ءبىرىنشى كەزەكتە ۇكىمەت باسشىسى يننوۆاتسيالىق تەحنولوگيالاردى قولدانا وتىرىپ, جەمىس-جيدەكتەردى تەرەڭ وڭدەيتىن «Fruit Art» جشس ەكسپورتتىق كلاستەرىنە باردى. كاسىپورىننىڭ ءونىمى دامىعان ەلدەردىڭ نارىقتارىنا (تاماق ونەركاسىبى جانە بولشەك ساۋدا جەلىلەرى), سونىڭ ىشىندە ەو, اقش, جاپونيا جانە وڭتۇستىك كورەياعا جەتكىزىلەدى.
سونداي-اق پرەمەر-مينيستر وبلىستىڭ اۋىل شارۋاشىلىعى قۇرىلىمدارىنىڭ باسشىلارىمەن كەزدەسىپ, سۋبسيديالاۋ, اينالىم قاراجاتىمەن قامتاماسىز ەتۋ, سۋ جانە گاز كوزدەرىن قولجەتىمدى ەتۋ, جەم-ءشوپ, ۆەتەريناريالىق پرەپاراتتار, تۇقىمدار, تىڭايتقىشتار, پەستيتسيدتەر, گەربيتسيدتەر, اۋىل شارۋاشىلىعى تەحنيكاسى جانە ت. ب. ساتىپ الۋ ماسەلەلەرىن تالقىلادى.
«بۇرىن ونىمدىلىككە تىكەلەي اسەر ەتەتىن سۋبسيديالاردى عانا قالدىرۋ ءۇشىن سۋبسيديالاۋ جۇيەسىن وزگەرتۋ جوسپاردا بولعان. بىراق فەرمەرلەرمەن كەڭەسكەننەن كەيىن ءبىز قولدانىستاعى كەيبىر سۋبسيديالاۋ ستاندارتتارىن ساقتاپ قالۋ تۋرالى ورتاق كەلىسىمگە كەلدىك. ءوز تاراپىنان اۋىل شارۋاشىلىعى تاۋارىن وندىرۋشىلەر ازاماتتاردى قولجەتىمدى باعادا ساپالى ونىممەن قامتاماسىز ەتۋگە ءتيىس», دەدى پرەمەر-مينيستر.
سونىمەن قاتار ءاليحان سمايىلوۆ الداعى جىلدارى ۇكىمەت شارۋالارعا قاجەتتى سۋ كولەمىن جەتكىزىپ بەرۋ ءۇشىن كانالدار مەن گيدرونىسانداردى سالۋعا جانە جاڭعىرتۋعا قوسىمشا قاراجات بولەتىنىن ايتتى.
ودان كەيىن پرەمەر-مينيستر 2022 جىلى ىسكە قوسىلعان جانە جىلىنا 15 مىڭعا دەيىن ءونىم شىعاراتىن «Nauryz Agro KZ» جشس برويلەرلىك قۇس فابريكاسىنىڭ جۇمىسىمەن تانىستى. بارلىق الەمدىك ستاندارتتارعا سايكەس كەلەتىن كاسىپورىننىڭ ءوز ينكۋباتورى بار جانە قازىرگى ۋاقىتتا ەت وڭدەۋ تسەحىنىڭ قۇرىلىسى ءجۇرىپ جاتىر.
ءاليحان سمايىلوۆ قۇس فابريكاسىنىڭ ءوڭىر ەكونوميكاسى ءۇشىن عانا ەمەس, ىشكى نارىقتى وتاندىق ازىق-ت ۇلىكپەن قامتاماسىز ەتۋ ءۇشىن دە ماڭىزدى زور ەكەنىن ايتتى.
«ازىق-ت ۇلىك قاۋىپسىزدىگى – بۇگىنگى كۇننىڭ باستى سىن-قاتەرلەرىنىڭ ءبىرى. وبلىس اكىمدىگى ءوز ونىمدەرىنىڭ باسەكەگە قابىلەتتىلىگىن جانە اگروونەركاسىپ كەشەنىندەگى جۇمىسپەن قامتۋ دەڭگەيىن ارتتىرۋ ءۇشىن وسىنداي جوبالارعا قولداۋ كورسەتۋى قاجەت», دەدى پرەمەر-مينيستر.
سونىمەن قاتار ۇكىمەت باسشىسى تەز دايىندالاتىن تاماق ونىمدەرىن وندىرۋمەن اينالىساتىن «مارەۆەن فۋد تيان-شان» جشس كاسىپورنىنا باردى. ءوز ونىمدەرىن ىشكى نارىققا دا, جاقىن شەت ەلدەرگە دە ساتىپ وتىرعان زاۋىتتا 850 ادام جۇمىس ىستەيدى. وتكەن جىلى مۇندا الكوگولسىز سۋسىنداردىڭ جاڭا جەلىسى ىسكە قوسىلدى. ءوندىرىس قۋاتتى جىلىنا 78 ملن بوتەلكەنى (ليمونادتار جانە ت.ب.) قۇرادى. قوسىمشا 90 جۇمىس ورنى قۇرىلدى.
ءاليحان سمايىلوۆتىڭ ايتۋىنشا, بۇل زاماناۋي زاۋىت – شەتەلدىك ينۆەستيتسيانىڭ قاتىسۋىمەن ىسكە اسىپ جاتقان تابىستى جوبانىڭ ناقتى كورىنىسى.
«بۇگىنگى تاڭدا ءونىمنىڭ 70%-دان استامى ەكسپورتقا جىبەرىلەدى, بۇل وڭىردەگى تاماق ونەركاسىبىن دامىتۋ الەۋەتى قانشالىقتى جوعارى ەكەنىن كورسەتەدى. وسىعان بايلانىستى جەرگىلىكتى بيلىك جۇمىس ىستەپ تۇرعان كاسىپورىنداردى جاڭعىرتۋ جانە ولاردى كەڭەيتۋ ماسەلەلەرى بويىنشا جاردەمدەسۋى قاجەت», دەدى پرەمەر-مينيستر.
