قوش دەلىك! سونىمەن مەگاپوليستە ناۋرىز مەرەكەسى قاتارىنان ءۇش كۇن بويى تويلاندى. راسى كەرەك, مۇنداي دۋماندى شىمكەنتتىكتەردىڭ ءبىرىنشى مارتە كورۋى بولسا كەرەك-ءتى. ناۋرىزدىڭ 21-22 كۇندەرى شاھاردا مەرەكەگە بايلانىستى بىرنەشە قىزىقتى كونتسەرتتىك باعدارلامالار مەن ءىس-شارالار ءوتتى. سونىڭ ءبىرى اتشاباردا «قازاقتىڭ ۇلى ويىندارى» اتتى ۇلتتىق سپورت تۇرلەرىنەن جارىس ۇيىمداستىرىلدى. وعان ەلىمىزدەن بولەك قىرعىزستان, وزبەكستان, موڭعوليا, ساۋد ارابياسى, رەسەي, پولشا, تۇركيا سىندى مەملەكەتتەردەن كوكپارشىلار, ساداق اتۋشىلار, بايگەشىلەر قاتىستى. جۇلدە قورى قوماقتى بولعاندىقتان, ءارى تارازى باسىندا ەلدىڭ ابىرويى تۇرعاندىقتان ءار سپورتشى جارىستا جەڭىسكە جەتۋگە بارىن سالارى انىق. جاڭا يپپودرومدا سپورتشىلار ات جارىستىرىپ, باسەكە كورىگىن قىزدىرسا, ءدال سونىڭ جانىندا ورنالاسقان ەتنواۋىلدا 170-كە جۋىق كيىز ءۇي تىگىلىپ, مۇندا دا ناۋرىزدىڭ قىزىقتى ءىس-شارالارى باستالدى. جاستاردىڭ ءبىر بولىگى اۋىل ماڭىنداعى التىباقاندا سەيىل قۇرسا, اتالار مەن اجەلەر ۇلتتىق كيىمدەرىمەن ورتاعا جارقىراي شىعىپ, حالىقتىڭ ءداستۇرلى اندەرىنەن شاشۋ شاشتى. بۇدان بولەك ساداق اتۋدان تۇڭعىش رەت ءى ازيا كۋبوگى ۇيىمداستىرىلدى. ءوزىمىزدىڭ جانە كورشىلەس ەلدەردەن كەلگەن بالۋاندار بەلدەسىپ, تۇيە پالۋان جۇلدەسىنە تالاستى. ودان بولەك سۋىرىپ سالما اقىندارىمىز ناۋرىز ايتىستا جىر دوداعا ءتۇسىپ, ءسوز تاپقىرلىقتىڭ شەشەندىك ۇلگىسىمەن كوپشىلىكتى ءسۇيسىنتتى. اسىق اتۋدان دا ورەندەر جارىسى قىزىقتى ءوتتى. «اسىق ويناعان ازار» دەگەن ۇعىم بۇل باسەكەگە جارامادى. ويتكەنى جارىستا اسىق اتىپ, جۇلدەگە ىلىككەندەر قوماقتى سىيلىق ارقالاپ قايتتى. سونداي-اق تاي قازانعا ناۋرىز كوجە ءپىسىرىلىپ, كەلگەن قوناقتاردىڭ ءبارى ودان ءدام اۋىز ءتيدى. مەرەكەدە ەكى توننادان استام ناۋرىز كوجە دايىندالىپتى. بۇل دا ءبىر – وزىنشە رەكورد!
حالىقتى ءاز-ناۋرىزبەن قۇتتىقتاپ, جۇرتتىڭ قۋانىشىن بولىسۋگە كەلگەن مادەنيەت جانە سپورت ءمينيسترى اسحات ورالوۆ ءوزىنىڭ جۇرەككجاردى تىلەگىن جەتكىزدى.
