كاسىپقوي بوكستاعى العاشقى ايقاسىن 2016 جىلى وتكىزسە دە, 2018 جىلدان باستاپ اتالعان سپورت تۇرىنە دەن قويعان وتانداسىمىز وتكەن جىلى WBO نۇسقاسى بويىنشا ورتا سالماقتاعى (72,6 كگ) الەم چەمپيونى اتاعىن جەكپە-جەكسىز جەڭىپ العان بولاتىن. 2021 جىلعا دەيىن WBO بەلبەۋىن يەلەنىپ كەلگەن امەريكالىق دەمەتريۋس اندرادە 2021 جىلدىڭ سوڭىندا چەمپيوندىق اتاققا مىندەتتى ۇمىتكەر بولعان جانىبەك الىمحان ۇلىمەن جەكپە-جەككە شىعۋدان جانە بەلبەۋىن قورعاۋدان بىرنەشە رەت باس تارتتى. اقىر سوڭىندا اندرادە سۋپەر ورتا سالماققا اۋىساتىنىن ايتىپ, دۇنيەجۇزىلىك بوكس ۇيىمىنىڭ چەمپيوندىعىنان باس تارتاتىنىن جاريالادى. ءسويتىپ, بۇل بەلبەۋ ەشقانداي ايقاسسىز وتانداسىمىزدىڭ يىعىنان تابىلدى.
وسىدان كەيىن جانىبەك 2022 جىلدىڭ كۇزىندە بريتاندىق بوكسشى دەنزەل بەنتليمەن بەتپە-بەت كەلىپ, العاش رەت مىندەتتى الەم چەمپيونى اتاعىن ءساتتى قورعادى. 12 راۋندقا جوسپارلانعان جەكپە-جەكتى ەكى بوكسشى تولىق جۇدىرىقتاسىپ شىعىپ, تورەشىلەردىڭ ءبىراۋىزدان قابىلداعان شەشىمىمەن جانىبەك ءالىمحان ۇلى جەڭىمپاز دەپ تانىلدى. كەيىننەن وتانداسىمىز وسى جىلدىڭ مامىر ايىندا WBO بەلبەۋىن ەكىنشى مارتە قورعادى. بۇل جولى ول 2017 جىلى گەننادي گولوۆكين مەن ساۋل الۆارەس اراسىنداعى العاشقى جەكپە-جەكتىڭ الدىندا «كانەلونىڭ» سپاررينگ-سەرىكتەسى بولعان كانادالىق ستيۆەن باتلەرمەن قولعاپ ءتۇيىستىردى.
اقش-تىڭ ستوكتون قالاسىندا وتكەن بوكس كەشى دە 12 راۋندقا بەلگىلەنگەنىمەن, جەكپە-جەك ۇزاققا سوزىلمادى. بارلىق ماسەلە ەكىنشى راۋندتا شەشىلدى. ءالىمحان ۇلى اۋەلى قارسىلاسىن ەكى رەت نوكداۋنعا جىبەرىپ, كەيىننەن قارسىلاسىن اپپەركوت سوققىسىمەن تاعى ءبىر ەسەڭگىرەتىپ الدى دا, سول قولىمەن قۇلاقشەكەدەن ۇردى. نوكاۋت! وسىلايشا, ءالىمحان ۇلى ءوزىنىڭ سپورتتىق مانسابىنداعى 14-جەڭىسىن تويلاپ, چەمپيوندىق اتاعىن ەكىنشى مارتە ءساتتى قورعادى.
30 جاستاعى بريتانيالىق جەڭىلمەگەن بوكسشى فەليكس كەش وسى جىلدىڭ العاشقى توقسانىندا امەريكالىق وستين ۋيليامسپەن ورتا سالماقتاعى WBA بەلبەۋىنە مىندەتتى ۇمىتكەر اتانۋى ءۇشىن جەكپە-جەك وتكىزۋگە ءتيىس ەدى. الايدا سول كەزدە WBA چەمپيونى بولىپ تۇرعان گەننادي گولوۆكين بەلبەۋدەن باس تارتاتىنىن مالىمدەگەن سوڭ, ەكى بوكسشىنىڭ پروموۋتەرلەرى بۇل ايقاستى ۇيىمداستىرۋعا اسا نيەتتى بولا قويمادى. ويتكەنى ەسىمدەرى بوكس جانكۇيەرلەرىنە ەندى تانىلىپ كەلە جاتقان ۇمىتكەرلەر اراسىندا جەڭىسكە جەتكەن ەكى بوكسشىنىڭ ءبىرى GGG-مەن شارشى الاڭدا كەزدەسۋگە ءتيىس ەدى. ال بۇل ءوز كەزەگىندە جەڭىمپاز اتانعان بوكسشى ءۇشىن اجەپتاۋىر تانىمالدىققا يە بولاتىن ورايلى ءسات بولاتىن. ءسويتىپ, ەكى پروموۋتەردىڭ دە, بوكسشىلاردىڭ دا جوسپارلارى ىسكە اسپاي قالدى.
