگەن, ەكى كيىم ىلەتىن بولمە جانە ءۇش جۇزگە جۋىق بالا ءبىر مەزگىلدە تاماقتاناتىن اسحانا بار. نىسان ءۇش قاباتتان جانە ءۇش بلوكتان تۇرادى. وقۋ عيماراتىندا تالاپقا ساي شاعىن فۋتبول, باسكەتبول الاڭى مەن جۇگىرۋ جولى سالىنعان.
– وسى مەكتەپتىڭ سالىناتىنىن ەستىگەندە قۋانىپ, پايدالانۋعا بەرىلۋىن اسىعا كۇتتىك. سەبەبى بۇعان دەيىن بالالارىم ءۇش اۋىسىمدى مەكتەپتە وقىپ كەلدى. ەندى, مىنە, ساۋلەتتى دە كەڭ مەكتەپكە نەمەرەلەرىمدى اكەلىپ وتىرمىن. بەك قۋانىشتىمىز, – دەدى قالا تۇرعىنى ر.مالدىبايقىزى.
ەسىك قالاسىنداعى مەكتەپ-ليتسەيگە ءبىلىم كۇنى 570 بالا پارتاعا وتىرىپ, ساباقتارىن باستادى.
ءدال وسىنداي قۋانىشتى ءساتتى ىلە اۋدانى, بورالداي اۋىلىنداعى №54 ورتا مەكتەپتىڭ اشىلۋ سالتاناتىنا قاتىسقان تۇرعىندار دا باستان وتكەردى. 1 500 ورىندىق جاڭا مەكتەپ وسى ۋاقىتقا دەيىن ءۇش اۋىسىمدا جۇمىس ىستەگەن №17 ورتا مەكتەپتىڭ ماسەلەسىن تۇبەگەيلى شەشتى. بۇگىنگى تاڭدا اتالعان مەكتەپكە 1 200 وقۋشى قابىلدانىپ, 52 سىنىپ اشىلدى. مەكتەپ قۇرىلىسىن «BI Global» سەرىكتەستىگى جۇزەگە اسىردى.
بۇل كۇنى ىلە اۋدانىندا تاعى ەكى مەكتەپ – مەجدۋرەچەنسك اۋىلىنداعى 1 500 ورىندىق №55 ورتا مەكتەپ جانە كوكقاينار اۋىلىندا 1 500 ورىندىق №53 ورتا مەكتەپ وقۋشىلارعا ەسىگىن ايقارا اشتى. اتالعان مەكتەپتەر وقۋشىلاردى قازاق تىلىندە وقىتادى ءارى ەكى اۋىسىمدا جۇمىس ىستەيدى.
سونداي-اق بۇل كۇنى جامبىل اۋدانىنىڭ ۇزىناعاش اۋىلىندا 1 500 ورىندىق №1 مەكتەپ-ليتسەيى جۇمىسىن باستادى. قاسكەلەڭ قالاسىندا 1 500 ورىندىق مەكتەپ-گيمنازياسى, قاراساي اۋدانىنىڭ المالىباق جانە ىرگەلى ورتا مەكتەپتەرىنە قوسىمشا 600 ورىندىق جاپسارلاس عيماراتتار, قوناەۆ قالاسىندا 900 ورىندىق ورتا مەكتەپ پايدالانۋعا بەرىلدى. قالعان بەس مەكتەپتىڭ قۇرىلىسى جىل سوڭىنا دەيىن اياقتالادى دەپ كۇتىلىپ وتىر.
الماتى وبلىسى
