فورۋم جۇمىسىنا قاتىسقان اقپارات جانە قوعامدىق دامۋ ءمينيسترى دارحان قىدىرالى ازاماتتاردىڭ قوعامدىق بەلسەندىلىگىن ارتتىرۋعا باعىتتالعان «قوعامدىق باقىلاۋ تۋرالى», «ونلاين پەتيتسيا ينستيتۋتى تۋرالى» زاڭ جوبالارىنا كەڭىنەن توقتالىپ, قۇجاتتارعا ەنگىزىلگەن جاڭا وزگەرتۋلەر جايلى مالىمەت بەردى. مينيستر بۇل زاڭنامالىق نەگىزدەر ازاماتتىق قوعام ينستيتۋتتارىنىڭ حالىقتىڭ الەۋمەتتىك ماسەلەلەرىن شەشۋگە جانە قوعامدىق-ساياسي جۇيەنى جاڭعىرتۋعا مۇمكىندىك بەرەتىنىن باياندادى.
سونداي-اق ونىڭ ايتۋىنشا, شىمكەنت تۇرعىندارىنىڭ 32%-ى – جاستار, تيىسىنشە بۇل ءوڭىردى جاستار قالاسى دەۋگە تولىق نەگىز بار. «بۇگىندە بۇكىل ەل بويىنشا 232 جاستار رەسۋرستىق ورتالىعى بار, وندا 3 مىڭنان استام مامان جۇمىس ىستەيدى. جاستاردىڭ دامۋىنا جاعداي جاساۋ ماقساتىندا, جىل سوڭىنا دەيىن جاستار رەسۋرستىق ورتالىقتار بازاسىندا ءار وڭىردە «IT Hub» اشۋ جوسپاردا بار», دەپ اتاپ ءوتتى مينيستر.
«تاياۋدا «جاستار ساياساتى تۋرالى» زاڭ كۇشىنە ەنىپ, جاستار ساياساتىنىڭ تۇجىرىمداماسى ىسكە اسىرىلۋدا. العاش رەت «جاستاردىڭ دامۋ يندەكسى» ەنگىزىلدى. بۇل يندەكس اكىمدىكتەردىڭ جاستارمەن جۇمىسىن 7 باستى باعىت بويىنشا باعالاۋعا مۇمكىندىك بەرەدى. ولار – ءبىلىم, دەنساۋلىق, جۇمىسپەن قامتۋ, ازاماتتىق جانە ساياسي قاتىسۋى, بوس ۋاقىت وتكىزۋى جانە قاۋىپسىزدىك. ازاماتتىق قوعام ينستيتۋتتارىنىڭ ىشىندەگى ماڭىزدى توپتاردىڭ ءبىرى – قوعامدىق كەڭەستەر. قازىر ەلىمىزدە 258 قوعامدىق كەڭەستىڭ قۇرامىندا 4 مىڭنان استام بەلسەندى ازامات ءوز مىندەتتەرىن ابىرويمەن اتقارۋدا. مەملەكەت باسشىسىنىڭ سايلاۋالدى باعدارلاماسىندا بەرىلگەن تاپسىرما بويىنشا وسى جىلدىڭ سوڭىنا دەيىن قوعامدىق كەڭەستەردە جاستار كۆوتاسىن 10 پايىزعا جەتكىزۋ قاجەت. قازىر رەسپۋبليكالىق كورسەتكىش – 9 پايىز», دەدى د.قىدىرالى.
ءوز كەزەگىندە سالا باسشىسى ينكليۋزيۆتى قوعام قۇرۋ باعىتىنداعى ۇكىمەتتىك ەمەس ۇيىمداردىڭ سانى ارتا تۇسكەنىن, وسى جانە باسقا دا ازاماتتىق قوعام ينستيتۋتتارى تۇرعىنداردىڭ الەۋمەتتىك پروبلەمالارىن شەشۋدە جانە قوعامدىق-ساياسي ۇدەرىستەردى جاڭعىرتۋدا ماڭىزدى قۇرالعا اينالعانىن جەتكىزدى.
مينيستر ۇكىمەتتىك ەمەس ۇيىمدار ەلدىڭ الەۋمەتتىك ماسەلەسىن شەشۋگە زور كومەگىن بەرەتىنىن سول ارقىلى قوعام ىزگىلىك پەن قايىرىمدىلىققا تولاتىنىن ايتا كەلە, «شىرايلى ولكەنىڭ داڭقتى پەرزەنتى, وتىراردان شىعىپ, اتى الەمگە جايىلعان ءال-فارابي بابامىزدىڭ ايگىلى ەڭبەگىندە قايىرىمدى قوعام, پاراساتتى قالا تۋرالى وي تولعاعانى بەلگىلى. قايىرىمدى قالا قايىرىمدى قوعامنان باستالادى. سوندىقتان ىزگىلىك پەن مەيىرىم, پاراسات پەن پەيىل سالتانات قۇراتىن ابزال قوعام ءبىزدىڭ بابا تانىمىنىڭ تامىرىنان باستاۋ الادى», دەپ ءسوزىن قورىتىلادى مينيستر.
