فوتو: جوباعا قاتىسۋشىلاردان
ەلىمىز بويىنشا العاش رەت قولعا الىنعان «قوناقجاي وتباسى» جوباسى اياسىندا قالا بالالارى كاتونقاراعاي اۋدانىنا قاراستى اۋىلدارعا بارىپ, 20 كۇن بويى تىلدىك ورتاعا ەنىپ, اۋىل تىرشىلىگىمەن تانىسقان.
وسكەمەن قالاسىندا وتكەن ءداستۇرلى تامىز كونفەرەنتسياسىندا جوبانىڭ قورىتىندىسى شىعارىلىپ, كەلەر جىلى قالاي جالعاساتىنى جايىندا ءسوز قوزعالدى.
«جوباعا 12-14 جاس ارالىعىنداعى 67 بالا قاتىستى. ولار اۋىل وتباسىلارىنىڭ ۇيلەرىندە تۇرىپ, ءتىل ۇيرەندى. ناتيجەلەرى وتە جاقسى. اۋىلداردا ارنايى شتاب تا جۇمىس ىستەدى, قۇرامىنا پوليتسەيلەر, پسيحولوگتار, مۇعالىمدەر ەندى. ال اتا-انالار ءۇشىن WhatsApp جەلىسىندە توپ قۇرىلىپ, كۇنىنە ەكى رەت ەسەپ جىبەرىلدى», دەدى شقو ءبىلىم باسقارماسىنىڭ باسشىسى يننەسا چەرنىشەۆا.
وبلىس اكىمى ەرمەك كوشەرباەۆ اتالعان جوبا كەلەسى جىلى كاتونقاراعايدا عانا ەمەس, وبلىستىڭ بارلىق اۋدانىندا ىسكە اسىرىلاتىنىن ايتتى. ءار اۋداننىڭ مۇمكىندىكتەرى, ەرەكشەلىكتەرى ەسكەرىلىپ, ۇستازدار قاۋىمى ۇسىنىس-تىلەكتەرىن بىلدىرە الادى.
«جاڭا جوبا كوپتىڭ كوڭىلىنەن شىقتى. ەلىمىزدىڭ باسقا ايماقتارىندا دا قىزىعۋشىلىق تۋدىرىپ وتىر, جوبانى ارى قاراي جالعاستىرۋىمىز قاجەت», دەدى اكىم.
