«پارتيالاردى ورتاق ىسكە جۇمىلدىرۋدىڭ تاعى ءبىر ماڭىزدى جولى – پارلامەنتتە دەپۋتاتتىق بىرلەستىك قۇرۋ. اسسامبلەيادان سايلانعان بەس سەناتور بۇل شارۋانىڭ باسى-قاسىندا ءجۇرۋى كەرەك. ەتنوسارالىق قاتىناس سالاسىنداعى ءوزىن-ءوزى باسقارۋ ينستيتۋتتارىن دامىتۋ – ماڭىزدى مىندەتتىڭ ءبىرى. اسسامبلەيا بۇل جۇمىستى ەتنومادەني بىرلەستىكتەردىڭ قىزمەتىن ۇيلەستىرۋ ارقىلى اتقارۋدا», دەدى قاسىم-جومارت كەمەل ۇلى.
سونداي-اق پرەزيدەنت مەملەكەتتىڭ اكىمشىلىك باسشىلارىنا اسسامبلەيا جۇمىستارىنا ءوز ۇلەستەرىن قوسۋدى تاپسىردى. اراداعى تىعىز بايلانىستىڭ ماڭىزدى ەكەنىن ايتىپ, تۇراقتى كەزدەسۋلەر ۇيىمداستىرۋعا تاپسىرما بەردى.
«وسىندا مينيسترلىكتەردىڭ, مەكەمەلەردىڭ, ايماقتاردىڭ, پارلامەنتتىڭ جانە پرەزيدەنت اكىمشىلىگىنىڭ باسشىلارى وتىر. ولاردىڭ كوپشىلىگى – اسسامبلەيا مۇشەسى. اسسامبلەيا قىزمەتىنە بەلسەنە اتسالىسۋ – بارشاڭىزعا ورتاق مىندەت. اسسامبلەيا دا اكىمدىكتەر مەن ءماسليحاتتاردىڭ جۇمىسىنا اتسالىسۋى قاجەت. ءبىر سوزبەن ايتقاندا, اسسامبلەيا جانە بيلىك ورگاندارى ءوزارا تىعىز بايلانىستا بولۋعا ءتيىس. مۇنىڭ ايرىقشا ءمانى بار.
قۇزىرەتتەردى جوعارىدان تومەنگە بەرۋ ىسىندە وسى ماسەلەنى ەسكەرگەن ءجون. مەملەكەتتىك ورگان باسشىلارى اسسامبلەيا وكىلدەرىمەن تۇراقتى كەزدەسىپ وتىرۋى قاجەت. مۇنداي كەزدەسۋلەر كەم دەگەندە جارتى جىلدا ءبىر رەت وتكىزىلۋى كەرەك», دەدى مەملەكەت باسشىسى.
