1983 جىلى بۇل ءان ورىس توپىراعىندا شىرقالدى. اللا پۋگاچەۆانىڭ ورىنداۋىندا. ءبىز, ءسوز جوق, وسى ەلدىڭ تۋىندىسى ەكەن دەپ كەلدىك. بىراق عالامتورداعى دەرەككوزدەردە ءاندى 1969 جىلى يراندىق تانىمال ءانشى گۋگۋش شىرقاعانى تۋرالى ۆيدەو بەرتىندە جارق ەتە قالدى. ىلە-شالا ورىس جۋرناليستەرى زەرتتەۋ جۇرگىزىپ, ونى جوققا شىعاردى. الايدا گۋگۋشتىڭ ەكراندا سول 1969 جىلى ءاندى شىرقاپ تۇرعانىن ەشكىم جوققا شىعارا المايدى. ورىستاردىڭ ايتۋىنشا, بلوگەرلەر گۋگۋشتىڭ ەكرانداعى بەينەسىن عانا قالدىرعان دا, ونىڭ پۋگاچەۆادان كەيىن شىرقاعان داۋىسىن فون رەتىندە جاماي سالعان. ياعني بۇرىنعى بەينەدەگى داۋىستى جويىپ, ءانشىنىڭ كەيىننەن ورىنداعان ء«زاپيسىن» كىرىكتىرىپ قويعان. ارينە, بۇعان باس قاتىرعىمىز كەلمەيدى. سەبەبى تۋىندى الەمنىڭ بىرنەشە تىلىندە شىرقالىپ, عالامعا تارالىپ كەتكەن. ءتىپتى جاپون, كورەي حالىقتارى دا ءوز تىلدەرىندە شىرقاعانىن بىلەمىز. قازاق توپىراعىندا اتالعان ءاننىڭ ءسوزىن اقىن باۋىرجان القوجا ءتارجىمالاپ, روزا القوجانىڭ ورىنداۋىندا جەتتى تىڭدارمانعا. اتى ءماشھۇر ءان الەمگە جايىلىپ, جاھان انشىلەرىنىڭ ورىنداۋىندا قالاي كەرەمەت شىرقالسا, تۋىندىنىڭ تۋىنا نەگىز بولعان تۇلعانىڭ تاعدىرى دا سونداي اياۋلى, ايانىشتى ءارى داڭقتى دەر ەدىك. انشىگە ەسسىز عاشىق بولىپ, جولىنا ميلليونداعان راۋشان گۇل توسەۋشى كەيىپكەر – گرۋزيننىڭ ۇلى سۋرەتشىسى نيكولا پيروسماني ەكەنىن بىرەۋ بىلسە, بىرەۋ بىلمەۋى مۇمكىن. ول جايىندا قالامگەر تالعات باتىرحاننىڭ ء«پارۋانا پيروسماني» دەگەن ەسسەسىندە تاماشا جازىلعان:
«سول ون توعىزىنشى عاسىردىڭ اياق شەنىندە-اق ۇلكەن مادەنيەت ورتالىعىنا اينالىپ ۇلگەرگەن تيفليسكە گاسترولدىك ساپارمەن فرانتسۋز ءانشىسى مارگاريتا دە سەۆر كەلسە كەرەك. وسى كەزدە قالتاسىنا قارجى ءتۇسىپ, اجەپتاۋىر الدەنىپ قالعان نيكو (پيروسماني) دا ەلمەن بىرگە ەرەكشە كونتسەرتتى تاماشالاماي ما؟ ۇزىن ءسوزدىڭ قىسقاسى, ءانى مەن ءسانى كەلىسكەن الگى انشىگە تۇلا بويى تۇنعان رومانتيك قيالي جىگىت عاشىق بولىپ قالادى. ايداي سۇلۋ ارۋدى اسپاننان تۇسكەن پەرىشتەگە تەڭەيدى. ءپاريجدىڭ پاڭ قىزى بۇعان مويىن بۇرا قويمايدى. ماحاببات مۇڭى مازالاعان تيفليستىك مىرزا قايتكەندە قاراتۋ نيەتىمەن مارگو جاتقان مەيمانحانا الدىنا ەكى-ءۇش اربا گۇل اكەلەدى. كىمگە ارنالعانىن ءتامام ەل بىلەدى. ءبارى باس شايقاپ, تاڭداي قاعادى. شىنىمەن دە, مۇنداي مارتتىككە ەكىنىڭ ءبىرى بارا بەرمەيدى عوي. ابدەن ريزا بولعان اسەم بيكەش الگى جەردە جومارت جۇرەكتى جايساڭ گۇرجىنىڭ ەرنىنەن ءسۇيىپتى دەيدى.
