بۇقارانىڭ قۋانىشى ەسەلەنگەن بۇل كۇنى 26 ادام كوپبالالى وتباسىلار قاتارىنان, 35-ءى حالىقتىڭ الەۋمەتتىك جاعىنان ءالسىز توپتاعىلار بولسا, 20-سى جەتىم جانە اتا-انا قامقورلىعىنسىز قالعان بالا مەن 24-ءى مەملەكەتتىك قىزمەتكەر ساناتى بويىنشا پاتەرمەن قامتىلدى.
«پرەزيدەنتىمىز قاسىم-جومارت توقاەۆ حالىقتى قولجەتىمدى باسپانامەن قامتاماسىز ەتۋدى كۇن تارتىبىنەن تۇسىرگەن ەمەس. بۇگىن مەرەيلى مەرەكە قارساڭىندا «كاپسترويگرۋپپ-ت» جاۋاپكەرشىلىگى شەكتەۋلى سەرىكتەستىگى سالعان كوپقباتتى تۇرعىن ءۇي كەشەنىنىڭ پاتەرلەرى ءوز يەلەرىن تاپتى. جاڭا باسپانالارىڭىز جانعا جايلى بولىپ, ءوسىپ-وركەندەي بەرىڭىزدەر», دەگەن وبلىس اكىمىنىڭ ورىنباسارى نۇرجان قۇدايبەرگەنوۆ پەن ەڭبەكشىقازاق اۋدانىنىڭ اكىمى التاي دوسىمباەۆ تۇرعىن ءۇي كەشەنىنىڭ لەنتاسىن قيىپ, پاتەر كىلتتەرىن يەلەرىنە سالتاناتتى تۇردە تاپسىردى.
باسپانالى بولۋ باقىتىن سارىلا كۇتكەن تۇرعىنداردىڭ قۋانىشىندا شەك بولعان جوق. ء«وز ءۇيىم – ولەڭ توسەگىم» دەمەكشى, ءسانى مەن ساپاسى ۇيلەسىم تاپقان تۇرعىن ءۇيدىڭ تابالدىرىعىن اتتاعان ازاماتتاردىڭ العاشقى قادامدارىنا شاشۋ شاشىلىپ, اق تىلەكتەر اقتارىلدى.
تۇرعىن ءۇيدىڭ ينفراقۇرىلىمى تولىقتاي رەتكە كەلتىرىلگەن. جاسىل جەلەكپەن كومكەرىلىپ, جارىق تارتىلعان. اۋىز سۋدان دا تاپشىلىق بولمايدى. ەڭ ماڭىزدىسى, جىلۋ ماسەلەسى دە تولىق شەشىلگەن.
«بۇگىن وتباسىمىز ءۇشىن زور قۋانىش. 2012 جىلدان بەرى تۇرعىن ءۇيدىڭ كەزەگىندە تۇرىپ كەلەمىز. باسىمىزدا ءوزىمىزدىڭ باسپانامىز بولسا ەكەن دەپ ارمانداۋشى ەدىك. مىنە, بۇگىن تاۋەلسىز ەلدىڭ ازاماتى رەتىندە باسپانالى بولۋ قۇقىعىنا يە بولىپ, پاتەرىمىزدىڭ كىلتىن الدىق. ءتول مەرەكەمىز قۇتتى بولسىن», دەگەن جاڭا قونىس يەسى رۋسلان مۇسا ۇلى جۇرەكجاردى ريزاشىلىعىن ءبىلدىردى.
ءىس-شارا سوڭى تۇرعىنداردىڭ قونىستويىنا ۇلاستى.
الماتى وبلىسى
