– قۇرمەتتى مينيستر مىرزا! «Egemen Qazaqstan» گازەتىنە سۇحبات بەرۋگە كەلىسكەنىڭىز ءۇشىن العىس ايتامىز. ەڭ اۋەلى ەكى ەل اراسىنداعى قارىم-قاتىناستان باستاساق. بيىل ديپلوماتيالىق بايلانىس ورناعانىنا 30 جىل تولىپ وتىر. قازىرگى تاڭدا قازاقستان-قىرعىزستان قاتىناسى قاي دەڭگەيدە دامىپ وتىر؟
– بيىلعى قازاندا مەملەكەتارالىق قارىم-قاتىناسىمىزعا 30 جىل تولدى. قىرعىز-قازاق قارىم-قاتىناسىندا جوعارى باسشىلىقتىڭ بايلانىستارى ەرەكشە ءرول اتقارادى. بۇگىنگى تاڭدا مەملەكەتتەر باسشىلارىنىڭ اراسىندا بەلسەندى ساياسي ديالوگ ورناعان. قىرعىز-قازاق ىنتىماقتاستىعىنا قىرعىزستان پرەزيدەنتى سادىر جاپاروۆتىڭ وتكەن جىلعى قازاقستانعا مەملەكەتتىك ساپارى جانە قازاقستان باسشىسىنىڭ مامىر ايىندا قىرعىز-قازاق ارىپتەستىگىن تەرەڭدەتۋگە زور ۇلەس قوسقان بىشكەككە رەسمي ساپارى وڭ سەرپىن بەردى. مامىرداعى كەزدەسۋدە قىرعىزستان مەن قازاقستان پرەزيدەنتتەرى ەكى ەلدىڭ سوڭعى وتىز جىلداعى ءوزارا ءىس-قيمىلىن جوعارى باعالاپ, ەكىجاقتى ىنتىماقتاستىقتى ودان ءارى دامىتۋ جوسپارلارىن بەلگىلەدى.
وسى جىلدار ارالىعىندا مەملەكەتتەرىمىز اراسىندا شارتتىق-قۇقىقتىق بازا قالىپتاستى, 267-دەن استام مەملەكەتارالىق, ۇكىمەتارالىق جانە ۆەدومستۆوارالىق ەكىجاقتى قۇجاتقا قول قويىلدى. سونىڭ ىشىندە ماڭگىلىك دوستىق تۋرالى شارت پەن وداقتاستىق قاتىناستار تۋرالى شارت ىرگەتاس سانالادى. قىرعىزستان مەن قازاقستان اراسىنداعى ستراتەگيالىق جانە وداقتاستىق ارىپتەستىك جوعارى مەملەكەتارالىق كەڭەس, پارلامەنتارالىق كەڭەس, ۇكىمەتارالىق كەڭەس جانە سىرتقى ىستەر مينيسترلەرى كەڭەسى سەكىلدى ەكىجاقتى ورگانداردىڭ قالىپتاسۋىنا جاعداي جاسادى. بۇل كەلىسسوز الاڭدارىندا اسكەري-ساياسي, ساۋدا-ەكونوميكالىق جانە مادەني-گۋمانيتارلىق ماسەلەلەر بويىنشا قىرعىز-قازاق ىنتىماقتاستىعىن ۇزاقمەرزىمدى جانە تۇراقتى دامىتۋدىڭ ورتاق ستراتەگيالىق ماقساتتارى, تۇجىرىمدامالىق تاسىلدەرى مەن باعىتتارى تالقىلانادى. ديپلوماتيالىق بايلانىس ورناعالى بەرى تاتۋ كورشىلىك پەن دوستىق قارىم-قاتىناستىڭ بەرىك ىرگەتاسى قالانعانىن اتاپ وتكىم كەلەدى. جىل سايىن ءوزارا ساۋدا مەن ينۆەستيتسيا كولەمىنىڭ ارتۋى, ىسكەرلىك, عىلىمي جانە مادەني بايلانىستاردىڭ جاندانۋى بايقالادى.
