«ەلىمىز ءۇشىن ستراتەگيالىق ماڭىزى بار تاعى ءبىر ماسەلە – شەكارالاس ايماقتاردى دامىتۋ. جەر – باستى بايلىعىمىز. تۋىڭدى تىگەر توقىمداي جەرىڭ بولماسا, ءوز مەملەكەتىڭ دە بولمايدى. بابالارىمىز بىزگە ۇلان-عايىر اۋماقتى ميراس ەتتى. ونى شاشاۋ شىعارماي ساقتاپ, كوركەيتۋ – ءبىزدىڭ قاسيەتتى بورىشىمىز. وسى ورايدا, «جەرىمىز شەتەلدىكتەرگە ساتىلىپ جاتىر» دەگەن ءسوز ارا-تۇرا ايتىلىپ جاتادى. بۇل – جالعان اقپارات. ەلىمىزدە جەرگە قاتىستى تۇبەگەيلى شەشىم الدەقاشان قابىلدانعان. ول شەشىم زاڭمەن ءبىرجولا بەكىتىلگەن. ءتۇرلى داقپىرتقا سەنىپ, جۇرتتى دۇرلىكتىرەتىن جالعان اقپارات تاراتۋدى دوعارۋ كەرەك. ءبىز بابالار اماناتىنا ءاردايىم ادال بولامىز. شەتەلدىكتەرگە قازاقتىڭ ءبىر قارىس جەرىن دە, ءبىر ۋىس توپىراعىن دا بەرمەيمىز. ونى كوزدىڭ قاراشىعىنداي ساقتايمىز. شەكارا ماڭىنداعى ەلدى مەكەندەردىڭ احۋالى جەرىمىزدىڭ تۇتاستىعىنا جانە ەلىمىزدىڭ اماندىعىنا تىكەلەي ىقپال ەتەدى», دەي كەلە پرەزيدەنت شىن مانىندە, بۇل – ستراتەگيالىق ماڭىزى بار ماسەلە ەكەنىن ايتتى.
بۇدان سوڭ, مەملەكەت باسشىسى شەكارا شەتىندەگى كەيبىر ەلدى مەكەندە حالىق سانى كۇرت ازايىپ كەتكەنىن ايتتى. بۇعان ءبىر كەزدەگى اۋدانداردى بىرىكتىرۋ جونىندەگى شەشىمدەر دە ىقپال ەتكەنى ءسوزسىز.
«وبلىستاردىڭ ىشكى اۋماقتىق-اكىمشىلىك قۇرىلىمىندا ويلاناتىن تۇستار بار. ءبىز بىلتىر اباي, ۇلىتاۋ جانە جەتىسۋ وبلىستارىن قۇردىق. بۇل شەشىم ايماقتاردىڭ دامۋىنا تىڭ سەرپىن بەردى. «امانات» پارتياسى بىرقاتار شەكارالاس اۋداندى قالپىنا كەلتىرۋ تۋرالى باستاما كوتەرگەنىن بىلەسىزدەر. ۇكىمەت مەنىڭ تاپسىرماممەن بۇل ماسەلەنى پىسىقتادى. مەن سوعان سايكەس قاتون-قاراعاي, مارقاكول جانە ماقانشى اۋداندارىن قالپىنا كەلتىرۋ تۋرالى نەگىزگى شەشىمدى قابىلدادىم. ارينە, بۇعان ارنايى دايىندىق كەرەك. قاجەتتى ەسەپ-قيسابىن جاساپ, قاراجاتىمىزعا, بيۋدجەتتىڭ مۇمكىندىگىنە قاراۋىمىز كەرەك. ءتيىستى جۇمىستىڭ ءبارىن بيىل اياقتاپ, الداعى ەكى جىلدىڭ ىشىندە وسى ءۇش اۋداندى قالپىنا كەلتىرە باستايمىز. بۇل – ۇلتتىق قاۋىپسىزدىكتى قامتاماسىز ەتۋ تۇرعىسىنان قاراساق تا, وتە ماڭىزدى ماسەلە. وسى ماسەلەنى كوپكە سوزباي, شەشۋىمىز قاجەت», دەدى ق.توقاەۆ.
سونىمەن قاتار پرەزيدەنت اۋدانداردى قوسۋ نەمەسە تاراتۋ ونداعى جۇرتتىڭ كۇندەلىكتى ومىرىنە تىكەلەي اسەر ەتەتىندىگىن, شەشىم قابىلداعان كەزدە حالىق سانى, ەكونوميكالىق الەۋەتى, ينفراقۇرىلىمى تۇگەل ەسكەرىلۋ كەرەكتىگىن اتاپ ءوتتى. مەملەكەت باسشىسى ايماقتاردى, ونىڭ ىشىندە اۋىلدى وركەندەتۋ ىسىنە ەرەكشە ءمان بەرەتىندىگىن ايتتى. بىلتىر پرەزيدەنت سايلاۋىنان كەيىن ەڭ الدىمەن اۋىلدى دامىتۋ ماسەلەسىنە ارنالعان جارلىققا قول قويعانىن ەسكە سالدى.
«سونداي-اق ۇكىمەت الداعى 5 جىلدا اۋىلدى دامىتۋعا ايرىقشا كۇش سالادى. ەلگە ەڭبەگى سىڭگەن كورنەكتى تۇلعالاردىڭ باسىم كوپشىلىگى اۋىلدان شىققان. ءبىز ەلىمىزدى وركەندەتەمىز دەسەك, اۋىل مەكتەبىنىڭ جاي-كۇيىن جاقسارتۋدى مىقتاپ قولعا الۋىمىز كەرەك. بۇل جۇمىستى «اۋىل – ەل بەسىگى» ارنايى جوباسىنىڭ اياسىندا كەشەندى تۇردە جۇزەگە اسىرىپ, ياعني, مەكتەپ سالۋ, كۇردەلى جوندەۋ جۇرگىزۋ جانە ونى جابدىقتاۋ جۇمىسىن ءتيىستى دەڭگەيدە اتقارۋ ماڭىزدى», دەدى ەل پرەزيدەنتى.
