قازۇۋ مەن لوندون ۋنيۆەرسيتەتتەرى اراسىندا مەموراندۋمعا قول قويىلدى

ۇلىبريتانيا استاناسىندا ورنالاسقان جوعارى وقۋ ورنىنىڭ كامپۋسىن ارالاعاننان كەيىن قازۇۋ رەكتورى جانسەيىت تۇيمەباەۆ لوندون ۋنيۆەرسيتەتى شىعىستانۋ جانە افريكاتانۋ مەكتەبىنىڭ ديرەكتورى ادام حابيبپەن كەزدەستى.

ۋنيۆەرسيتەت باسشىسى جىلى قابىلداعانى ءۇشىن ءبىلىم ورداسىنىڭ ديرەكتورى ادام حابيبكە ريزاشىلىعىن ءبىلدىرىپ، قازۇۋ-دىڭ جەتكەن جەتىستىكتەرى مەن الداعى جوسپارلارى تۋرالى باياندادى. 

«قازۇۋ وتكەن جىلى QS حالىقارالىق رەيتينگىندە الەمنىڭ ۇزدىك ۋنيۆەرسيتەتتەرى اراسىندا 150-ورىنعا كوتەرىلدى. ازيا ەلدەرى اراسىندا وقۋ ورداسى 44-ورىندا. قازىرگى تاڭدا ۋنيۆەرسيتەتتە 26 مىڭعا جۋىق ستۋدەنت وقيدى. ونىڭ ىشىندە 3000 ستۋدەنت شەتەلدەردەن كەلىپ، ءبىلىم الىپ جاتىر. الداعى ۋاقىتتا وزگە مەملەكەتتەردەن قازۇۋ-عا تۇسەتىن ستۋدەنتتەر سانىن ارتتىرۋ جوسپاردا بار. باستى مىندەت – شەتەلدىك ستۋدەنتتەر ۇلەسىن 2025 جىلعا قاراي 10 پايىزدان 25 پايىزعا دەيىن ۇلعايتۋ. ءبىزدىڭ ۋنيۆەرسيتەت ءوزىنىڭ عىلىمي جانە ءبىلىم بەرۋ قىزمەتىن تابىستى جالعاستىرىپ كەلەدى. تەك ۇلتتىق اۋقىمدا عانا ەمەس، سونىمەن قاتار حالىقارالىق دەڭگەيدە زياتكەرلىك الەۋەتىن كورسەتىپ وتىر. ۋنيۆەرسيتەت عالىمدارى وتاندىق عىلىمدى دامىتۋعا ءوز ۇلەستەرىن قوسىپ جاتىر. وقۋ ورداسىندا 100-دەن استام يننوۆاتسيالىق جوبا دايىندالدى. بۇگىندە ولاردى ىلگەرىلەتۋ جانە كوممەرتسيالاندىرۋ باعىتىندا جۇمىس جۇرگىزىلۋدە»، - دەدى ۋنيۆەرسيتەت رەكتورى.

ءوز كەزەگىندە ادام حابيب قازۇۋ-دىڭ جەتىستىكتەرىن جوعارى باعالاپ، لوندون ۋنيۆەرسيتەتى شىعىستانۋ جانە افريكاتانۋ مەكتەبى تۋرالى اقپارات بەردى. سونىمەن قاتار ۇلىبريتانياداعى ۇزدىك 40 جوو قاتارىنا كىرەتىن ۋنيۆەرسيتەت قازۇۋ-مەن تىعىز قارىم-قاتىناستا بولىپ، سەرىكتەستىكتى ودان ءارى ارتتىرۋعا دايىن ەكەنىن ايتتى. 

كەزدەسۋ سوڭىندا ءال-فارابي اتىنداعى قازاق ۇلتتىق ۋنيۆەرسيتەتى مەن لوندون ۋنيۆەرسيتەتى اراسىندا اكادەميالىق ىنتىماقتاستىق پەن الماسۋدىڭ نەگىزگى باعىتتارىن ايقىندايتىن مەموراندۋمعا قول قويۋ ءراسىمى ءوتتى. كەلىسىم اياسىندا قوس تاراپ عىلىمي جاريالانىمدارمەن، اقپاراتتارمەن، وقىتۋشىلار قۇرامىمەن جانە عالىمدارمەن، ستۋدەنتتەرمەن الماسۋعا، سونداي-اق بىرلەسكەن زەرتتەۋلەرگە جاردەمدەسەتىن بولادى.

سونىمەن قاتار قازۇۋ باسشىسى كينگس كوللەدجىندە  «بولاشاق» جانە «500 عالىم» باعدارلاماسى بويىنشا  وقىپ جاتقان  قازۇۋ-دىڭ وقىتۋشى-پروفەسسورلار قۇرامىنىڭ وكىلدەرىمەن  كەزدەستى.  

قازۇۋ رەكتورى جانسەيىت تۇيمەباەۆتىڭ لوندونعا ساپارى اياسىندا ساۋدا-ەكونوميكالىق، عىلىمي-تەحنيكالىق جانە مادەني ىنتىماقتاستىق جونىندەگى قازاقستان-بريتان ۇكىمەتارالىق كوميسسياسىنىڭ 9-شى وتىرىسىنا قاتىسۋ، سونداي-اق لافبورو جانە رەدينگ ۋنيۆەرسيتەتتەرىنە بارۋ جوسپارلانعان.