– بيىل مەملەكەت باسشىلارىنىڭ كەزدەسۋى وتكەنى, قازاقستان پرەزيدەنتى قىرعىزستانعا بارعانى بەلگىلى. بۇل كەزدەسۋدە كوپتەگەن كەلىسىمگە قول جەتكىزىلدى. ساپار بارىسىندا قول قويىلعان كەلىسىمدەردىڭ ورىندالۋى قالاي ءجۇرىپ جاتىر؟
– بۇل ساپاردا حالىقتارىمىزدىڭ تۇپكى مۇددەلەرىنە جاۋاپ بەرەتىن قارىم-قاتىناستى نىعايتۋعا جانە ودان ءارى دامىتۋعا باعىتتالعان بۇكىل سالادا كەلىسىمدەرگە قول جەتكىزىلدى. ەكى ەلدىڭ ءتيىستى مەملەكەتتىك ورگاندارى ءبىر-بىرىمەن تىعىز قارىم-قاتىناس ورناتىپ, وسى كەلىسىمدەردى جۇزەگە اسىرۋ تەتىكتەرىن پىسىقتاۋعا كىرىسكەن. ۇكىمەت قۇرىلىمدارى بىرقاتار ەكىجاقتى كەلىسسوز جۇرگىزدى. سولاردىڭ قاتارىندا ساۋدانى ءارتاراپتاندىرۋ, قىرعىز-قازاقستان مەملەكەتتىك شەكاراسى ارقىلى جۇكتەردى تاسىمالداۋ جانە ترانزيتتەۋ, ونەركاسىپتىك ساۋدا-لوگيستيكا كەشەنى, قامبار-اتا گەس-1 قۇرىلىسى سەكىلدى ماسەلەلەر قارالادى.
سونىمەن قاتار مەملەكەتتەر باسشىلارى لوگيستيكا, ونەركاسىپتىك كووپەراتسيا, اۋىل شارۋاشىلىعى, ەنەرگەتيكا جانە كولىك سالالارىندا بىرلەسكەن كاسىپورىندار مەن جوبالار قۇرۋ ارقىلى ءوزارا ساۋدا دەڭگەيىن 2 ميلليارد دوللارعا دەيىن جەتكىزۋ مىندەتىن قويدى. 2022 جىلدىڭ ءبىرىنشى جارتىجىلدىعىندا ءوزارا تاۋار اينالىمى 568 ميلليون دوللاردى قۇراسا, بىلتىرعى وسى مەرزىممەن سالىستىرعاندا ءوسۋ قارقىنى 24 پايىزدى قۇرادى. بۇل كورسەتكىش ۇلكەن بولماسا دا, تۇپكى ماقساتقا جەتۋدەگى تاباندىلىعىمىزدى كورسەتەدى. ساۋدا قاتىناسىن رەتكە كەلتىرۋدە ءبىراز كۇش سالۋ قاجەت.
ىندەتكە بايلانىستى شەشىمىن تاپپاعان كەيبىر ماسەلەلەر قازىردىڭ وزىندە جۇزەگە اسىرىلدى. قىرعىز-قازاق شەكاراسىنداعى جەرۇستى وتكىزۋ بەكەتتەرى, ەكىجاقتى جولاۋشىلار كولىگى, سونىڭ ىشىندە اۋە, تەمىرجول جانە اۆتوموبيل كولىگى تولىق جۇمىس ىستەي باستادى.
– مەملەكەتتەر باسشىلارىنىڭ كەزدەسۋىندە قازاقستان مەن قىرعىزستان اراسىنداعى ءبىرىنشى ايماقارالىق ىنتىماقتاستىق فورۋمى تالقىلانعانى بەلگىلى. وسى باعىتتاعى جۇمىستارىڭىز تۋرالى ايتىپ وتسەڭىز.
– ايماقارالىق ىنتىماقتاستىق – قىرعىزستان مەن قازاقستان اراسىنداعى ەكىجاقتى قاتىناستاردىڭ اجىراماس بولىگى. ول قىرعىز-قازاق ىنتىماقتاستىعىن دامىتۋدا ماڭىزدى ءرول اتقارادى. وسىنى نەگىزگە الا وتىرىپ, پرەزيدەنتتەرىمىز ىنتىماقتاستىقتىڭ وسى سالاسىنا ءجىتى نازار اۋدارىپ, ونىڭ ىسكە اسىرىلماعان الەۋەتىن, ەڭ الدىمەن, ساۋدا-ەكونوميكالىق جانە مادەني-گۋمانيتارلىق بايلانىستارداعى مۇمكىندىكتەرىن اتاپ كورسەتتى. وسى تۇرعىدا وڭىرارالىق فورۋم پرەزيدەنتتەرىمىزدىڭ تاۋار اينالىمىن 2 ملرد دوللارعا دەيىن جەتكىزۋ جونىندەگى تاپسىرمالارىن ورىنداۋعا ىقپال ەتەدى.