شىمكەنت قالاسىنىڭ اكىمى مۇرات ايتەنوۆ پرەزيدەنت تاپسىرماسى اياسىندا قازىرگى تاڭدا قالادا ازاماتتىق قوعام ينستيتۋتتارىنىڭ اتقاراتىن قىزمەت اياسى كەڭەيە تۇسكەنىن, سونىڭ ناتيجەسىندە شاھار اۋماعىندا 550-دەن استام ۇكىمەتتىك ەمەس ۇيىم تىركەلىپ, جۇمىس اتقارىپ جاتقانىن, ال اكىمدىك تاراپىنان وسى ۇيىمداردىڭ دامۋىنا, ولاردىڭ قالىپتاسۋىنا تۇراقتى تۇردە قولداۋ كورسەتىلىپ كەلەتىنىن ايتتى.
«ازاماتتىق قوعام – بۇل قاراپايىم حالىق, ءبىز بەن ءسىز جانە قوعامدا وزىندىك ورنى بار ۇكىمەتتىك ەمەس ۇيىمدار. ال ۇكىمەتتىك ەمەس ۇيىمداردىڭ مەملەكەتتىڭ دامۋىندا ىقپالى وراسان زور. جالپى, بيلىك قاشان دا حالىقتىڭ ۇنىنە قۇلاق اسسا, وندا قوعامدا ءوزارا تۇسىنىستىك ورنايدى, باستى قۇندىلىعىمىز – ىنتىماق, بىرلىگىمىز ارتا تۇسەدى», دەدى قالا اكىمى.
ال قازاقستاننىڭ ازاماتتىق اليانسى پرەزيدەنتى بانۋ نۇرعازيەۆا مىقتى مەملەكەت بولۋ ءۇشىن كۇشتى ازاماتتىق قوعام قاجەت ەكەنىن العا تارتتى. كەز كەلگەن دامىعان ەلدە ازاماتتىق قوعام جۇيەلى جۇمىس اتقاراتىنىن اتاپ وتكەن سپيكەر اتقارۋشى بيلىك پەن ۇكىمەتتىك ەمەس ۇيىمداردى ءبىر-بىرىنە سەرىكتەس بولۋعا شاقىردى. سونىمەن بىرگە 2005 جىلى قابىلدانعان الەۋمەتتىك تاپسىرىستار تۋرالى زاڭ بويىنشا اكىمدىك, مينيسترلىكتەر جانىندا ۇكىمەتتىك ەمەس ۇيىمدارمەن ءوزارا قارىم-قاتىناسقا نەگىزدەلگەن كەڭەستەر بولۋ قاجەتتىگىن اتاپ ءوتتى. اليانس پرەزيدەنتىنىڭ ايتۋىنشا, ەگەر الەۋمەتتىك ماسەلەمەن شۇعىلداناتىن ۇكىمەتتىك ەمەس ۇيىمدارعا مەملەكەت قارجىلاي قولداۋ بىلدىرمەسە, ولاردىڭ جوبالارىنا قاراجات شەتەلدەن كەلۋى مۇمكىن. «ال بۇل ءوز ەلىمىزدە تۇرىپ, كومەك الا الماۋ بارشامىزعا سىن», دەدى ب.نۇرعازيەۆا.
سونداي-اق جيىندا بايانداماشىلار تاراپىنان جاستار رەسۋرستىق ورتالىقتاردىڭ ءرولىن كۇشەيتۋ تۋرالى ماسەلە كوتەرىلدى. بۇل ماقساتتى جۇزەگە اسىرۋ ءۇشىن وندا ىستەيتىن مامانداردىڭ ايلىق جالاقىسىن كوبەيتۋ كەرەكتىگى ايتىلدى.
فورۋم اياسىندا اقپارات جانە قوعامدىق دامۋ ءمينيسترى دارحان قىدىرالى ءبىر توپ ۇكىمەتتىك ەمەس ۇيىم جەتەكشىسىن وسى سالاداعى جەمىستى ەڭبەگى ءۇشىن ماقتاۋقاعازىمەن ماراپاتتادى.
شىمكەنت
