پولشا قۇراماسىنىڭ كاپيتانى داۆيد تسەلت بۇل كەزدەسۋدە قازاقستان تەننيسشىلەرىن فاۆوريت دەپ ساناسا دا, شاكىرتتەرى تەك جەڭىس ءۇشىن وينايتىنىن مالىمدەدى. سونداي-اق ول جەرلەستەرىمىزدىڭ جەكە شەبەرلىگىنە توقتالىپ, يگا شۆەنتەك پەن ماگدا فرەحتىڭ جوقتىعىن ايتتى.
«ەرتەڭ ءبىزدى وتە اۋىر سىناق كۇتىپ تۇر. بىراق قارسىلاستارىمىزعا لايىقتى قارسىلىق كورسەتۋگە ۋادە بەرەمىز. وكىنىشكە قاراي, جاراقاتىنا بايلانىستى قۇرامامىزدىڭ كوشباسشىسى يگا شۆەنتەك بۇل جارىسقا قاتىسا المايدى. جالپى, قازاقستان قۇراماسىنىڭ تەننيسشىلەرىن وتە جاقسى بىلەمىز. ەلەنا رىباكينا بيىل وتە تابىستى ونەر كورسەتىپ ءجۇر, شەبەرلىگى دە ءوسىپ كەلەدى. ماعان ونىڭ ويىنى ۇنايدى. يۋليا پۋتينتسەۆا – كۇش-جىگەرى مىقتى تەننيسشى, اسىرەسە توپىراق توسەنىشتە جاقسى وينايدى. اننا دانيلينا جۇپتىق سىندا وتكەن جىلى اۋستراليا چەمپيوناتىنىڭ فينالىنا دەيىن جەتكەنىن جاقسى بىلەمىز. دەگەنمەن بۇل كوماندالىق جارىس بولعاندىقتان, ءبارى دە بولۋى مۇمكىن», دەدى تسەلت.
ال يۋليا پۋتينتسەۆا توپىراق توسەنىشتەگى ماۋسىمنىڭ باستالعانىن ايتىپ, قۇمداۋىت كورتتا ويناۋ وڭ جامباسىنا كەلەتىنىن جەتكىزدى.
«توسەنىشتى تاڭداعان كەزدە بىزگە قايسىسى كوبىرەك قولايلى, سوعان سۇيەندىك. نەگىزى قانداي توسەنىش, قانداي كورت بولسا دا, ءبىز ءار جارىسقا تەزىرەك بەيىمدەلۋگە تىرىسامىز. دەسە دە بىزگە قۇمداۋىت كورتتا ويناۋ ىڭعايلى جانە وڭ جامباسىمىزعا كەلەدى دەپ تە ايتسام بولاتىن شىعار. بىلتىر ءدال وسىنداي كورتتا گەرمانيا تەننيسشىلەرىن تىزە بۇكتىرىپ, العاش رەت الەم چەمپيوناتىنىڭ فينالدىق كەزەڭىنە جولداما جەڭىپ العان بولاتىنبىز. بيىل دا سول جەتىستىگىمىزدى قايتالاعىمىز كەلەدى. ەرتەڭ جەڭىس ءۇشىن جانە جانكۇيەرلەردى قۋانتۋ ءۇشىن بار كۇش-جىگەرىمىزدى سالامىز», دەدى پۋتينتسەۆا.
«ەل نامىسىن قورعاۋ ۇلكەن جاۋاپكەرشىلىك جۇكتەيدى. الدىن الا جەڭەمىز دەپ بولجام جاساۋ مۇمكىن ەمەس. قارسىلاس كوماندانىڭ قۇرامى قانداي بولاتىنىنا قاراماستان, تاس-ءتۇيىن دايىندالىپ جاتىرمىز. ەكى جىل قاتارىنان ەلوردادا ونەر كورسەتەتىنىمىزگە قۋانىشتىمىز جانە وتكەن جىلعى ناتيجەنى قايتالاعىمىز كەلەدى. قىزداردىڭ كوڭىل كۇيى كوتەرىڭكى, كورتقا ۇيرەنىپ, ويىندارعا دايىندالىپ جاتىر. ەڭ الدىمەن, تاجىريبەلى تەننيسشىلەرىمىزگە سەنىم ارتامىز. ەگەر ءۇش باسەكەنىڭ قورىتىندىسى بويىنشا ماسەلە ەرتە شەشىلىپ جاتسا, وندا جاس تەننيسشىلەردىڭ بابىنا قارايمىز», دەدى شۆەدوۆا.
