الەم چەمپيونى اتاعىنان ۇمىتكەر ەكى شاحماتشى دا باسەكەنىڭ العاشقى پارتياسىن اسا ساقتىقپەن باستاپ, قاتەلىك جاساماۋعا تىرىسقان ەدى. سوندىقتان بولار, ءبىرىنشى پارتيا بەس ساعاتتان اسا ۋاقىتقا جالعاستى. ال ەكىنشى پارتيانىڭ العاشقى مينۋتتارىندا ۇمىتكەرلەر وتە بەلسەندى بولدى. اينالدىرعان 1-2 مينۋتتىڭ ىشىندە ەكەۋى دە ءۇش جۇرىستەن جاساپ ۇلگەردى. ءتورتىنشى جۇرىسكە كەلگەندە قىتايلىق گروسسمەيستەر دين ليجەن بارشا شاحمات ساراپشىلارى مەن جانكۇيەرلەرىن تاڭعالدىرىپ, ەشكىم كۇتپەگەن h3 ءجۇرىسىن جاسادى. ءسويتتى دە ورنىنان تۇرىپ, ءوز بولمەسىنە كەتىپ قالدى. ال مۇندايدى كۇتپەگەن يان نەپومنياششي دە ءوز ەموتسياسىن جاسىرا الماي, ءبىر جىميىپ الدى.
ويىننان كەيىنگى ءباسپاسوز ءماسليحاتىندا جۋرناليستەر يان نەپومنياششيدەن قارسىلاسىنىڭ كۇتپەگەن ءجۇرىسى تۋرالى پىكىرىن سۇراعاندا ول: «ارينە, بۇل ءجۇرىستى ليجەنگە ونىڭ سەكۋندانتى ريچارد راپپورتتىڭ ۇسىنعانىن بىردەن ءتۇسىندىم. بۇل ءجۇرىستىڭ قانشالىقتى ۇتىمدى ياكي ءساتسىز بولعانىن ايتا المايمىن. بىراق ءديننىڭ وزىندىك يدەياسى بولدى جانە ول ىسكە اسقان سياقتى», دەدى رەسەيلىك شاحماتشى.
دين ليجەن بۇل قادامعا نە ءۇشىن بارعانىن بىلاي ءتۇسىندىردى: «جالپى, بۇل ءجۇرىس شاحماتتا وتە سيرەك كەزدەسەدى. مۇنى ماعان سەكۋندانتتارىم ۇسىنعان ەدى. مەنىڭشە, جاقسى ءجۇرىس بولعان سياقتى. سەبەبى h3 جۇرىسىنەن كەيىن مەندە العا قادام جاساۋعا كوپ مۇمكىندىك بولاتىنىن ءتۇسىندىم. بىراق بۇگىن بۇل ءجۇرىس ماعان كومەكتەسپەدى», دەدى د.ليجەن.
سونىمەن قاتار قىتايلىق گروسسمەيستەر بۇلاي جەڭىلۋ وتە ۇيات جاعداي ەكەنىن دە جاسىرىپ قالعان جوق. «مەن پارتيانىڭ باستاپقى كەزەڭىندە نە بولىپ جاتقانىن اسا قاتتى تۇسىنە قويعان جوقپىن. تەك قارسىلاسىم F5 ءجۇرىسىن جاساعاننان كەيىن ءارى قاراي ويناۋ ماعان اۋىر بولدى. ال ات س6 جۇرىسىنەن سوڭ مەن بۇل پارتيادا جەڭىلگەنىمدى ءتۇسىندىم. ەكىنشى پارتيانىڭ تاعدىرىن وسى ءجۇرىس شەشىپ كەتكەن سياقتى», دەپ ءسوزىن اياقتادى دين ليجەن.
ال يان نەپومنياششي 18-ءشى (f5) جۇرىسىنەن كەيىن ءوز جەڭىسىنە سەنىمدى بولعانىن ايتتى. وسىلايشا, ءۇش جارىم ساعاتقا جالعاسقان ماتچتا نەپومنياششي جەڭىسكە جەتىپ, جالپى ەسەپتە العا شىقتى – 1,5 – 0,5.
كەشە ۇمىتكەرلەر ەرەجە بويىنشا العاشقى ەكى پارتيادان كەيىنگى العاشقى دەمالىس كۇنىن وتكىزدى. نەپومنياششي بۇل كۇندى كوبىرەك ۇيقىعا ارنايتىنىن ايتسا, دين دەمالىستا دا دايىندىعىن جالعاستىراتىنىن جەتكىزدى. ال بۇگىن شاحماتشىلار ءۇشىنشى پارتيادا شەبەرلىك بايقاسادى.
