شىمكەنتتە توبەلەس ۇيىمداستىرماق بولعاندار ۇستالدى

قالالىق پروكۋراتۋرانىڭ قاتىسۋىمەن جەدەل-ىزدەستىرۋ ءىس-شارالارىن جۇرگىزۋ بارىسىندا شىمكەنت قالاسى پد ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى  قالا اۋماعىنداعى بىرنەشە مەكەنجايدا كۇدىكتىلەردى ۇستاۋ جۇمىستارىن جۇرگىزدى. 

ناتيجەسىندە پوليتسياعا 25-38 جاس ارالىعىنداعى 10 ادام جەتكىزىلدى. ولاردىڭ ۇشەۋى سوت شەشىمىمەن قامالدى، ەكەۋى ۇيقاماققا الىندى. قالعاندارىنىڭ ءرولى سوتقا دەيىنگى تەرگەۋ بارىسىندا انىقتالادى. ولاردان زاتتاي دالەلدەمەلەر رەتىندە ماكاروۆ جانە تت تاپانشالارى، 4 تراۆماتيكالىق تاپانشا، اك-103 اۆتوماتى، 12 كاليبرلى متس 21-12 وزدىگىنەن وقتالاتىن مىلتىعى  جانە 410 كاليبرلى  وزدىگىنەن وقتالاتىن سايگا-410 كارابينى، 16 كاليبرلى قوس اۋىزدى تەگىس ۇڭعىلى توز مىلتىعى، سونداي-اق ءارتۇرلى كاليبرلى 93 وق-ءدارى تاركىلەندى.

تەرگەۋشىلەر سوتقا دەيىنگى تەرگەپ-تەكسەرۋ بارىسىندا وسى جىلدىڭ قاڭتار ايىنىڭ باسىندا ءبىر توپ ادام  جەرگىلىكتى تۇرعىندى ۇرلاپ، قالا سىرتىنا الىپ كەتكەنىن انىقتادى. ولار ونى ۇرىپ-سوعىپ، پنەۆماتيكالىق قارۋمەن جارالاعان. ەر ادام زاڭدى تۇردە پوليتسياعا جۇگىنۋدىڭ ورنىنا، قىلمىسكەرلەردەن كەك الۋ ماقساتىندا ءوزىنىڭ تانىستارىن قارۋلاندىرىپ، قارۋ-جاراق الا باستاعان. بىراق پوليتسيانىڭ كاسىبي جانە جەدەل ارەكەتىنىڭ ارقاسىندا ادام شىعىنىنا اكەپ سوعۋى مۇمكىن قارۋلى قاقتىعىستى توقتاتۋ مۇمكىن بولدى.

قازىرگى ۋاقىتتا اتالعان دەرەككە قاتىستى شىمكەنت قالاسى پد-نىڭ تەرگەۋ باسقارماسى قر قك-ءنىڭ 287-بابى 4-بولىگى  (ادامدار توبىنىڭ اتىس قارۋى مەن وق-دارىلەردى زاڭسىز ساتىپ الۋى، ساقتاۋى، الىپ ءجۇرۋى نەمەسە تاسىمالداۋى) بويىنشا سوتقا دەيىنگى تەرگەۋ امالدارىن جۇرگىزىپ جاتىر.