مەملەكەت باسشىسىنىڭ تاپسىرماسىنا سايكەس, ۇكىمەت پەن پاۆلودار وبلىسىنىڭ اكىمدىگى پاتەرلەردە جانە قالانىڭ الەۋمەتتىك نىساندارىندا تەمپەراتۋرالىق رەجيمدى تۇراقتاندىرۋ بويىنشا كەشەندى شارالار قابىلداپ جاتىر.
پرەمەر-ءمينيستردىڭ ءبىرىنشى ورىنباسارى ەكىباستۇز جەو-دا بولىپ, تاۋلىك بويى جوندەۋ-قالپىنا كەلتىرۋ جۇمىستارى جۇرگىزىلىپ جاتقان ۋچاسكەلەردى ارالادى. بۇگىنگى تاڭدا 5 قازاندىق اگرەگات جانە 11 جەلىلىك سورعى جۇمىس ىستەپ تۇر. تاعى 5 قازاندىق پەن 3 سورعى جوندەلىپ جاتىر. قازاندىقتار جىلۋ وتەتىن جەرلەر جوندەلىپ جاتقاندىقتان توقتاپ تۇر.
جەلىلەردە 19 اقاۋ تىركەلدى, ونىڭ ىشىندە 9-ى – ماگيسترالدىق جەلىلەردە, 10-ى – كۆارتال ىشىندەگى جەلىلەردە. 26 كوپ قاباتتى تۇرعىن ۇيگە بىرنەشە جىلدان بەرى جىلۋ قالىپتى نورمادان تومەن بەرىلىپ كەلەدى. ماسەلەنى شەشۋ ءۇشىن ماماندار ىشكى جىلۋمەن جابدىقتاۋ جۇيەلەرىن, جەتكىزۋ جەلىلەرىن تازالاپ, جوندەۋ جۇمىستارىن جۇرگىزىپ جاتىر.
ر.سكليار جىلۋمەن جابدىقتاۋدا تۋىنداعان پروبلەمالار ۇكىمەت دەڭگەيىندە ەمەس, وبەكتىنىڭ مەنشىك يەسى دەڭگەيىندە شەشىلۋى كەرەك بولعانىن اتاپ ءوتتى. وسىعان بايلانىستى ر.سكليار «واوەك» اق يەلەرىنىڭ ءبىرى سەرگەي كاننىڭ الدىنا «پاۆلودارەنەرگو» اق باس ديرەكتورى ۆاديم لەسيندى جۇمىسىنان بوساتۋ تۋرالى ماسەلە قويدى.
جەو يەسىنە ەكى كۇن مەرزىمدە قاجەتتى بۋمەن قامتاماسىز ەتۋ بويىنشا جول كارتاسىن ازىرلەۋ, سونداي-اق جوندەۋ جۇمىستارىن ورىنداۋ ءۇشىن ماتەريالدار مەن جابدىقتاردى جەتكىزۋدى جەدەلدەتۋ تاپسىرىلدى. ال ەكىباستۇز قالاسىنىڭ اكىمدىگىنە ۇيلەردى ىستىق سۋمەن قامتاماسىز ەتۋدى باقىلاۋ مەن وعان مونيتورينگ جۇرگىزۋدى كۇشەيتۋ تاپسىرىلدى.
«ەكىباستۇز قالاسىندا تاريفتەردىڭ كۇرت وسۋىنە جول بەرمەيمىز. جىلىتۋ ماۋسىمى اياقتالعاننان كەيىن جوندەۋ ناۋقانىن جۇرگىزەمىز», دەدى ر.سكليار.
ەكىباستۇز قالاسىنىڭ اكىمى ايان بەيسەكيننىڭ ايتۋىنشا, ءۇي ىشىندەگى جىلۋ جۇيەسىنە زاقىم كەلگەن 91 ءۇيدىڭ مەنشىك يەلەرىنە جىلۋ ەنەرگياسى ءۇشىن تولەنەتىن سوما بويىنشا 121,9 ملن تەڭگەگە قايتا ەسەپتەۋ جۇرگىزىلدى. جەلتوقسان ايىندا ستانتسيا يەسىنىڭ ەسەبىنەن جالپى سوماسى 241,8 ملن تەڭگەگە ەلەكتر ەنەرگياسى ءۇشىن وتەماقى تولەندى. بيىلعى قاڭتار ايىندا ەكىباستۇز تۇرعىندارىنىڭ جىلۋمەن جابدىقتاۋ قىزمەتتەرىنە تولەيتىن سوماسىنىڭ 70%-ى شەگەرىلدى.
ەكىباستۇز قالاسىنا جۇمىس ساپارى كەزىندە رومان سكليار ۇيلەردەگى جوندەۋ جۇمىستارىنىڭ بارىسىمەن تانىسىپ, تۇرعىندارمەن دە سويلەستى. بۇگىنگى تاڭدا 152 پاتەردە جوندەۋ جۇمىستارى اياقتالدى. 42 بريگادا جۇمىلدىرىلدى. بارلىعى 252 پاتەردە جوندەۋ جۇمىستارى جۇرگىزىلەدى.
سونىمەن قاتار ر.سكليار №7 جانە №11 جالپى ورتا ءبىلىم بەرەتىن مەكتەپتەرگە باردى. جەكەلەگەن كابينەتتەردە اۋا تەمپەراتۋراسى 16-17 گرادۋستان اسپايدى, جىلۋمەن قامتاماسىز ەتۋدە ىركىلىستەر بار. 7 اقپاننان باستاپ ەكىباستۇزدىڭ وقۋ ورىندارى قاشىقتان وقىتۋ فورماتىنا اۋىستىرىلدى, بالاباقشالاردا كەزەكشى توپتار ۇيىمداستىرىلدى. 13 اقپاننان باستاپ ءبىلىم بەرۋ مەكەمەلەرى شتاتتىق رەجيمدە جۇمىس ىستەي باستايدى.
