ءىس-شاراعا پارلامەنت ءماجىلىسىنىڭ دەپۋتاتى داۋلەت تۇرلىحانوۆ, قورعانىس ءمينيسترىنىڭ ورىنباسارى سۇلتان قامالەتدينوۆ, «Amanat» پارتياسىنىڭ حاتشىسى داۋلەت كارىبەك جانە قارۋلى كۇشتەردىڭ ارداگەرلەرى, تانىمال سپورتشىلار قاتىستى.
– جۇرەگىندە وتانشىلدىق رۋحى جالىنداعان جاستاردىڭ جاڭا بۋىنى ءوسىپ كەلە جاتقانىنا ءبارىمىز كۋامىز. تاۋەلسىزدىگىمىزدى نىعايتىپ, ەلىمىزدى ودان ءارى وركەندەتۋ قازىرگى ۇرپاقتىڭ قاسيەتتى بورىشى. داستۇرگە اينالىپ كەلە جاتقان «Qaisar» اسكەري-پاتريوتتىق ويىندارى – وتانشىل جاستاردى ادال قىزمەت ەتۋگە, ەل قورعانى بولۋعا تاربيەلەيتىن بىرەگەي الاڭ. بىلتىر ىرىكتەۋ كەزەڭىنە 1 700-گە جۋىق جاس ازامات قاتىسقان بولسا, بيىل قاتىسۋشىلار سانى 3 مىڭنان استى, – دەدى جيىندا «Amanat» پارتياسىنىڭ حاتشىسى داۋلەت كارىبەك.
جالپى, پارتيانىڭ جاستار قاناتى بۇل جوبانى ىسكە قوساتىنىن بىلتىر «Amanat»-تىڭ كەزەكتەن تىس XXII سەزىندە مالىمدەگەن ەدى. بيىل, مىنە, ەكىنشى مارتە ايماقتاردا 15-25 ءساۋىر ارالىعىندا ىرىكتەۋ جۇرگىزىلدى. بۇل جولعى ويىن بۇرىنعىدان وزگەرەك. ءىس-شارادا دەسانتتىق-شابۋىلداۋ اسكەرلەرى سوعىستاعى ۇرىس بارىسىن بەينەلەيتىن كورىنىس قويدى. ال الەمگە تانىمال اتلەت سەرگەي تسىرۋلنيكوۆ جاستاردىڭ الدىندا ءوز كۇشىن كورسەتىپ, جينالعان كوپشىلىكتى ءتانتى ەتتى. جيىلعاندار تىلەك ايتىپ, ارداگەرلەر اق باتاسىن بەردى.
– ەل قورعاۋ – قاسيەتتى بورىش. ءبىز اقىلدى, سابىرلى, ساناسى سەرگەك, ويى ۇشقىر جاستارعا قاراپ سۇيسىنەمىز. ءاردايىم قايسار, وجەت, العىر بولىڭدار. اتا-بابادان امانات بولىپ قالعان اتامەكەنىمىزدى قورعاي بىلىڭدەر. ابىرويلارىڭ اسپانداي بەرسىن, – دەدى قارۋلى كۇشتەر ارداگەرى, كونتر-ادميرال راتمير كومراتوۆ.
ەكى كۇنگە جالعاسقان باسەكەدە فيناليستەر قاتارىنا ىلىگۋ ءۇشىن قاتاڭ ىرىكتەۋدەن ءوتتى. ناتيجەسىندە, شەشۋشى سايىسقا 120 قاتىسۋشى جولداما الدى. ولار قاشىقتىققا جۇگىرىپ, ارنايى اسكەري جاتتىقتىرۋشىلار دايىنداعان كەدەرگىلەرمەن ءجۇرىپ سىنالدى. سونىمەن قاتار ساپتىق دايىندىق دەڭگەيلەرى كورسەتىلىپ, «مەنىڭ ەلىم – قازاقستان» اتتى اسكەري-تانىمدىق ۆيكتورينادا بىلىمدەرىن شىڭدادى.
– ەلىمىزدىڭ تۇكپىر-تۇكپىرىنەن جۇزدەن جۇيرىك, مىڭنان تۇلپار جاستار جينالدى. سىزدەر ءوز وڭىرلەرىڭىزدە قاتاردان قارا ءۇزىپ, بۇگىنگى سوڭعى كەزەڭگە جولداما الىپ كەلدىڭىزدەر. ال ەندى ەلوردا تورىندە جەڭىسكە جەتۋ ءۇشىن وسىعان دەيىن جيعان ءبىلىم-بىلىكتەرىڭىزدى, دارا داعدىلارىڭىزدى, توزىمدەرىڭىزدى تانىتاسىزدار دەگەن ويدامىن. ءتىپتى, ارالارىڭىزدا بولاشاق وتان قورعاۋشىلار, سەرجانتتار مەن وفيتسەرلەر تۇرعانىنا سەنىمدىمىن, – دەدى قورعانىس ءمينيسترىنىڭ ورىنباسارى سۇلتان قامالەتدينوۆ.
سايىس قورىتىندىسى بويىنشا, تۇركىستان وبلىسىنىڭ كومانداسى جۇلدەلى ءبىرىنشى ورىندى يەلەنسە, قاراعاندى وبلىسىنىڭ وقۋشىلارى ەكىنشى ورىندى قانجىعاسىنا بايلادى. ال ءۇشىنشى ورىندى الماتى قالاسىنىڭ كومانداسى مىسە تۇتتى. ۇيىمداستىرۋشىلار ءار ءوڭىردىڭ ۇكىلەگەن ءۇمىتىن ارقالاعان ورەندەرگە باعالى سىي-سياپاتتار تابىستادى.
– جاستار – ەگەمەن ەلىمىزدىڭ بولاشاعى. سوندىقتان بۇل ءىس-شارا ءبارىمىز ءۇشىن ماڭىزدى. ارقايسىڭىز تاربيەلى, ءبىلىمدى, مادەنيەتتى, نامىستى ازامات بولىپ ءوسىپ كەلە جاتقاندارىڭىزعا سەنىمدىمىن. ومىرلەرىڭىزدە اسىقتارىڭىز ۇنەمى الشىسىنان ءتۇسۋىن تىلەيمىن. وسى ورايدا, «Amanat» پارتياسىنا جانە بۇل ءىس-شارانىڭ وتۋىنە اتسالىسقان ازاماتتاردىڭ بارىنە العىسىمدى بىلدىرەمىن. ەلىمىز امان, جۇرتىمىز تىنىش بولعاي, – دەدى ءماجىلىس دەپۋتاتى داۋلەت تۇرلىحانوۆ.
ال تۇركىستان وبلىسىنان كەلگەن كوماندانىڭ مۇشەسى ستاس گراچەۆ بۇل جەڭىس وڭايلىقپەن كەلمەگەنىن, الايدا وسى ۋاقىت ارالىعىندا بالالار جاڭا دوس تاپقانىن ايتتى.
