«جاسىل استانا» ەكولوگيالىق ايلىعى اياسىندا ەلوردادا العاشقى ۇلكەن جالپىقالالىق سەنبىلىك ءوتتى. وعان 62 مىڭنان استام ادام – مەملەكەتتىك ورگانداردىڭ وكىلدەرى, بيزنەس-قوعامداستىقتار, ەرىكتىلەر, ەڭبەك ۇجىمدارى, جاستار, قوعام قايراتكەرلەرى, سپورتشىلار, ارتىستەر, باسقارۋشى ۇيىمدار جانە قالانىڭ بەلسەندى تۇرعىندارى قاتىستى.
ولاردىڭ ارقايسىسى ەلوردادا تازالىق پەن ءتارتىپتىڭ ورناۋىنا ءوز ۇلەسىن قوستى.
قالا تۇرعىندارى بۇكىل كىرەبەرىستەر مەن ءوز اۋلالارىنىڭ تازالىعىنا اتسالىستى.
«بۇگىن سومكەمىزدى ارقالاپ, قولعاپتارىمىزدى كيىپ, قولىمىزعا كۇرەك الىپ, جالپى سەنبىلىككە شىقتىق. ءتىپتى بالالار دا بىزبەن بىرگە قوقىس جينادى. اعاشتاردىڭ ءتۇبى اكتەلىپ, رەتكە كەلتىرىلدى. تازالىقتىڭ ورناعانىنا قۋانىپ وتىرمىز. ءارى مۇنداي ءىس-شارالار كورشىلەردى ءبىر بىرىمەن جاقىنداستىرا ءتۇسىپ, ءوزارا تاتۋ ەتەدى», دەيدى قوسشىعۇل ۇلى كوشەسىندەگى ءۇيدىڭ تۇرعىنى باقىت قۇسپەتوۆا.
مەردىگەرلىك ۇيىمدار شاعىن ساۋلەت نىساندارىن, ەسكەرتكىشتەر مەن مۇسىندەردى, قوقىس الاڭدارى مەن كونتەينەرلەردى جۋ جانە قالپىنا كەلتىرۋ جۇمىسىن جۇرگىزدى.
قالانى جالپى تازالاۋ كەزىندە بەس اۋداننىڭ ارقايسىسىنا اعاشتار مەن بۇتالار وتىرعىزىلدى. ونىڭ بارىسىندا جاپىراقتى اعاشتارعا باسىمدىق بەرىلدى. ەلوردادا بارلىعى سەگىز مىڭعا جۋىق جاسىل جەلەك وتىرعىزىلدى.
«ەكولوگيالىق ايلىق اياسىندا اۋدانىمىزدا سەنبىلىكتەر ۇنەمى وتكىزىلىپ تۇرادى, ونىڭ بارىسىندا جاسىل جەلەكتەر وتىرعىزىلادى. قالا تۇرعىندارىن سەنبىلىكتەرگە بەلسەندى قاتىسۋعا شاقىرامىز. ال ءوز تاراپىمىزدان قاجەتتى قۇرال-جابدىقتارمەن قامتاماسىز ەتەمىز. ەڭ باستىسى, جاقسى كوڭىل-كۇيمەن كەلىپ, اۋداندى كوگالداندىرۋعا ۇلەس قوسۋى كەرەك», دەدى الماتى اۋدانى اكىمىنىڭ ورىنباسارى مۇحامەديار قوجەكەنوۆ.
سەنبىلىك بارىسىندا پرەزيدەنتتىك ساياباقتا اعاش وتىرعىزۋعا ءتۇرلى ۇيىمدار مەن كاسىپورىنداردىڭ وكىلدەرى قاتىستى, ولاردىڭ اراسىندا ديپلوماتيالىق كورپۋس, قر قارجى مينيسترلىگىنىڭ قازىناشىلىق كوميتەتى, «قازاقستاندىق ستاندارتتاۋ جانە مەترولوگيا ينستيتۋتى» رمك, قوعامدىق كەڭەس, «Qazaq Air» اق, ارداگەرلەر كەڭەسى جانە باسقالار بار.
ۇلىبريتانيانىڭ قازاقستانداعى ەلشىسى كەتي ليچ ءىس-شارادان العان اسەرىن بىلايشا جەتكىزدى.
ء«بارىمىز استانانىڭ جاسىل جەلەكتى قالا بولعانىن قالايمىز. وسىعان اتسالىسىپ, اعاش وتىرعىزعانىما قۋانامىن. ءوزىم ساياباققا قاراما-قارسى تۇرامىن», دەپ اتاپ ءوتتى كەتي ليچ.
سەنبىلىك بارىسىندا ەلوردادان مىڭ توننادان استام قوقىس جينالىپ, شىعارىلدى. قالانىڭ 3,3 ملن شارشى مەتردەن استام جەرى تازارتىلدى.
ەلوردادا سەنبىلىكتەر سەرياسى الداعى ۋاقىتتا دا جالعاسادى.
