جەرىمىزدىڭ بۇگىنگى تۇتاستىعى كوڭىلگە دەمەۋ. بىراق «ەلىمىزدىڭ ىنتىماعى مەن بىرتۇتاستىعىنىڭ دەڭگەيى قانداي؟» دەگەن ساۋالعا شىنايى جاۋاپ بەرىلمەي كوڭىلدى سەمىرتۋ, ءوزىمىزدى ءوزىمىز الدارقاتۋ اداستىرادى. سونىمەن قاتار «قازاقستان ازاماتتارىنىڭ ورتاق مۇددەسى نە؟» دەگەن سۇراققا دا قوعام ىشىنەن جاۋاپ بەرىلۋگە ءتيىس. ال حالىقتىڭ ورتاق مۇددەسى ناقتىلانباي, ونىڭ اينالاسىنا جينالماي ەل بىرلىگى مىعىم دەپ ارقانى كەڭگە سالۋ ابەستىك بولار ەدى.
بۇگىندە قوعامىمىزدا حالقىمىزدىڭ مىزعىماس بىرلىگىنە كۇمانمەن قارايتىندار بارشىلىق. ولار ەل بىرلىگىنىڭ نىعايىپ كەلە جاتقانىن دالەلدەگىسى كەلىپ جانۇشىرىپ جۇرگەندەردىڭ سوزدەرىنە سەنبەيدى ءارى وعان كەكەسىنمەن قارايدى. دەمەك اتقارۋشى بيلىك «حالىق ۇنىنە قۇلاق اساتىن مەملەكەت» تۇجىرىمداماسىن باسشىلىققا الا وتىرىپ, ەل بىرلىگىنە تۇسكەن قانداي سىزاتتار بار ەكەنىن زەرتتەپ-زەردەلەپ, ودان قورىتىندى شىعارىپ, ەگەر قانداي دا ءبىر كىناراتتار تابىلىپ جاتسا, ولاردىڭ باستاۋىندا تۇرعان سەبەپتەردى انىقتاپ جانە ولاردى جويۋ كەرەك. ءبىز بۇل ءسوزدى تەكتەن-تەككە ايتىپ وتىرعانىمىز جوق. ويتكەنى ەل ىنتىماعىنىڭ بۇگىنگى دەڭگەيىنە قاتىستى ايتىلىپ جۇرگەن سىن-ەسكەرتپەلەر نەگىزسىز ەمەس. بۇعان قوعامىمىزدا كەزدەسىپ جاتاتىن ۇلتارالىق كەلىسپەۋشىلىك سىڭايىنداعى وقيعالاردى قوسا العاندا الەۋمەتتىك جەلىلەردەگى كوڭىل كۇيلەر اۋانى دالەل بولا الادى. وسى جەردە ايتا كەتەيىك, ۇلتارالىق كەلىسپەۋشىلىك, وكپە-رەنىش, داۋ-جانجال ىڭعايىنداعى وقيعالاردى «تۇرمىستىق كەلىسپەۋشىلىك, جانجال» دەپ, بىرلىگىمىزدىڭ مىقتىلىعىنا شاڭ جۋىتقىمىز كەلمەيدى. بۇل ولقىلىق ماسەلەنىڭ مانىسىنە تەرەڭنەن ۇڭىلۋگە مۇرشا بەرمەيدى. وسىلايشا, «جاۋىر جابا توقىلىپ» كەتە بارادى. بۇلاي جالعاسا بەرسە تۇبىندە بىرلىگىمىزدىڭ شىنايى دەڭگەيىمەن نە كورىنىسىمەن بەتپە-بەت كەلىپ, قۇتىمىز قاشىپ, ەسىمىزدى جيا الماي قالۋىمىز ابدەن مۇمكىن.
حاندىعىمىزدان ايىرىلىپ, ەل تىزگىنى وزگەنىڭ قولىنا تۇسكەن كەزدەن تاۋەلسىزدىگىمىزدى العانعا دەيىنگى ارالىقتا قازاقتى مەنسىنبەۋشىلىك, تومەن ساناۋشىلىق سياقتى جاعىمسىز ۇردىستەر بەلەڭ الدى. بىراق بۇل ءۇردىس تاۋەلسىزدىك العاننان كەيىن ءوز ء«جۇرىسىن» توقتاتۋى كەرەك ەدى, ولاي بولمادى. قايتا ۇدەپ بارادى.
