اۋەسقوي بوكستا ءبىرتالاي تابىسقا جەتىپ, جانكۇيەرلەرىنە قۋانىش سىيلاعان جەرلەستەرىمىز كاسىپقوي بوكستا دا ءساتتى ونەر كورسەتىپ كەلەدى. بىلتىر ەكى وتانداسىمىز دا ەكى جەكپە-جەك وتكىزىپ, ەكەۋىندە دە ايقىن باسىمدىقپەن جەڭىسكە جەتكەن. ال بۇل ايقاس ولاردىڭ بيىلعى ءبىرىنشى كەزدەسۋلەرى بولماق.
«Suleimen Promotions» ءباسپاسوز قىزمەتىنىڭ مالىمەتى بويىنشا, وتانداستارىمىز 15 ءساۋىر كۇنى اقش-تىڭ پومونا (كاليفورنيا) قالاسىندا ۇيىمداستىرىلاتىن بوكس كەشىندە شارشى الاڭعا شىعادى. اتالعان جەكپە-جەك كەشىندە ەكىنشى ورتا سالماقتا جۇدىرىقتاساتىن 25 جاستاعى ءا.امانقۇل مەكسيكالىق دانيەل ەچەۆەرريامەن (21-11, 18 كو) كەزدەسەدى. ايقاس سەگىز راۋندقا جوسپارلانعان. ال ەكىنشى ورتا سالماقتاعى تاعى ءبىر وتانداسىمىز بەك نۇرماعانبەت 36 جاستاعى ۆەنەسۋەلا وكىلى ەبەر روندونمەن (20-3, 13 كو) قولعاپ تۇيىستىرەدى. بۇل جەكپە-جەك تە سەگىز راۋند دەپ بەلگىلەنىپ وتىر.
