كاسىپكەر قايرات بورانباەۆتىڭ ءىسى بويىنشا تاراپتاردىڭ ءجارىسسوزى بۇگىن, 14 ناۋرىزدا استانا قالاسىنىڭ №2 سارىارقا سوتىندا ءوتۋى ءتيىس ەدى. الايدا, مەملەكەتتىك ايىپتاۋشى-پروكۋرور باۋىرجان شەكەنوۆ وزىنە قوسىمشا ۋاقىت بەرۋ تۋرالى سوتقا ءوتىنىش ءبىلدىرىپ, ءىس بويىنشا جاعداي ءبىرشاما وزگەرگەنىن مالىمدەدى.
«قر قىجك-ءنىڭ 340-بابى, 5-بولىمىنە سايكەس, ەگەر باستى سوت تالقىلاۋى بارىسىندا سوتتالۋشىعا نەعۇرلىم اۋىر ايىپ تاعۋ نەمەسە باستاپقى ايىپتان باسقا ايىپ تاعۋ قاجەتتىلىگى تۋىنداسا, سوت ءىستى قاراۋدى كەيىنگە قالدىرادى جانە پروكۋرورعا جاڭا ايىپتاۋ اكتىسىن جاساۋ ءۇشىن قاجەتتى ۋاقىت بەرەدى. وسىعان بايلانىستى ايىپتاۋشى تاراپ جاڭا ايىپتاۋ اكتىسىن تولتىرۋ ءۇشىن ۋاقىت بەرۋدى سۇراپ, ءوتىنىش بىلدىرەدى, ويتكەنى قىلمىستىق ءىس بويىنشا ءمان-جايلار وزگەرەدى جانە بۇل جاڭا اكتىدە كورسەتۋدى تالاپ ەتەدى», دەپ ءتۇسىندىردى پروكۋرور باۋىرجان شەكەنوۆ.
№2 سارىارقا سوتىنىڭ سۋدياسى نازگۇل باپاقوۆا ايىپتاۋشى تاراپتىڭ ءوتىنىشىن قاناعاتتاندىردى. وسىلايشا, سوت وتىرىسى 17 ناۋرىزعا بەلگىلەندى.
ەسكە سالا كەتسەك, قايرات بورانباەۆ پەن «ازيا گازچۋندجا» جشس-ءنىڭ نەگىزىن قالاۋشى رومان ناحانوۆقا وزدەرىنە سەنىپ تاپسىرىلعان بوتەن م ۇلىكتى جىمقىردى, زاڭسىز اقشانى جانە م ۇلىكتى زاڭداستىردى, باسقا دا قىلمىستارعا جاردەم كورسەتتى دەگەن ايىپ تاعىلىپ وتىر.
اتالعان ءىس بويىنشا سوت پروتسەسى 2022 جىلدىڭ 30 جەلتوقسانىندا باستالعانىن اتاپ ءوتۋ كەرەك.
