ورتالىق كوممۋنيكاتسيالار قىزمەتىندە وتكەن بريفينگ بارىسىندا ەكولوگيا جانە تابيعي رەسۋرستار مينيسترلىگىنە قاراستى سۋ رەسۋرستارى كوميتەتى توراعاسىنىڭ ورىنباسارى ماقسات اياشەۆ وزەن سۋىنىڭ ازايۋ تسيكلى ءالى دە جالعاسىپ جاتقانىن ءمالىم ەتتى.
«سۋدى پايدالانۋشىلار اراسىندا, ايماقتار اراسىندا دۇرىس ءبولۋ, سول ارقىلى تىعىرىقتان شىعۋدىڭ جولدارىن قاراستىرۋ شارالارى جۇرگىزىلۋدە. سوعان قاراماستان سۋ تاپشىلىعىنا بايلانىستى قاۋىپ ءالى دە سەيىلگەن جوق. بۇل رەتتە وڭتۇستىك وڭىرلەر سۋ تاپشىلىعىنا بەيىم بولىپ كەلەتىنىن ايتا كەتۋ كەرەك. سونداي-اق قۇرعاقشىلىق پەن سۋ تاپشىلىعىنا بايلانىستى باتىس وڭىرلەرى دە ەرەكشە باقىلاۋعا الىندى», دەدى ماقسات اياشەۆ.
ونىڭ ايتۋىنشا, ەلدىڭ قالعان ايماقتارى سۋ تاپشىلىعىنا بەيىم ەمەس. دەسە دە, قازىردىڭ وزىندە ورتالىق قازاقستاندا سۋدىڭ ازدىعى بايقالىپ جاتىر. ماسەلەن, بۇرىن سۋى تولىپ جاتقان نۇرا سياقتى وزەندەر قازىر تايازدانىپ بارادى.
