اۋرۋحانانىڭ بىلىكتى دارىگەرلەرىنە قارالۋعا كەلگەن حالىقتىڭ لەگى از بولمادى. تەراپەۆتىك جانە حيرۋرگيالىق بەيىندەگى 16 دارىگەرگە نەيروحيرۋرگ, رەۆموتولوگ, نەفرولوگ دارىگەرلەرى قوسىمشا كومەككە كەلدى. دارىگەر قابىلداۋىنا كەزەگىن كۇتكەن ناۋقاستار اۋرۋحانادان شىعارۋ قاعازى, تالداۋ قورىتىندىلارى مەن سوڭعى ۋدز/مرت سۋرەتتەرىن كورسەتىپ, دارىگەرگە ءوز شاعىمدارىن ايتىپ ۇلگەرۋى ءۇشىن اشىق ەسىك كۇنىنىڭ ۋاقىتى دا ۇزارتىلدى.
«اۋرۋحانا ۇجىمى مىقتى دارىگەرلەرىمەن ەشقانداي اقىسىز كەزدەسىپ, تولىققاندى تەكسەرىلۋدەن وتۋگە مۇمكىندىك بەرىپ وتىر. «اشىق ەسىك كۇنى» اكتسياسىنىڭ بولاتىنىن ەستىپ, ورتوپەدتىڭ قابىلداۋىنا كەلدىم. مەنى مازالاعان ماسەلەگە قاتىستى بارلىق سۇراققا كاسىبي جاۋاپ الا الدىم. كەلگەن كىسىنىڭ ءبارى ءوز كەزەگىن سابىرمەن كۇتىپ, العىسپەن شىعىپ جاتىر», دەدى اشىق ەسىك كۇنىنە بارعان ءاليا نىسانباەۆا.
اشىق ەسىك كۇنىندە وتورينولارينگولوگ, حيرۋرگ, تراۆماتولوگ-ورتوپەد, ۋرولوگ, كارديوحيرۋرگ, نەيروحيرۋرگ, اكۋشەر-گينەكولوگ, اريتمولوگ, پۋلمونولوگ, رەۆماتولوگ, تەراپەۆت, نەفرولوگ دارىگەرلەرىنە بارلىعى 307 ناۋقاس قارالدى.
«اشىق ەسىك كۇنىن ۇيىمداستىرعاندارىڭىزعا العىسىمدى بىلدىرەمىن. بۇنى داستۇرگە اينالدىرساڭىزدار جاقسى بولار ەدى. مەن كارديوحيرۋرگتىڭ قابىلداۋىندا بولدىم, وتە سالماقتى, باستىسى بىلىكتى دارىگەر ەكەن, دەنساۋلىعىما قاتىستى اسا قۇندى كونسۋلتاتسيا بەردى. كاسىبي مامانداردىڭ كومەگىنە ريزا بولىپ قايتتىم», دەدى استانا تۇرعىنى ماقسات مۇسابەكوۆ.
قر ءپىب مو اۋرۋحاناسىنىڭ دارىگەرلەرى مەن مەدبيكەلەرى ءىس-شاراعا بەلسەندى قاتىسىپ, ءار كەلۋشىگە جەكە ءىلتيپات كورسەتتى. حالىققا ءوز دەنساۋلىقتارىنا كوڭىل ءبولىپ, بىلىكتى مامانداردىڭ كەڭەسىن الۋعا مۇمكىندىك سىيلاعان شارا ءالى دە جالعاسىن تابۋى ىقتيمال.
