الماتىدا مەملەكەتتىك قىزمەتتىڭ 96%-ى تسيفرلى فورماتتا كورسەتىلەدى

«بۇگىنگى فورۋم  كوز الدىمىزدا بولىپ جاتقان سول تەكتونيكالىق وزگەرىستەردىڭ كەڭ اۋقىمىن كورسەتەدى. مەملەكەتتىك باسقارۋدىڭ تسيفرلىق ترانسفورماتسياسى، روبوتتاندىرۋ، كيبەرقاۋىپسىزدىك، قارۋلى كۇشتەردى تسيفرلاندىرۋ، ءبىلىم بەرۋ جۇيەلەرى، قالالىق ۇتقىرلىق جانە سمارت قالا تۇجىرىمدامالارى ەكى كۇن بويى تسيفرلى الماتىدا تالقىلاناتىن تاقىرىپتاردىڭ ءبىر پاراسى عانا»، دەپ اتاپ ءوتتى الماتى اكىمى.

اكىم ايتىپ وتكەندەي، تسيفرلى ترانسفورماتسيا ماسەلەلەرىنىڭ وزەكتىلىگىن اسىرا باعالاۋ مۇمكىن ەمەس. الەم جىلدام وزگەرىپ جاتىر جانە كەڭىنەن تارالعان تسيفرلاندىرۋ وسى پروگرەستىڭ نەگىزگى قوزعالتقىشتارىنىڭ ءبىرى بولىپ تابىلادى.

الماتىدا تسيفرلاندىرۋدىڭ ەنۋ دەڭگەيى قازاقستانداعى ەڭ جوعارى كورسەتكىشتەردىڭ ءبىرى سانالادى. بۇگىندە قالادا مەملەكەتتىك قىزمەتتەردىڭ 96 پايىزى تسيفرلى فورماتتا كورسەتىلەدى. 

وتكەن جىلدىڭ شىلدە ايىندا الماتى الەمدەگى جەتەكشى ThoughtLab زەرتتەۋ كومپانياسىنىڭ (نيۋ-يورك) باعالاۋى بويىنشا تسيفرلىق دامۋ ستراتەگيالارىنىڭ دايىندىعى بويىنشا العاش رەت ازياداعى ۇزدىك قالالاردىڭ بەستىگىنە ەندى.

وتكەن جىلدىڭ قىركۇيەگىندە الماتى قالاسى «الماتى دەرەكتەر كولى – بىرىڭعاي دەرەكتەردى ساقتاۋ» جوباسىمەن IEEE Smart Cities Awards حالىقارالىق «اقىلدى قالالار» بايقاۋىنىڭ ءفيناليستى بولدى.

قابىلدانعان قالانى دامىتۋ باعدارلاماسىنداعى 7 نەگىزگى باسىمدىقتىڭ ءبىرى – «الماتى – Smart City» قۇرۋ. بيىلعى جىلدىڭ كۇزىنە قاراي سينگاپۋر مەن شانحاي سياقتى مەگاپوليستەرگە ۇقساس قالانىڭ «تسيفرلىق ەگىزىن» قۇرۋدى باستاۋ جوسپارلانىپ وتىر.

«الماتىنى ودان ءارى دامىتۋدىڭ ماڭىزدى جوبالارى قالانى باسقارۋدى جەتىلدىرەتىن باسقا دا جۇيەلى پلاتفورمالىق شەشىمدەر بولىپ تابىلادى. بۇل قالانىڭ بىرىڭعاي دەرەكتەر قويماسى، بىرىڭعاي گەواناليتيكالىق پلاتفورما. بىرىڭعاي بەينەباقىلاۋ جۇيەسى بيىل الماتى قالاسىنىڭ 80 پايىزىن قامتيدى. بۇل تسيفرلاندىرۋ ءۇشىن تسيفرلاندىرۋ ەمەس، ەڭ الدىمەن، جايلى قالالىق ورتانى قۇرۋ جانە قالا تۇرعىندارى مەن قوناقتارىنىڭ قاۋىپسىزدىگىن قامتاماسىز ەتۋ»،  دەپ ءسوزىن تۇيىندەدى ە. دوساەۆ.