مويىنداۋىمىز كەرەك, ءبىز تاۋەلسىزدىك العان العاشقى ساتتەردەگى قوعامىمىزدىڭ ىشكى قايشىلىقتارىنان ءالى كۇنگە اجىراعان جوقپىز. ناقتىلاي ايتقاندا, قازاق ۇلتىنىڭ اتىنىڭ وزۋىنا بۇكىل جان دۇنيەسىمەن قارسى شىققان, قازاق دەسە جۇرەگى قاتايىپ, قاقايىپ قالعان جەرلەستەرىمىزدىڭ سول كەزدەگى تۋدىرعان قوعامدىق كوڭىل كۇي اۋانى ءالى كۇنگە سەيىلمەي وتىر. دالىرەگى تاۋەلسىزدىك تاڭى اتقان تۇستاعى ساياسي-قوعامدىق اۋىر اتموسفەرانىڭ اۋىلىنان قارعا ادىم الىستامادىق. بەينە ءبىر ۋاقىت كوشىنەن ءتۇسىپ قالىپ, سول توقسانىنشى جىلداردا قالىپ قويعاندايمىز.
كەڭەستىك جۇيە ىدىراعان تۇستا ءوز وتانداستارىمىزدان قۇقايدىڭ نەشە اتاسىن كورگەنىمىز ەستەن شىعار ما؟ «ينتەرناتسيونالدىق مىندەت», «ۇلتارالىق تەڭ قاتىناس», «مىزعىماس دوستىق», «حالىقتار دوستىعى جاساسىن» دەگەن تىركەستەردى كۇن سايىن جاقتارى تالماي ايتاتىن كوپتەگەن ازامات قازاقستاننىڭ ەگەمەندىگى سىنعا ءتۇسىپ, اقىرىندا قۇداي بۇيىرتىپ تاۋەلسىزدىك تاڭى اتقاندا قاباقتارىن تارس جاۋىپ, سىرت اينالعاندارى, جاس تاۋەلسىز ەلدىڭ العاشقى قادامدارىنا كەدەرگى جاساپ باققانى ۇمىتقىڭ كەلسە دە ويدان كەتپەيدى. ءبىر وكىنىشتىسى سول, ولاردىڭ كوپشىلىگى جوعارى ءبىلىمدى, ءتۇرلى دەڭگەيدەگى باسشىلىقتاردا قىزمەت ەتىپ جۇرگەن ازاماتتار ەدى. وسىنداي كەرتارتپا كوزقاراستاعىلاردىڭ ىشكى پيعىلى – قازاقستاننىڭ دەربەس ەل بولماۋى. مىنە, وسىندايلار, قازاققا توبەدەن مەنسىنبەي قاراعىسى كەلەتىندەر لەگى قازىرگى تاڭدا دا ازايماي وتىرعانىن انىق سەزەسىڭ. مۇندايلاردى ءبىز وزىمىزگە قانشالىقتى تارتساق تا ولار ءوزىن قازاقستاننىڭ ءتول بالاسى دەپ ەسەپتەي المايدى. بۇرىنعى وتارشىلدىق كوزقاراستان اجىراماعان كەسىرلەر كەرۋەنى ءالى كۇنگە دەيىن ءوز كوشتەرىن تۇزەپ كەلە جاتقانى قىنجىلتادى. وتىز جىلدان استام ۋاقىت وتسە دە جات پيعىلدىلاردىڭ ءۇنى ءالى كۇنگە قاتتى شىعۋدا. بۇل ءبىزدى ۇلت رەتىندە ۇيىستىرا الماي وتىرعان ۇلتتىق يدەولوگيانىڭ جوقتىعىنىڭ ناقتى كورىنىسى. بۇل – ۇلكەن كىنارات. ونى جويماي, تاۋەلسىزدىگىمىزدى باياندى جولعا ءتۇسىرۋ قيىن.
