ەربول قاراشوكەەۆ اۋىل شارۋاشىلىعى جونىندەگى ەۋروكوميسسار يانۋش ۆويتسەحوۆسكيمەن كەلىسسوزدەر بارىسىندا ەل ۇكىمەتىنىڭ ەو-مەن ساۋدا-ەكونوميكالىق ارىپتەستىكتى ودان ءارى كەڭەيتۋگە دايىندىعىن اتاپ ءوتتى. ناقتىراق ايتقاندا, وتاندىق بالىق ونىمدەرىن ەۋرووداق ەلدەرىنە ەكسپورتتاۋ تۋرالى ءسوز بولدى. ءتيىستى كەلىسسوزدەر پروتسەستەرى اياقتالىپ قالدى. فرانتسيا جانە شۆەيتساريا قازاقستاندىق بالىق ونىمدەرىن ساتىپ الاتىنى تۋرالى كەلىسىم بار.
ايتا كەتەيىك, وتكەن جىلدىڭ قورىتىندىسى بويىنشا ەلىمىزدەگى بالىق ونىمدەرىنىڭ ەو ەلدەرىنە ەكسپورتى 1,5 ەسەگە ارتىپ, 8,7 مىڭ توننانى قۇراعان. نەگىزگى تۇتىنۋشىلار پولشا, سلوۆاكيا, چەحيا, نيدەرلاندى, ليتۆا, لاتۆيا, دانيا, اۆستريا جانە گەرمانيا بولدى.
سونداي-اق ەلىمىز ەۋروپالىق نارىققا بال, جىلقى ەتى, سيىر ەتى مەن ءسۇت ونىمدەرىن جەتكىزە الادى.
ال ەۋروكوميسسار ستەللا كيرياكيدەسپەن كەزدەسۋ بارىسىندا قازاقستان مەن ەو ەلدەرى اراسىنداعى ساۋدانى دامىتۋدىڭ وزەكتى ماسەلەلەرى تالقىلاندى.
«بيىل كۇشىنە ەنگەن ميكروبقا قارسى پرەپاراتتاردى پروفيلاكتيكالىق ماقساتتا قولدانۋعا تىيىم سالۋ تۋرالى ەۋروپالىق زاڭناماعا ەنگىزىلگەن وزگەرىستەر ەۋروپالىق مەملەكەتتەردەن قازاقستانعا اسىل تۇقىمدى مالدى ەكسپورتتاۋ كەزىندە قيىندىقتار تۋعىزادى», دەدى كەزدەسۋدە ەربول قاراشوكەەۆ.
وسى ماسەلەنى رەتتەۋ ءۇشىن مينيستر ەكىجاقتى ۆەتەريناريالىق سەرتيفيكاتتارعا وزگەرىستەر ەنگىزۋدى ساراپتامالىق دەڭگەيدە پىسىقتاۋدى ۇسىندى.
سونداي-اق اشم باسشىسى قازاقستانعا جانۋارلار اۋرۋلارىنىڭ اكەلىنۋ قاۋپىن ازايتۋ بويىنشا بىرلەسكەن شارالاردى ازىرلەۋ قاجەتتىگىن اتاپ ءوتتى. مال شارۋاشىلىعىن دامىتۋدىڭ ءتۇرلى باعدارلامالارى اياسىندا ەلگە ەۋروپالىق وداق ەلدەرىنەن 57 مىڭ اسىل تۇقىمدى مال اكەلىندى.
ايتا كەتەيىك, قازاقستاننىڭ سىرتقى ساۋداسىنىڭ شامامەن 30%-ى ەو-نىڭ ۇلەسىنە تيەسىلى. 2022 جىلدىڭ قورىتىندىسى بويىنشا اۋىل شارۋاشىلىعى ءونىمىنىڭ تاۋار اينالىمى 35,6%-عا ءوسىپ, 995,5 ملن دوللاردى قۇراعان. قازاقستاندا زىعىر, بيداي, راپس جانە وڭدەلگەن ءداندى داقىلداردىڭ ەكسپورتى دا ۇلعايعان.
