ءبىر دوپ ايىرماشىلىعى جەتەر مە ەكەن؟
كەيىنگى جىلدارى ەۋروكۋبوك ويىندارىنا تۇراقتى قاتىسا باستاعان «توبىل» مەن «دەرري سيتي» وسى ءتۋرنيردىڭ ەكىنشى كەزەڭىندە ۇلكەن سەنساتسيا جاساپ, جارىستىڭ ءۇشىنشى اينالىمىنا جولداما الدى. قوستانايلىق ۇجىم ەكىنشى كەزەڭدە شۆەيتساريانىڭ اتاقتى «بازەل» كومانداسىن ەكى ويىننىڭ قورىتىندىسى بويىنشا 4:3 ەسەبىمەن جارىس جولىنان ىعىستىرسا, «دەرري سيتي» ءبىزدىڭ جانكۇيەرلەرگە جاقسى تانىس فينليانديانىڭ كۋپس كلۋبىنان باسىم ءتۇستى. ءوز الاڭىنداعى ءبىرىنشى ويىندا 2:1 ەسەبىمەن جەڭىسكە جەتسە, سىرت الاڭداعى كەزدەسۋدە 3:3 ناتيجەسىمەن تەڭ وينادى. ەستەرىڭىزدە بولسا, 2021-22 جىلعى كونفەرەنتسيا ليگاسىنىڭ ءۇشىنشى كەزەڭىندە كۋپس ەلوردانىڭ «استانا» كومانداسىن ەكى ويىندا 5:4 (1:1, 4:3) ەسەبىمەن تىزە بۇكتىرگەن ەدى.
وسىلايشا, فۋتبول ماماندارىنىڭ نازارىن وزدەرىنە اۋدارعان ەكى كلۋب اراسىنداعى ويىن كوپشىلىك كۇتكەندەي تارتىستى ءوتتى. ءبىرىنشى تايمنىڭ العاشقى بولىگىندە قوناق كوماندانىڭ ءىرى دەنەلى فۋتبولشىلارى ءبىزدىڭ قاقپاعا جارىتىپ شابۋىل ۇيىمداستىرماسا دا, «توبىل» ويىنشىلارىن ءجيى ءتارتىپ بۇزۋعا يتەرمەلەۋمەن بولدى. يرلانديالىقتاردىڭ دورەكى ويىنىنا ءبىزدىڭ جىگىتتەر دە ءدال سولاي جاۋاپ بەرەمىز دەپ تورەشى تاراپىنان ەسكەرتۋ الىپ قالدى. العاشقى 45 مينۋتتىڭ ىشىندە ءۇش فۋتبولشىمىز «سارى قاعازبەن» جازالاندى. ماتچ الدىنداعى ءباسپاسوز كونفەرەنتسياسىندا «توبىلدىڭ» باس باپكەرى ميليچ چۋرچيچ ءدال وسى جاعدايدى ەسكەرىپ, يرلانديالىق فۋتبولشىلاردىڭ ايلاسىنا ءتۇسىپ قالماۋ ماڭىزدى ەكەنىن, ءبىز ءوز ويىنىمىزدى, ولار ءوز ويىندارىن ويناۋى كەرەك دەپ ايتقان ەدى. بىراق «توبىل» فۋتبولشىلارى كوپ جاعدايدا «دەرري ءسيتيدىڭ» قۇرىعىنا ءتۇسىپ قالا بەردى.
ەكىنشى تايمدا ويىن قارقىنى ءبىرشاما باسەڭدەگەنىمەن, قوستانايلىقتاردىڭ شابۋىلى ءبىرىنشى تايمعا قاراعاندا, وتكىر بولا باستادى. بالكىم, ءۇزىلىس ۋاقىتىندا چۋرچيچ شاكىرتتەرىنە شابۋىلدى اياقتاۋ كەزىندەگى قاتەلىكتەرىن ەسكەرتكەن بولار. ماسەلەن, ەكىنشى 45 مينۋتتا «توبىل» فۋتبولشىلارى قارسىلاستاردىڭ قاقپاسىنا ءتورت سوققى جاساسا, سونىڭ ۇشەۋى قاقپاعا ءدال باعىتتالدى. ونىڭ بىرەۋىن گولعا اينالدىرا الدى. ويىننىڭ 65-مينۋتىندا «توبىل» كلۋبىنىڭ تاربيەلەنۋشىسى ءارى قورعاۋشىسى رومان اسرانقۇلوۆ سول قاپتالدان يرلانديالىقتاردىڭ قورعانىسىن بۇزىپ-جارىپ, سول اياعىمەن ادەمى گول سوقتى. «دەرري ءسيتيدىڭ» قاقپاشىسى دا, قورعاۋشىلارى دا بۇل سوققىنىڭ الدىندا دارمەنسىزدىك تانىتتى. ءسويتىپ, 90 مينۋت بويى «توبىلدىڭ» شابۋىلشىلارى سوعا الماعان گولدى قورعاۋشى سوعىپ, العاشقى ويىندا كومانداسىنا باسىمدىق سىيلادى – 1:0.