مامىرداعى كەزدەسۋدە مەملەكەتتەر باسشىلارى ەكى ەلدىڭ التى ءوڭىرى اراسىنداعى ىنتىماقتاستىق تۋرالى ءتيىستى قۇجاتتارعا قول قويىلعانىن قۇپتاپ, ءبىرىنشى قىرعىز-قازاق وڭىرارالىق فورۋمىن وتكىزۋ جوسپارىن قولدادى. قازىرگى ۋاقىتتا ەكى ەلدىڭ ءتيىستى مەملەكەتتىك ورگاندارى مەملەكەتتەر باسشىلارى اراسىنداعى ۋاعدالاستىقتاردى جۇزەگە اسىرۋ اياسىندا اتالعان ءىس-شارانىڭ مازمۇنىن پىسىقتاپ, ونى وتكىزۋ مەرزىمىن كەلىسىپ جاتىر. وڭىرارالىق ىنتىماقتاستىق فورۋمى ەكى ەلدىڭ وبلىستارى مەن قالالارى اراسىنداعى بايلانىستى كەڭەيتۋ جانە ىسكەر توپتار, ىسكەر قاۋىمداستىقتار مەن كاسىپورىندار اراسىندا تىكەلەي بايلانىس ورناتۋ ءۇشىن ماڭىزدى الاڭعا اينالاتىنىنا سەنىمدىمىن.
– قىرعىزستان مەن قازاقستان اراسىنداعى, جالپى ورتالىق ازياداعى وزەكتى ماسەلەلەردىڭ ءبىرى – سۋ, ياعني ترانسشەكارالىق وزەندەر. وزدەرىڭىز بىلەسىزدەر, قازاقستانعا قۇياتىن وزەندەردىڭ ءبىر بولىگى قىرعىزستاننان باستاۋ الادى. سۋ ماسەلەسىن شەشۋدەگى جۇمىستار تۋرالى ايتا كەتسەڭىز؟
– بۇگىندە ورتالىق ازيا ءوڭىرى ءتۇرلى سەبەپتەرگە بايلانىستى سۋ رەسۋرستارىنىڭ تاپشىلىعىن سەزىنىپ وتىر. وڭىردەگى ەلدەر كليماتتىڭ وزگەرۋى, ەنەرگەتيكالىق, الەۋمەتتىك-ەكونوميكالىق, ەكولوگيالىق جانە باسقا فاكتورلاردىڭ اسەرىن ەسكەرە وتىرىپ, سۋ-ەنەرگەتيكا ماسەلەلەرىنە كەشەندى كوزقاراستىڭ بولماۋى تۇراقتى دامۋعا كەدەرگى كەلتىرۋى مۇمكىن ەكەنىن ءتۇسىنۋ كەرەك. سوندىقتان قىرعىزستان ايماقتاعى سۋ رەسۋرستارىن كەشەندى پايدالانۋدا ورتالىق ازيانىڭ بارلىق مەملەكەتىنىڭ وڭتايلى دامۋىنا باعىتتالعان شارالار جۇيەسىن انىقتاۋدى قولدايدى.
وسىنداي ءوزارا ءىس-قيمىلدىڭ مىسالى رەتىندە قىرعىزستان مەن قازاقستاننىڭ شۋ جانە تالاس وزەندەرى بويىنشا ىنتىماقتاستىعى تاجىريبەسىن كەلتىرە الامىن. وندا قازاقستان تاراپى مەملەكەتارالىق سۋ شارۋاشىلىعى نىساندارىن ۇستاۋعا جۇمسالعان شىعىنداردى وتەۋگە ۇلەس قوسادى. سونداي-اق الىنعان سۋ كولەمىنە پروپورتسيونالدى تۇردە كەلىسىلگەن ءىس-شارالاردى جۇزەگە اسىرادى. بۇل تاراپتاردىڭ ءىس-ارەكەتتەرىن ۇيلەستىرۋ سۋ جونىندەگى ۇكىمەتارالىق كوميسسيا دەڭگەيىندە ورىندالادى.
