جاپان تۇزگە بارىپ تۇرەن سالعانداردىڭ اراسىندا تاۋ-كەن ينجەنەرى جايلاۋباي سىناساپوۆتىڭ ەسىمى ايرىقشا اتالاتىن. ويتكەنى ول العاشقى ساتتەن باستاپ كەنىشتى پايدالانۋعا بەرگەنگە دەيىنگى بارلىق ءىستىڭ باسى-قاسىندا جۇرگەن ازامات ەدى.
ج.سىناساپوۆ ەڭبەك جولىن 1985 جىلى قاراعاندى پوليتەحنيكالىق ينستيتۋتىنىڭ جەزقازعان فيليالىن بىتىرگەن سوڭ, جەزقازعان شاحتوپروحودكالاۋ ترەسىندە تاۋ-كەن شەبەرى بولۋدان باستادى. كەيىن ىسىنە مىعىم, بىلىكتى مامان قىزمەت ساتىسىندا كوتەرىلىپ, بىرقاتار باسشىلىق لاۋازىمدا دا بولدى. II جانە III دارەجەلى «كەنشى داڭقى» توسبەلگىسىمەن ماراپاتتالدى. ءبىر عاجابى, ول قانداي لاۋازىمدا جۇرسە دە ءوزىن ەشقاشان قاتارداعى جۇمىسكەردەن جوعارى ۇستاعان جوق. مۇنى سول جۇمىسكەرلەر ءالى كۇنگە ايتادى. وكىنىشتىسى سول, ج.سىناساپوۆ 2013 جىلى ومىردەن وزىپ كەتتى.
«قاشان بولسىن ارامىزدا ءجۇردى, ءىستىڭ ىڭعايىن قالاي جۇرگىزسە دۇرىس بولاتىنىن اقىلداسىپ وتىرۋدان ارلانبادى, وزىمبىلەمدىككە سالىنبادى. بۇل كەز كەلگەن باسشىدا كەزدەسە بەرمەيتىن الابوتەن ەرەكشە قاسيەت ەدى. جۇمىسقا كەلگەندە ول ەڭ الدىمەن ارقايسىمىزدىڭ امان-ساۋلىعىمىزدى, وتباسىمىزدا نە بولىپ جاتقانىن سۇرايتىن», دەپ ول تۋرالى جانات نۇركەەۆ, جۇمابەك بايمۇحانوۆ, تالعات ىرىسپاەۆ ەسىمدى جۇمىسكەرلەردىڭ ەسكە العانىنا كۋا بولعانىمىز دا بار ەدى. جايلاۋباي سىناساپوۆتىڭ رۋحىنا دەگەن ارىپتەستەرىنىڭ كوڭىلى سول قالپىندا ساقتالىپ قالعانىنا جۋىردا تاعى ءبىر مارتە كوزىمىز جەتتى.
«جومارت» كەنىشىندە اشىلعان اللەياعا جايلاۋباي قۇلشان ۇلىنىڭ ەسىمى بەرىلىپ, ەسكەرتكىش تاقتا ورناتىلدى. ول ەڭبەك ەتكەن ترەست قازىر سوتسياليستىك ەڭبەك ەرى عازيز وماروۆتىڭ ەسىمىن يەلەنەدى, «ع.وماروۆ اتىنداعى شاحتوپروحودكالاۋ ترەسى» دەپ اتالادى. ال ءوزى باستان-اياق قۇرىلىسىن قولىمەن اتقارعان «جامان ايبات» كەنىشى دە اتاۋىن وزگەرتىپ, «جومارت» اتانعان بۇگىندە.
اللەيانىڭ اشىلۋ سالتاناتىنا جينالعاندار جايلاۋباي قۇلشان ۇلى تۋرالى تەبىرەنىسكە تولى ەستەلىك ايتتى.
«جايلاۋبايدىڭ جۇرەگىنىڭ اقتىعى ارقاشان سەزىلىپ تۇراتىن. ول كىسىدە وتىرىك ايتۋ, جالعان سويلەۋ دەگەن بولمايتىن. ايتسا, ايتقان سوزىندە تۇراتىن. سول سەبەپتى دە جۇمىسكەرلەر ونىڭ اينالاسىنا ۇيىرسەكتەپ, جانىنا جاقىن جۇرەتىن. ادەتتە باستىق كەلە جاتىر دەسە, كوزگە كورىنبەۋگە تىرىساتىنىمىز راس قوي. ال جاكەڭنىڭ ءجونى بولەك-ءتىن. جۇمىستان ءسال بوساعاندا ايتاتىن اڭگىمەسى قانداي ادەمى ەدى. ءازىل اڭگىمە ايتىپ, ءوزى دە ك ۇلىپ, وزگەنى دە كۇلدىرىپ دەگەندەي ءبىر راقاتتانىپ قالۋشى ەدىك. ونىڭ كۇلكىسى دە ەرەكشە بولاتىن. ول كۇلگەندە راقاتتانا كۇلەتىن, ال جۇمىستىڭ رەتى بولماي قالعاندا, بولماسا جۇمىسكەرلەردىڭ الدەبىر ماسەلەلەرى تۋىنداسا, بارىنشا مۇڭاياتىن. ول بىزگە سونىسىمەن قادىرلى ەدى», دەگەنگە توقايلاستى.
«ەڭبەگى باردى ەل ۇمىتپايدى» دەگەن وسى. ارينە, بۇل رەتتە كەشەگى ارىپتەستەرىنىڭ رۋحىن اسپەتتەي بىلگەن ع.وماروۆ اتىنداعى شاحتوپروحودكالاۋ ترەسى باسشىلىعىنىڭ كورەگەندىلىگىن ايتا كەتكەننىڭ دە ارتىعى جوق.
ۇلىتاۋ وبلىسى