«مەملەكەت باسشىسى قاسىم-جومارت توقاەۆ «تاۋەلسىزدىك بارىنەن قىمبات» اتتى ماقالاسىندا ناۋرىز مەرەكەسىن اتاپ ءوتۋ تۇجىرىمداماسىن ءتۇسىندىرىپ بەرگەن ەدى. وسىعان بايلانىستى مادەنيەت جانە سپورت مينيسترلىگى ۇلىستىڭ ۇلى كۇنىن تويلاۋدىڭ جاڭا تۇجىرىمداماسىن بەكىتتى. وسىنىڭ نەگىزىندە ءاز-ناۋرىزدى بۇكىل ءوڭىر ءبىر كۇندە اتاپ وتپەي, «امال مەرەكەسى», «تاريحقا تاعزىم» سەكىلدى داتالى كۇندەرمەن بىرگە 10 كۇن بويىنا تويلاۋ قاراستىرىلدى. سوندىقتان ءبىز وسىناۋ باعدارلاما اياسىندا جاڭا يپپودرومدا كوشپەندىلەر رۋحىن وياتقان كەرەمەت سپورتتىق ويىنداردىڭ كۋاسى بولىپ وتىرمىز. بالۋاندار بەلدەسۋى, الامان بايگە, تەڭگە ءىلۋ, كوكپار تارتۋ سياقتى ۇلتتىق سپورت جارىستارىن كورىپ دەلەبەمىز قوزىپ, ءبىر مارقايىپ قالدىق. مۇنىڭ بارلىعى دا بىرىنشىدەن, ناۋرىز مەرەكەسىنىڭ ءسانىن كەلتىرسە, ەكىنشىدەن, الداعى جىلى ەلىمىزدە تۋى جەلبىرەيتىن «دۇنيەجۇزىلىك كوشپەندىلەر ويىنىنا» قىزۋ دايىندىعىمىزدىڭ باستاماسى», دەدى مينيستر.
ۇلىستىڭ ۇلى كۇنى – ناۋرىز مەيرامىن اسسامبلەيا مۇشەلەرى دە جىل سايىن ءداستۇرلى تۇردە اتاپ وتەدى. وسى ورايدا قحا جانىنداعى قۇرىلىمدار, ەتنومادەني بىرلەستىك وكىلدەرى «دوستىق ءۇيىنىڭ» الدىنا كيىز ءۇي تىگىپ, سالتاناتتى جيىن ۇيىمداستىردى. «ارمىسىڭ, ءاز-ناۋرىز!» اتتى سالتاناتتى شارانىڭ قىزىقتى وتۋىنە اسسامبلەيا جانىنداعى 17 ەتنومادەني بىرلەستىكتىڭ توراعالارى مەن وكىلدەرى, 7 قوعامدىق قۇرىلىم – اقساقالدار كەڭەسى, انالار كەڭەسى, جۋرناليستەر مەن بلوگەرلەر كلۋبى, «اسسامبلەيا جاستارى» ۇيىمى, مەدياتسيا كەڭەسى, عىلىمي-ساراپشىلىق توپ, كاسىپكەرلەر ۇيىمىنىڭ مۇشەلەرى ءبىر كىسىدەي اتسالىستى. شىمكەنت قالالىق ىشكى ساياسات جانە جاستار ىستەرى جونىندەگى باسقارما باسشىسى م.شوتانوۆ ناۋرىز مەيرامى – وتكەندى سارالاپ, بۇگىندى باعامدايتىن جانە كۇن مەن ءتۇن تەڭەلىپ, اينالا جاڭاراتىن يگى مەرەكە ەكەنىن اتاپ ءوتتى. سونىمەن بىرگە ەل ىنتىماعىن نىعايتىپ, تاتۋلىعىن ساقتاۋ جولىندا ۇلكەن ۇلەس قوسىپ وتىرعان قازاقستان حالقى اسسامبلەياسى وكىلدەرىن ۇلىستىڭ ۇلى كۇنىمەن قۇتتىقتادى. ال ەتنوس وكىلدەرىنىڭ ناۋرىز مەرەكەسىن تاماشالاۋعا كەلگەن جۇرت «دوستىق ءۇيى» مەن «بىرلىك ءۇيى» دەگەن اتپەن تىگىلگەن قوس كيىز ۇيگە باس سۇعىپ, جايىلعان داستارقاننان ءدام اۋىز ءتيدى. مەرەكە اياسىندا قوناقتارعا «ناۋرىز كادەسى» ۇلەستىرىلىپ, لاڭگى, اسىق اتۋ سەكىلدى ۇلتتىق ويىندار ويناتىلدى.
بۇدان بولەك قالانىڭ ءار اۋدان اكىمدىگىندە دە ءاز-ناۋرىز مەرەكەلەندى. ماسەلەن, اباي اۋدانىنىڭ تۇرعىندارى ۇلىستىڭ ۇلى كۇنىن كيىز ءۇي تىگىپ, ءتۇرلى تاعامدار ءپىسىرىپ, كوپشىلىك ويىن-ساۋىق ءىس-شارالارىن ۇيىمداستىرۋ ارقىلى تويلادى. سوندىقتان ابايلىقتار وتباسىلارىمەن بىرگە اسار شاعىن اۋدانىنداعى ورتالىق الاڭعا جينالىپ, شىعىستىڭ باستى مەرەكەسى, جاڭارعان كوكتەمنىڭ ناقىشىنا اينالعان ناۋرىزدى كوتەرىڭكى كوڭىل كۇيمەن, شات-شادىمان جارقىراعان جۇزبەن اتاپ ءوتتى.