بۇل ءوزارا ءتيىمدى ىنتىماقتاستىق تاجىريبەسىن ءوڭىردىڭ سۋ رەسۋرستارىن ءوزارا تيىمدىلىككە قول جەتكىزۋ ماقساتىندا پايدالانۋ ءۇشىن وبلىستىڭ باسقا وزەن باسسەيندەرىندە قولدانا الامىز. ءبىز سونداي-اق قازاقستاننىڭ قىرعىزستانداعى گيدروەنەرگەتيكالىق جوبالارعا ينۆەستيتسيا قۇيۋىن قۇپتايمىز. بۇل سۋ-ەنەرگەتيكا سالاسىنداعى ەكىجاقتى ىنتىماقتاستىقتى ودان ءارى دامىتۋعا جانە نىعايتۋعا كۇشتى سەرپىن بەرەدى. قىرعىزستان ءوز تاراپىنان ايماق مەملەكەتتەرىنىڭ مۇددەلەرىن ەسكەرە وتىرىپ, سۋ-ەنەرگەتيكا ماسەلەلەرىنىڭ بارلىق كەشەنى بويىنشا جان-جاقتى جانە سىندارلى ديالوگكە ارقاشان اشىق.
– سۋ تاقىرىبىنان اۋىتقىمايىق. قازىر جاھاندىق جىلىنۋدىڭ سالدارىنان جەر بەتىندەگى مۇزداقتار وراسان زور قارقىنمەن ەرىپ جاتقانى بەلگىلى. وسى ورايدا قىرعىزستان ەلدەگى مۇزداقتاردىڭ جويىلۋىن بولدىرماۋ ءۇشىن قانداي شارالار قابىلداپ جاتىر؟
– قىرعىزستان اۋماعىنىڭ 90 پايىزدان استامىن حالىقتىڭ ءال-اۋقاتىن قامتاماسىز ەتەتىن سۋعا, ازىق-ت ۇلىككە, ەنەرگەتيكالىق جانە باسقا دا رەسۋرستارعا باي تاۋلار الىپ جاتىر. بيىك قىراتتاردان باستاۋ الاتىن وزەندەر ورتالىق ازياداعى سۋ رەسۋرستارىنىڭ 40 پايىزىن قۇرايدى. قىرعىزستاننىڭ تاۋلى ەكوجۇيەلەرى كليماتتىق وزگەرىستەردەن زارداپ شەگىپ وتىر. ورتالىق ازيادا سونىڭ سالدارىنان وڭىردەگى بۇكىل مۇزداقتىڭ تورتتەن بىرىنە جۋىعى ەرىپ كەتكەن. قىرعىزستانداعى جاھاندىق جىلىنۋدىڭ تەرىس اسەرىنە 2022 جىلعى شىلدەدە بريتاندىق
تۋريستەردىڭ كوزىنشە ىستىقكول شاتقالىندا ۇلكەن مۇزدىڭ وپىرىلۋى مىسال بولا الادى.
عاسىرلار بويى قالىپتاسقان مۇزداقتار مەن قارلى القاپتاردىڭ ەرۋى, ولاردىڭ قالپىنا كەلۋ الەۋەتىنىڭ تومەندەۋى جانە سونىڭ سالدارىنان قىرعىزستانداعى سۋ رەسۋرستارىنىڭ ازايۋى ەلىمىزگە عانا ەمەس, بۇكىل ورتالىق ازياعا دا تيگىزەر اسەرى اۋقىمدى بولماق. ەكولوگيالىق, ازىق-ت ۇلىك, ەنەرگەتيكالىق, الەۋمەتتىك-ەكونوميكالىق دامۋ سالالارىنا زاردابىن تيگىزەدى. جىل سايىن تۇرعىندار مەن ەكونوميكاعا ايتارلىقتاي زيان كەلتىرەتىن سەل تاسقىندارىنىڭ كوبەيۋى دە مۇزداقتاردىڭ قارقىندى ەرۋىنىڭ سالدارى. ۋران قالدىقتارىن كومۋ ورىندارىنداعى سەل تاسقىنى رەسپۋبليكالىق جانە ايماقتىق اۋقىمدا ەكولوگيالىق اپات قاۋپىن ارتتىرادى. سوندىقتان تاۋەلسىزدىك العالى بەرى مۇزداقتار مەن بيوارتۇرلىلىكتى ساقتاۋ, تاۋلاردىڭ تۇراقتى دامۋى جانە تاۋ ەكوجۇيەلەرىن قورعاۋمەن تىعىز بايلانىستى ءارتۇرلى ەكولوگيالىق باستامالاردى بەلسەندى تۇردە ىلگەرىلەتىپ كەلەمىز.
