قوستاناي ستانتسياسىنداعى جەلىلىك پوليتسيا ءبولىمىنىڭ قىزمەتكەرلەرى جەدەل-ىزدەستىرۋ ءىس-شارالارىن جۇرگىزۋ بارىسىندا ەسىرتكى زاتتارىن ساقتاعان قوستاناي وبلىسىنىڭ 55 جاستاعى تۇرعىنىن انىقتاپ, ۇستادى.
«جەكە ءتىنتۋ شارالارى كەزىندە ۇستالعان ازاماتتان پسيحوتروپتىق زات سالىنعان ءۇش پوليمەرلىك تۇيىنشەك تابىلىپ, تاركىلەندى. جۇرگىزىلگەن ساراپتاما قورىتىندىسى بويىنشا تاركىلەنگەن زاتتىڭ جالپى سالماعى 2,30 گرامم, ءىرى مولشەردەگى الفا-PVP سينتەتيكالىق ەسىرتكى زاتى ەكەندىگى انىقتالدى», دەپ جازىلعان Polisia.kz تاراتقان حابارلامادا.
اتالعان دەرەك قر قك-ءنىڭ 296-بابىنىڭ 4-بولىگى (ەسىرتكى, پسيحوتروپتىق زاتتارمەن, سول تەكتەستەرمەن وتكىزۋ ماقساتىنسىز زاڭسىز جۇمىس ىستەۋ) بويىنشا تىركەلدى. قازىرگى ۋاقىتتا سوتقا دەيىنگى تەرگەپ-تەكسەرۋ جۇمىستارى جۇرگىزىلىپ جاتىر.