«كەش ۋيليامس ۇتىمدى ۇسىنىستان باس تارتپايدى دەپ ويلايمىن. ويتكەنى ول ماعان ۇنەمى ۇزدىكتەرمەن جۇدىرىقتاسۋعا دايىن ەكەنىن ايتىپ كەلەدى. سونداي-اق وعان ۇلكەن جەكپە-جەكتەر وتكىزەتىن ۋاقىت كەلدى دەپ ەسەپتەيمىن. قازىرگى تاڭدا ءبىزدىڭ قولىمىزدا الەم چەمپيونى جانىبەك الىمحان ۇلىمەن جۇدىرىقتاسۋ تۋرالى ۇسىنىس حات بار. ناقتى شەشىمدى جاقىن ارادا قابىلدايمىز», دەدى ەددي حيرن.
بريتانيالىق بوكسشى دا ءجانى-
بەكتىڭ ۇسىنىسىنا كەت ءارى ەمەس سەكىلدى. ەگەر ەكى تاراپ ورتاق مامىلەگە كەلسە, جەر-جاھاننىڭ جانكۇيەرلەرىن الدا تاعى ءبىر قىزىقتى ايقاس كۇتىپ تۇر دەۋگە بولادى. كەش ۋيليامس ءوزىنىڭ الەۋمەتتىك جەلىدەگى پاراقشاسىندا وسى جەكپە-جەككە قاتىستى ارنايى پوست جازدى. «ەگەر جانىبەك ءالىمحان ۇلى مەنىمەن جۇدىرىقتاسقىسى كەلسە, مەن قارسى ەمەسپىن. ەددي حيرن, بۇل جەكپە-جەكتى ۇيىمداستىرايىق», دەيدى ول.
1993 جىلى انگليانىڭ چەرتسي قالاسىندا دۇنيەگە كەلگەن كەش ۋيليامس كاسىپقوي بوكس شارشى الاڭىندا 2016 جىلدان بەرى جۇدىرىقتاسىپ كەلەدى. ول ءوزىنىڭ كاسىبي مانسابىنداعى دەبيۋتتىك ايقاسىن 2016 جىلدىڭ 25 ماۋسىمىندا ەنتوني دجوشۋا مەن دومينيك بريزيل اراسىنداعى بوكس كەشىنىڭ اندەركاردىندا وتكىزىپ, يايلتون نەۆەستى ۇپاي سانىمەن قاپى قالدىردى.
سونداي-اق بريتانيالىق بوكسشى العاشقى 9 جەكپە-جەگىنىڭ التاۋىندا مەرزىمىنەن بۇرىن جەڭىسكە جەتىپ, ءا دەگەننەن بوكس ماماندارىنىڭ نازارىن وزىنە اۋداردى. 2018 جىلى ول كاسىپقوي بوكستاعى العاشقى بەلبەۋىنە دە قول جەتكىزىپ, چەمپيوندىق اتاقتىڭ ءتاتتى ءدامىن تاتتى. لوندونداعى Copper Box Arena سپورت كەشەنىندە وتكەن بوكس كەشىندە ول نيدەرلاندتىق ستيۆەن دانونى دا ۇپاي سانىمەن ۇتىپ, WBC International Silver ورتا سالماقتاعى الەم چەمپيونى اتاعىن يەلەندى. كاسىپقوي بوكستا جۇرگەن وتانداستارىمىزدىڭ جەكپە-جەكتەرىن ۇنەمى باقىلاپ, نازاردان تىس قالدىرماي جۇرەتىن جانكۇيەرلەردىڭ ەسىندە بولسا, 2021 جىلدىڭ باسىندا ورتا سالماقتا جۇدىرىقتاساتىن تاعى ءبىر جەرلەسىمىز سادريددين احمەدوۆ ءدال وسى ستيۆەن دانومەن مەكسيكا شارشى الاڭىندا جۇدىرىقتاسىپ, تورەشىلەر شەشىمىمەن جەڭىسكە جەتكەن بولاتىن.
سونداي-اق كەش ۋيليامس 2021 جىلدىڭ ءساۋىر ايىندا جانىبەكتىڭ بۇعان دەيىنگى قارسىلاسى دەنزەل بەنتليمەن دە كەزدەسىپ, ونى ءۇشىنشى راۋندتا-اق سۇلاتىپ سالعان ەدى. كەش ەڭ كەيىنگى ايقاسىن وتكەن جىلدىڭ جەلتوقسان ايىندا پورتۋگاليالىق سەلسو نەۆەسپەن (9-4-2, 2 كو) وتكىزىپ, ۇپاي سانىمەن جەڭىسكە جەتكەن. مىنە, بريتانيالىق بوكسشىنىڭ ازىرگە كاسىپقوي بوكستاعى بار تابىسى وسى عانا.