ەندى ەكى ۇجىم اراسىنداعى قارىمتا ماتچ 17 تامىز كۇنى سولتۇستىك يرلانديادا وتەدى. «دەرري ءسيتيدىڭ» ەۋروكۋبوكتاعى بيىلعى ويىندارىنىڭ ستاتيستيكاسىنا قارايتىن بولساق, ولار سىرت الاڭداعى كەزدەسۋلەرگە قاراعاندا, ءوز جەرىندەگى ماتچتاردا ءتاۋىر وينايدى ەكەن. كونفەرەنتسيا ليگاسىنىڭ العاشقى ەكى ىرىكتەۋ كەزەڭىنىڭ ءوز الاڭىندا وتكەن ەكى ويىنىندا دا ولار قارسىلاستارىنان باسىم تۇسكەن. دەگەنمەن «توبىل» دا سىرت الاڭدا ءتاۋىر وينايتىنىن وتكەن ماتچتا كورسەتتى. سوندىقتان قارىمتا كەزدەسۋدە ءبىزدى قىزىقتى ماتچ كۇتىپ تۇر.
سىرت الاڭداعى تەڭ ويىن ءۇمىت سىيلايدى
رۋمىنيادا ماتچ وتكىزگەن «اقتوبە» كلۋبى العاشقى ويىندا قولدا تۇرعان جەڭىسىنەن ايىرىلىپ قالدى. دەگەنمەن ءبىرىنشى ماتچتىڭ سىرت الاڭدا وتكەنىن ەسكەرسەك, ءوز الاڭىندا جەڭىسكە جەتۋدىڭ مۇمكىندىگى كوبىرەك. 8 400 جانكۇيەرگە ارناپ سالىنعان سفىنتۋ-گەورگە قالاسىنداعى «سەپسي ارەنا» ستاديونىنداعى ماتچتا ەكى ۇجىم دا ءاۋ باستان تەڭ ناتيجەنى كوزدەگەن سياقتى.
ويتكەنى ەكى كلۋب تا ماتچ بويى جارىتىپ شابۋىل ۇيىمداستىرعان جوق. تەك كەزدەسۋدىڭ سوڭىندا عانا الاڭ قوجايىندارى ەسەپتى تەڭەستىرگەن سوڭ شابۋىلدارىن ۇدەتە ءتۇستى. ال ءبىرىنشى تايمدا ەكى كلۋب فۋتبولشىلارى تەك ءبىر-ءبىر مارتە عانا قاۋىپتى جاعدايمەن كوزگە ءتۇستى. ويىننىڭ 15-مينۋتىندا ماريۋش ستەفانەسكۋدىڭ قاقپاعا ەنىپ بارا جاتقان دوپتى ستاس پوكاتيلوۆ قولىمەن قاقشىپ جىبەرسە, 28-مينۋتتاعى ماكسيم سامورودوۆتىڭ الىس بۇرىشقا تەپكەن دوبىن «سەپسي» قاقپاشىسى قايتاردى. ءبىرىنشى تايمدا بۇدان باسقا اۋىز تولتىرىپ ايتارلىقتاي شابۋىل بولعان جوق.
ەكىنشى تايمنىڭ باسىندا الاڭ قوجايىندارى ويىن تىزگىنىن ءوز قولدارىنا الۋعا تىرىسىپ, دوپتى ءجيى باقىلاۋىندا ۇستاي باستادى. كەزدەسۋدىڭ 55-مينۋتىندا ستەفانەسكۋ تاعى دا «اقتوبە» قاقپاسىنا قاراي باعىتتاعان جويقىن سوققىسىمەن كوزگە ءتۇستى. ابىروي بولعاندا ستاس پوكاتيلوۆ ءوز ورنىنان تابىلىپ, قاۋىپتىڭ بەتىن قايتاردى. ارادا 10 مينۋت وتكەندە جەرلەستەرىمىز بۇل شابۋىلدىڭ قارىمتاسىن قايتارىپ قانا قويماي, «سەپسي» قاقپاسىنا گول سوعىپ, ويىننىڭ ەسەبىن اشتى. 65-مينۋتتا ماكسيم سامورودوۆتىڭ بۇرىشتامادان اۋەلەتە كوتەرگەن دوبىنا ءبىرىنشى ەلدەر سانتانا جەتىپ, باسىمەن قاقپاعا ءدال سوققى جاسادى – 1:0.
گول وتكىزىپ العان سوڭ الاڭ قوجايىندارى ەسەپتى تەڭەستىرۋ ءۇشىن بار كۇش-جىگەرىمەن العا قاراي ۇمتىلىپ, «اقتوبە» قورعاۋشىلارى مەن قاقپاشىسىن قيىن جاعدايعا سالىپ قويدى. «سەپسي» فۋتبولشىلارىنىڭ دۇركىن-دۇركىن شابۋىلى ماتچ سوڭىندا عانا ءوز ناتيجەسىن بەردى. ويىننىڭ 89-مينۋتىندا رولاند ۆارگانىڭ ايىپ الاڭى ىشىندە قاقپانىڭ سول جاق بۇرىشىنا قاراي تەپكەن دوبى جول-جونەكەي ءبىر ويىنشىمىزعا ءتيىپ, قاقپانىڭ وڭ جاق بۇرىشىنىڭ تورىنان تابىلدى – 1:1. تارازى باسى تەڭەسكەننەن كەيىن «سەپسي» جەڭىس گولىن سوعۋعا ۇمتىلدى. الايدا جەرلەستەرىمىز قورعانىستا ساۋاتتى ويناپ, الاڭ يەلەرىنە ەكىنشى گولدارىن سوعۋعا مۇمكىندىك بەرمەدى.
ەكى ۇجىم اراسىنداعى قارىمتا ويىن 17 تامىز كۇنى اقتوبەدەگى قوبىلاندى باتىر اتىنداعى ورتالىق ستاديوندا وتەدى.