ارادا ازعانتاي ۋاقىت وتكەندە گاسترولى اياقتالعان مارگو عايىپ بولادى. بار بايلىعىن ميلليون القىزىل راۋشانعا جۇمساعان نيكو تاقىر جەرگە وتىرادى. ءسويتىپ, باياعى كەدەيلىك كەپتى قايتا كيەدى. وتقا كۇيگەن جىندى كوبەلەكتەي وپىق جەگەن ءپارۋانا پيروسماني جانىن جارالاعان كۇيىكتىڭ كەسىرىنەن كۇندىز كۇلكىدەن, تۇندە ۇيقىدان ايىرىلادى. ەسەسىنە ەشقاشان ۇمىتىلمايتىن, ەرتەگىگە بەرگىسىز الدە وتىرىك, الدە راس اڭگىمە كەيىپكەرى بولىپ ەل ەسىندە قالدى.
تبيليسي تۇرعىندارى تاڭعا ايتىپ تاۋىسا المايتىن بۇل حيكايا 1931 جىلى ورىستىڭ اتاقتى جازۋشىسى كونستانتين پاۋستوۆسكيدىڭ قۇلاعىنا تيەدى. گرۋزيا استاناسىنا ات شالدىرعان قالامگەر جايعاسقان مەيمانحاناسىنىڭ قابىرعاسىن ايشىقتاعان پيروسماني سۋرەتتەرىن كوزىمەن كورگەنىن جازىپ, جوعارىداعى بايانسىز ماحاببات جايىندا جازادى. سەكسەنىنشى جىلدارى ارقالى اقىن اندرەي ۆوزنەسەنسكي مەن كورنەكتى كومپوزيتور رايموند پاۋلس «ميلليون الىح روز» دەگەن كەرەمەت ءان جازدى. ونى اتاعى جەر جارعان اللا پۋگاچەۆا ورىنداعاندا القالاعان الەۋمەت ادەمى اسەرگە بولەنەتىن.
ايتپاقشى, 1969 جىلى لۋۆردا ءپيروسمانيدىڭ شىعارمالارى قويىلعاندا مارگاريتا دە سەۆر كەلىپ ءوزىنىڭ پورترەتىن كورىپتى. سونداعى تۇسكەن فوتوسۋرەتى ساقتالعانىن ينتەرنەتتەن وقىپ بىلدىك. سىرلى اياقتىڭ سىرى كەتسە دە, سىنى كەتپەگەنىن كوردىك» دەيدى تالعات باتىرحان.
پيروسماني سۋرەتتەرىمەن جالپاق ەلدى تىرشىلىگىندە-اق مويىنداتىپ, كارتينالارى كورمەلەرگە قويىلىپ, ساتىلعانى تۋرالى دەرەكتەر از ەمەس. بىراق ەڭبەكتەرىنىڭ كوبىن اۆتور ارزىمايتىن تيىن-تەبەنگە ساۋدالاي بەرگەن كورىنەدى. جالعىز ءپيروسمانيدىڭ باسىنداعى عانا ەمەس, الەمدەگى نەبىر ۇلى سۋرەتكەرلەر كەشىرگەن تاعدىردىڭ ءبىر سيقى وسى. ونىڭ كۇللى شىعارماشىلىعىن ايتپاعاندا, ومىرىندەگى وسى وقيعانىڭ ءوزى ۇلى بولىپ قالۋىنا جەتەر ەدى (انگە ارقاۋ بولعانى). الايدا بويىندا سونداي ءبىر الاپاتى بولماسا الگىندەي مارتتىككە بارار ما ەدى؟ جانە ومىرىندەگى سول وقيعا عالامات انگە اينالىپ, سول ءان مىڭداعان تىڭدارماننىڭ جۇرەگىنە وشپەس ساۋلە ۇيالاتىپ جۇرگەنىنىڭ ءوزى ادام ايتىپ جەتكىزە المايتىن حيكمەت ەمەي نە؟! قۇددى پيروسماني سول گۇلدەردى قازىرگى ءبىزدىڭ جانە بىزدەن كەيىن كەلەتىن ۇرپاقتىڭ جۇرەگىنە ەگۋ ءۇشىن ساتىپ العانداي اسەر قالدىرادى.