– قازىرگى تاڭدا قازاقستان مەن قىرعىزستان اراسىنداعى ساۋدا-ەكونوميكالىق قارىم-قاتىناس قانداي دەڭگەيدە؟ بولاشاقتا تاۋار اينالىمىن قانشالىقتى ارتتىرا الامىز؟
– وتكەن جىلى قىرعىزستان مەن قازاقستان اراسىنداعى تاۋار اينالىمى 35 پايىزعا ءوسىپ, ءبىر ملرد دوللاردان استى. 2022 جىلدىڭ ءبىرىنشى جارتىجىلدىعىندا ءوزارا ساۋدانىڭ ءوسىمى 24 پايىزدى قۇرادى. ەندى بۇل كورسەتكىشتى ەكى ميلليارد دوللارعا جەتكىزۋ مىندەتى تۇر. كەلەشەكتە مەملەكەتتەر باسشىلارىنىڭ بۇل تاپسىرماسىن ورىندايمىز دەپ ويلايمىن. بۇعان مۇمكىندىكتەر بار. ىنتىماقتاستىقتىڭ پەرسپەكتيۆالى باعىتتارى ساۋدا, گيدروەنەرگەتيكا, تۋريزم, تىكەلەي ىسكەرلىك بايلانىستاردى كەڭەيتۋ, قولدانىستاعى ترانزيتتىك جانە كولىك كوممۋنيكاتسيالارىن ءتيىمدى پايدالانۋ, اۋىل شارۋاشىلىعى ونىمدەرىن قايتا وڭدەۋ سالالارىن قامتيدى.
ءوزارا تاۋار اينالىمىنىڭ وسۋىنە ىقپال ەتەتىن فاكتورلاردىڭ ءبىرى – قىرعىز-قازاق شەكاراسىندا ونەركاسىپتىك ساۋدا-لوگيستيكالىق كەشەننىڭ قالىپتاسۋى. قازاقستان پرەزيدەنتى قاسىم-جومارت توقاەۆتىڭ قىرعىزستانعا رەسمي ساپارى بارىسىندا ءتيىستى مەموراندۋمعا قول قويىلدى. ونىڭ نەگىزىندە كيىم-كەشەك, فارماتسەۆتيكا, اۋىل شارۋاشىلىعى ونىمدەرىن قايتا وڭدەۋ سالالارىندا جوبالاردى جۇزەگە اسىرۋ جوسپارلانىپ وتىر.
– ءسىز بىرنەشە جىل قازاقستاندا ەلشى بولدىڭىز. ەكى ەل اراسىنداعى مادەني بايلانىستار تۋرالى بىرەر ءسوز ايتىپ وتسەڭىز.
– مادەني-گۋمانيتارلىق ىنتىماقتاستىعىمىز وتە جوعارى دەڭگەيدە. ەكى ەلدىڭ زيالى قاۋىمى مەن جۇرتشىلىعىنىڭ قاتىسۋىمەن ءتۇرلى كونتسەرت, پوەزيا كەشى, كورمە, دوڭگەلەك ۇستەل, سەمينار جۇيەلى تۇردە وتكىزىلىپ تۇرادى. ولار بۇقارالىق اقپارات قۇرالدارىندا كەڭىنەن جاريالاندى. بۇل رەتتە ەكى ەلدىڭ عالىمدارى مەن ساياساتكەرلەرىنىڭ كەزدەسۋلەرى بىشكەك پەن استانادا مەزگىل-مەزگىل ءوتىپ تۇرادى. ماسەلەن, وتكەن جىلى قىرعىزستاندا قازاقستاننىڭ مادەنيەت كۇندەرى ءوتىپ, ونىڭ اشىلۋ سالتاناتىنا قىرعىزستان پرەزيدەنتى س.جاپاروۆ قاتىستى.
بيىلعى مامىر ايىندا بىشكەك قالاسىندا قىرعىزستان مەن قازاقستان باسشىلارىنىڭ قاتىسۋىمەن اباي قۇنانباي ۇلى ەسكەرتكىشى مەن ءال-فارابي اتىنداعى قازاق ۇلتتىق ۋنيۆەرسيتەتىنىڭ فيليالى اشىلدى. وتكەن جىلى قازاق جازۋشىسى بايانعالي ءالىمجانوۆتىڭ قازاق تىلىندەگى «ماناس», «سەمەتەي», «سەيتەك» كىتاپتارىنىڭ تۇساۋىن كەستى. 2020 جىلى «ماناس» ەپوپەياسىن «ماناس – قىرعىز حالقىنىڭ ەپوسى» اتتى كىتاپ رەتىندە قازاق تىلىندە باسىپ شىعاردى. وسىلايشا, 60 جىلدان كەيىن جارىق كورگەن ەكىنشى باسىلىم اتاندى.
