بۇل ناتيجەمەن ولار الەم چەمپيوناتىنىڭ رەكوردىن ورناتتى. ياعني بۇعان دەيىن ۇيىمداستىرىلعان جاھاندىق بىرىنشىلىكتىڭ بىردە-بىرىندە التى پارتيادان كەيىن ءتورت جەڭىس تىركەلمەگەن ەكەن. ماسەلەن, 2016 جىلعى باسەكەدە شاحماتشىلار التى تۋردا تەك ەكى مارتە جەڭىسكە جەتكەن بولسا, 2018 جىلى بارلىق پارتيا تەڭ ناتيجەمەن اياقتالعان. ال ەلورداداعى تۋرنيردە ازىرشە ەكى گروسسمەيستەر ءبىر-ءبىر مارتە عانا تەڭ وينادى.
دين ليجەن كەيىنگى پارتيالاردا ساۋاتتى ويىن ورگەنىن كورسەتىپ, شاحمات ساراپشىلارىنىڭ نازارىن وزىنە اۋدارتا ءبىلدى. ەكىنشى پارتيادا اق تاستارمەن ويناسا دا, رەسەيلىك يان نەپومنياششيگە جول بەرگەن قىتايلىق شاحماتشى كەيىنگى باسەكەلەرىندە قارسىلاسىنا لايىقتى قارسىلىق كورسەتىپ كەلەدى. ءديننىڭ العاشقى جەڭىلىسىنەن كەيىن كوپشىلىك «ەندى قىتايلىق شاحماتشى ياننىڭ قارقىنىنا توتەپ بەرە المايدى. ءتىپتى باسەكە مەرزىمىنەن بۇرىن اياقتالىپ قالۋى عاجاپ ەمەس», دەگەن پىكىردە ەدى. الايدا فيدە-ءنىڭ قازاق تىلىندەگى كوممەنتاتورى ءارى شاحماتشى ولجاس مەڭعالي ەكىنشى پارتيادان كەيىن دين ليجەن العاشقى پارتيالاردا ءساتسىز ويناعانىمەن, بىرتە-بىرتە ءوز ويىنىن تاۋاپ, بابىنا ەنەدى دەگەن بولاتىن. مىنە, ساراپشىمىزدىڭ ايتقانى ءدال كەلىپ, قىتايلىق شاحماتشى ازىرگە يان نەپومنياششيگە دەس بەرەر ەمەس.
سونىمەن قاتار كەيىنگى پارتيالاردا دين ليجەننىڭ كومانداسى وتە جاقسى جۇمىس ىستەپ جاتقانىن دا ايتا كەتكەنىمىز ءجون بولار. وسى جارىس الدىندا كومانداسىن تۇگەلدەي وزگەرتكەن رەسەيلىك شاحماتشى ءديندى ايقىن باسىمدىقپەن جەڭۋ ءۇشىن ەشقانداي ايلا-امال تابا الماي, پۇشايمان بولىپ جاتىر.
التىنشى پارتياعا توقتالار بولساق, ويىندى اق تاستارمەن باستاعان دين ليجەن كەزەكتى جەڭىسىنە قول جەتكىزدى. ول العاشقى جۇرىسىندە لوندوندىق پوزيتسيانى تاڭداپ, قارا تاستارعا قىسىم كورسەتۋگە تىرىستى. ماتچتىڭ بەل ورتاسىنا دەيىن ەكى ويىنشى جۇرىسىنەن جاڭىلماي, تەڭ ناتيجەنى ۇستاپ تۇردى. بىراق ءبارىبىر اق تاستاردىڭ باسىمدىعى بايقالا باستادى. مۇنى سەزگەن نەپومنياششي دە كوپ ۋاقىتىن شارشى تاقتانىڭ الدىندا ەمەس, ءوز بولمەسىندە وتكىزدى. ال بۇل جايتتى ماماندار رەسەيلىك شاحماتشى ءوزىنىڭ جۇرىسىنە كوڭىلى تولماي جاتقاندىقتان دەپ ءتۇسىندىردى.
ناتيجەسىندە, 40-جۇرىستەن كەيىن اق تاس ويىندى تولىق ءوز باقىلاۋىنا الىپ, كەزەكتى جەڭىسىنە ءبىر تابان جاقىنداي ءتۇستى. ال 44-جۇرىستەن كەيىن يان نەپومنياششي دە جەڭىلگەنىن مويىنداۋدان باسقا امال قالمادى. ءسويتىپ, ءتورت ساعاتقا جالعاسقان التىنشى پارتيا 44 جۇرىسپەن ءوز مارەسىنە جەتتى.