اۋدان اكىمى بۇحارباي پارمانوۆ تۇرعىنداردى ناۋرىز مەيرامىمەن قۇتتىقتاپ, بۇل كۇن بەرەكە مەن بىرلىكتىڭ, مەيىرىمدىلىك پەن ءوزارا سىيلاستىقتىڭ قاسيەتتى مەرەكەسى ەكەنىن تىلگە تيەك ەتتى.
«تامىرى تەرەڭ تارتقان ءاز-ناۋرىز قاي كەزدە دە ەڭسەسى بيىك ەلدىكتىڭ, ىرگەسى سوگىلمەس بىرلىكتىڭ, ىرىس پەن ىنتىماقتىڭ مەرەكەسى بولعان. بۇگىندە ەجەلگى مەيرام ءبىزدىڭ جاڭارعان قوعامىمىزبەن ۇيلەسىم تاۋىپ, وتانىمىزداعى دوستىق پەن كەلىسىمىن نىعايتۋدا ماڭىزدى ءرول اتقارادى. ءاربىر ەلدىڭ تاۋەلسىزدىگى, ۇلتتىق بىرلىگى جانە بەيبىت ءومىرى مەن ءبىر شاڭىراق استىنداعى تاتۋ-ءتاتتى كەشكەن عۇمىرى ونىڭ باستى قۇندىلىعى سانالادى. ءبىز ءۇشىن تاۋەلسىزدىكتەن اسقان مۇرات, ماڭگىلىك ەلدەن اسقان ماقسات جوق! ەجەلدەن جاڭارۋ مەن جاسامپازدىقتىڭ باستاۋى, ىرىس پەن بەرەكەنىڭ ارقاۋى بولعان ءاز-ناۋرىز حالقىمىزدىڭ قاجىرلى ەڭبەگىنىڭ, تولاعاي تابىسىنىڭ باستاۋى بولسىن», دەدى ول.
شاتتىقتى مەرەكەنى تاماشالاۋعا كەلگەن قوناقتارعا №89 مەكتەپ-ليتسەيى مەن دارىندى بالالارعا ارنالعان №90 مەكتەپ-گيمنازياسىنىڭ وقۋشىلارى دۋماندى كونتسەرت قويىپ بەردى. سونىمەن بىرگە قاراپايىم تۇرعىندار دا باستاماشىلىق تانىتىپ, كيىز ۇيلەر تىكتى, داستارقان جايدى. جالپى, جۇرتشىلىق, ناۋرىزدى بىرگە قىزىقتى ەتىپ وتكىزۋگە بارىنشا اتسالىستى. بۇل كۇنى مەرەكەنى بارشاعا سەزدىرۋ ءۇشىن جالپاق جۇرتقا تەگىس ناۋرىز كوجە, سۋمەلەك, باۋىرساق پەن پالاۋ تاراتىلدى. ايتا كەتۋ كەرەك, شىمكەنتتە بەسىنشى اۋداننىڭ قۇرىلۋىنا بايلانىستى اباي اۋدانىنىڭ اۋماعى وزگەرگەن. وسىنىڭ الدىندا اۋدانعا 34 ەلدى مەكەن قارايتىن. ال قازىر ونىڭ سانى 27 ەلدى مەكەنگە قىسقاردى. ءوز كەزەگىندە اسار شاعىن اۋدانى اۋماقتىق ءبولىنىس بارىسىندا اباي اۋدانىنىڭ قۇرامىندا قالدى.
جالپى, « ۇلى قازاق ويىندارى» ۇلتتىق سپورت جارىسى مەن «ناۋرىز شىمكەنتتەن باستالادى» اتتى مەرەكەلىك شارا 22 ناۋرىزدا قورىتىندىلاندى. ال كەشكە قالانىڭ اكىمشىلىك-ىسكەرلىك ورتالىعىنداعى استانا الاڭىندا ەلىمىزدىڭ ەسترادا جۇلدىزدارىنىڭ جانە جەرگىلىكتى ونەرپازداردىڭ قاتىسۋىمەن گالا-كونتسەرت ءوتتى. وسىمەن ءاز-ناۋرىزعا ارنالعان ادەمى باعدارلامالىق ءىس-شارالار جيىنى ءوز مارەسىنە جەتتى.