«ماناس» ەپوسىن دامىتۋ مەن ناسيحاتتاۋعا قوسقان وراسان زور ۇلەسى ءۇشىن قازاق اقىنى بايانعالي ءالىمجانوۆ «دوستىق» وردەنىمەن ماراپاتتالدى. جوعارى ماراپاتتى س.جاپاروۆ 2021 جىلدىڭ ناۋرىز ايىندا استاناعا مەملەكەتتىك ساپارى كەزىندە ءوزى تاپسىردى. بيىل ءبىز قىرعىزستاننىڭ قازاقستانداعى مادەنيەت كۇندەرىن ابىرويمەن وتكىزدىك. سونداي-اق الداعى ۋاقىتتا استانادا قىرعىز ەپوسىنىڭ قاھارمانى ماناس پەن قىرعىزدىڭ ۇلى جازۋشىسى شىڭعىس ايتماتوۆقا ەسكەرتكىش ورناتۋدى جوسپارلاپ وتىرمىز. جالپى العاندا, ەلدەرىمىزدىڭ مادەني-گۋمانيتارلىق سالاداعى قارىم-قاتىناسى جان-جاقتىلىعىمەن ەرەكشەلەنەدى.
– كەيىنگى جىلدارى تۇركى الەمى اراسىنداعى قارىم-قاتىناس جاڭا دەڭگەيگە كوتەرىلدى. تۇركى مەملەكەتتەرى ۇيىمى قۇرىلدى. وسى ورايدا تۇركىتىلدەس ەلدەردىڭ ىنتىماقتاستىعىن قالاي باعالايسىز؟
– ءبىز تۇركىتىلدەس ەلدەر اراسىنداعى ىنتىماقتاستىقتى جوعارى باعالايمىز. ويتكەنى تۇركى حالىقتارىن ورتاق تاريح, مادەنيەت جانە ءتىل بىرىكتىرەدى. ۇيىم قۇرىلعان ساتتەن باستاپ تۇركىتىلدەس مەملەكەتتەردىڭ ىنتىماقتاستىعىن كەڭەيتۋ جانە دامىتۋ بويىنشا ەلەۋلى, جەمىستى جۇمىستار اتقارىلدى. بۇگىنگە دەيىن توعىز سامميت ءوتتى. وندا ءوزارا قىزىعۋشىلىق تۋدىراتىن بارلىق سالاداعى ىنتىماقتاستىقتىڭ وزەكتى ماسەلەلەرى قارالدى.
ماسەلەن, «تۇركى الەمىنىڭ كوزقاراسى-2040» باعدارلاماسىن قابىلداۋىمىز – ۇلكەن بەلەس, تۇركى ىنتىماقتاستىعىنىڭ جاڭا پاراعى. قۇجاتتا ساياسي, ەكونوميكالىق جانە الەۋمەتتىك-مادەني ينتەگراتسيا جونىندەگى ءىس-شارالاردى قامتيتىن ۇزاقمەرزىمدى پەرسپەكتيۆالار بەلگىلەنگەن. قۇجاتتى كەزەڭ-كەزەڭىمەن جۇزەگە اسىرۋ ماقساتىندا قازىرگى ۋاقىتتا تاراپتار «2022-2026 جىلدارعا ارنالعان تۇركى مەملەكەتتەرى ۇيىمى ستراتەگياسى» جوباسىن كەلىسىپ جاتىر. قۇجات ۇيىمنىڭ ودان ءارى دامۋىنا جول اشادى. جوعارىدا ايتىلعانداردى قورىتىندىلاي كەلە, تۇركى باۋىرلارىمىزبەن ورتاق قۇندىلىقتار نەگىزىندە جەمىستى جۇمىس ىستەۋگە دايىنبىز. بۇكىل قيىندىقتى جەڭىپ, جاقسى الەم قۇرۋعا ۇلەس قوسامىز دەپ سەنەمىز.
– اڭگىمەڭىزگە راحمەت.
اڭگىمەلەسكەن
اباي اسانكەلدى ۇلى,
«Egemen Qazaqstan»
