شىمكەنتتە جىلدا جازدىڭ كۇندەرى كۇن قاتتى ىستىق بولادى. ەلدىڭ وڭتۇستىگىندەگى شاھار تۇرعىندارى ءۇشىن بۇل قۇبىلىس توسىن جاعداي ەمەس, ارينە. دەگەنمەن قۇرعاقشىلىقتىڭ سالدارى قالاعا دا كەرى اسەرىن تيگىزىپ ۇلگەرگەن-ءدى. سونىڭ كەسىرىنەن مەگاپوليستىڭ اسەم دە كورىكتى جەرلەرىنىڭ ءبىرى ا.اسقاروۆ اتىنداعى دەندرولوگيالىق ساياباقتىڭ ىشىندەگى اعاش-تالدار سارعايىپ, قۋراي باستاعان ەدى. ءتىپتى وتكەن جىلى كۇننىڭ ىستىعىنان قايتا-قايتا ءورت شىعىپ, توتەنشە جاعداي ورىن العان. ابىروي بولعاندا قىزىل جالىندى ماماندار, ساياباق قىزمەتكەرلەرى جابىلىپ ءجۇرىپ ءسوندىرىپ وتىردى. دەندروساياباققا كەلەتىن اعىن سۋ مولشەرى دە ازايىپ كەتكەندىكتەن, ءتيىستى باسقارما وكىلدەرى تىعىرىقتان شىعار جولدى ىزدەپ, سيرەك كەزدەسەتىن اعاش-تالداردى قۋراتىپ الماۋدىڭ الدىن الۋ ءۇشىن سۋ تاسىعىش كولىكتەردى جالداپ, كوك جەلەكتى قولمەن سۋاردى.
دەندروساياباق – شاھاردىڭ ەڭ سۇيىكتى تىنىعۋ ايماعى. كۇننىڭ اپتاپ ىستىعىندا قالا تۇرعىندارى دا, قوناقتار دا وسىندا كەلىپ, سەرۋەندەپ, تال كولەڭكەسىن سايالايدى. كەزىندە وبلىستى باسقارعان مەملەكەت جانە قوعام قايراتكەرى اسانباي اسقاروۆتىڭ باستاماسىمەن سالىنعان دەندروساياباقتى جاسىل جەلەگىمەن اينالانى كومكەرىپ تۇرعان قالانىڭ ناعىز «وكپەسى» دەۋگە بولادى. سونىمەن بىرگە كۇن سايىن تاڭەرتەڭ دەنساۋلىعىنا بەيجاي قارامايتىن شىمكەنتتىكتەر كارى-جاسىنا قاراماي ساياباقتا دەنە شىنىقتىرۋمەن اينالىسادى. گيمناستيكا مەن ءارتۇرلى سپورتتىق جاتتىعۋ جاسايدى. ونىڭ ىشىندە سكانديناۆيالىق ءجۇرۋ ءتاسىلى بار. وسىدان ءبىراز ۋاقىت بۇرىن دەندروساياباققا اۋقىمدى قۇرىلىس جۇمىستارى جۇرگىزىلىپ, ءىشى ءبىراز اباتتاندىرىلىپ, كوركەيتىلگەن بولاتىن. سونىڭ اياسىندا زاماناۋي ۆەلوسيپەد جولاعى سالىنىپ, ورىندىقتار جاڭالاندى, كوپ جەرلەرگە ديودتى جارىقشامدار ورناتىلدى. اسىرەسە بۇل وسىمدىك الەمىنە قىزىعاتىن جاس عالىمدار مەن مەكتەپ وقۋشىلارىنىڭ جانە جوعارى وقۋ ورىندارىنىڭ ستۋدەنتتەرى ءۇشىن زەرتتەۋ جۇمىستارىن جۇرگىزۋىنە تاپتىرماس ورىن سانالادى. ويتكەنى مۇندا الەمنىڭ ءتورت بۇرىشىندا وسەتىن جانە سيرەك كەزدەسەتىن تالدار وسەدى. ال ولاردى شەتەلدەردەن اكەلىپ, ەلىمىزدىڭ وڭتۇستىك وڭىرىندە جەرسىندىرۋگە وتاندىق عالىمدار كوپ ەڭبەك سىڭىرگەنىن ۇمىتپاعان ءلازىم.
مىنە, وسىنداي قازىنالى مەكەندى باستاپقى كۇيىندەي ساقتاپ قالۋ قالا اكىمدىگىنىڭ الدىندا تۇرعان باستى مىندەتكە اينالدى. ءسويتىپ, ءبىرىنشى كەزەكتە شاھاردىڭ يرريگاتسيالىق جۇيەلەرىن قالپىنا كەلتىرۋگە كىرىستى. سوناۋ بادام سۋ قويماسىنان تىكەلەي دەندروساياباققا اعىپ كەلەتىن ۇزىندىعى 23 شاقىرىمدىق ۇلكەن كانالدى جوندەپ, قالپىنا كەلتىردى. سونىڭ ناتيجەسىندە بيىل ساياباق ىشىندەگى جاپ-جاسىل كول سۋىنىڭ دەڭگەيى تومەن تارتىپ, ازايىپ قالمادى. بارىنەن بۇرىن ايدىن كولدىڭ بەتىندە جۇزگەن قوس اققۋلارعا راقات بولدى. ادامدار دا ءار كەلگەن سايىن ماحاباتتىڭ سيمۆولى سىڭسىعان اققۋلاردى كورىپ قۋانىپ, تۇلا-بويدى بيلەگەن نازىك سەزىمنىڭ شىرماۋىندا قالادى. بۇدان بولەك, اكىمدىكتىڭ قولعا العان جۇمىستارى ارقىلى ساياباق ىشىنەن 4 ۇڭعىما قازىلدى. تۋعان قالاسى شىمكەنتكە جانى اشيتىن قالتالى ازاماتتار دا وسى ارادان تابىلىپ جاتتى. وسىنداي دەمەۋشىلەردىڭ ەسەبىنەن سۋارۋ جۇمىستارىنا 4 تەحنيكا جۇمىلدىرىلدى. ولارعا قوسىمشا 20 ادام كومەككە كەلىپ, قول جاردەمىن بەردى.
ا.اسقاروۆ اتىنداعى شىمكەنت دەندرولوگيالىق ساياباعى قالالىق جايلى ورتانى دامىتۋ باسقارماسىنا قارايدى. اتالعان مەكەمە ماماندارىنىڭ مالىمدەۋىنشە, بۇگىنگى تاڭدا ءبىر سۋ ۇڭعىماسى ىسكە قوسىلىپ, ساياباقتىڭ تۇلپار ايماعىنداعى نۋ اعاشتار سۋارىلىپ جاتىر. الداعى كۇندەرى ساياباق اۋماعىنان قازىلعان تاعى 2 ۇڭعىما پايدالانۋعا بەرىلەدى دەپ وتىر. ال دەندروساياباقتاعى عىلىمي قىزمەتكەرلەر ورمان اعاشتارىنىڭ سايالى بولىپ جايقالىپ وسۋىنە بار جاعدايدى جاساپ وتىر. ول ءۇشىن قالالىق اكىمدىك ماماندارعا قاجەتتى بارلىق مۇمكىندىكتى قاراستىرىپ بەرىپ جاتىر. وسىلايشا, ەرەكشە قورعالاتىن تابيعي ايماق مەگاپوليس تۇرعىندارى مەن قوناقتارىنىڭ يگىلىگى ءۇشىن ءاردايىم قىزمەت ەتە بەرمەك.
