اقپارات جانە قوعامدىق دامۋ مينيسترلىگىنىڭ قولداۋىمەن قازاقستان قوعامدىق دامۋ ينستيتۋتى ۇيىمداستىرعان ءىس-شاراعا ورتالىق سايلاۋ كوميسسياسى توراعاسىنىڭ ورىنباسارى كونستانتين پەتروۆ, جەرگىلىكتى مەملەكەتتىك ورگانداردىڭ وكىلدەرى, ساياساتتانۋشىلار, بەلسەندى جاستار مەن ققدي ساراپشىلارى قاتىستى.
وتىرىسقا قاتىسقاندار ەل ومىرىندەگى ماڭىزدى ناۋقاننىڭ ساياسي ماڭىزىن تالداپ, الدا كەلە جاتقان سايلاۋ بارىسىندا اشىقتىق پەن زاڭدىلىقتى قامتاماسىز ەتۋ جولدارىن قاراستىردى. ونداعى يننوۆاتسيالار مەن وزگەرىستەردى تالقىلادى.
ورتالىق سايلاۋ كوميسسياسى توراعاسىنىڭ ورىنباسارى كونستانتين پەتروۆتىڭ ايتۋىنشا, كەزەكتەن تىس پرەزيدەنت سايلاۋىنا 12 ۇمىتكەر ۇسىنىلعان. قازىر سايلاۋالدى ۇگىت-ناسيحات كەزەڭى باستالدى. جالپى, كەزەكتەن تىس سايلاۋدى وتكىزۋدىڭ كەزەكتى سايلاۋدان ايىرماشىلىعى از. ياعني ەكى جاعدايدا دا سايلاۋعا دايىندالۋ جانە ونى وتكىزۋ ۇدەرىستەرى ءبىر ەرەجەگە نەگىزدەلەدى. تەك ۇمىتكەرلەردى ۇسىنۋ, ولاردى تىركەۋ مەرزىمىندە عانا ازداعان ايىرماشىلىق بار.
– كوپشىلىك اراسىندا ۇمىتكەرلەردى تەك ساياسي پارتيالار عانا ۇسىنا الادى دەگەن جاڭساق تۇسىنىك بار. ءتىپتى كەيبىر بۇقارالىق اقپارات قۇرالدارىنىڭ ءوزى كەيدە وسىنداي قاتەلىككە جول بەرىپ جاتادى. شىنتۋايتىنا كەلگەندە, پرەزيدەنت سايلاۋىنا رەسپۋبليكالىق قوعامدىق بىرلەستىكتەر دە ءوز كانديداتتارىن ۇسىنا الادى. ءبىز مۇنى ءىس جۇزىندە كورىپ وتىرمىز. مىسالى, قازىرگى مەملەكەت باسشىسىنىڭ كانديداتۋراسىن ءۇش پارتيادان بولەك, تاعى بىرنەشە قوعامدىق بىرلەستىك ۇسىنىپ وتىر. ايتا كەتەتىن تاعى ءبىر ماسەلە, 19 قاراشا تىنىشتىق كۇنى دەپ بەلگىلەندى. ياعني بۇل كۇنى ۇگىت-ناسيحات جۇمىستارىنىڭ ءبارى توقتاتىلادى. بۇرىن جاريالانعان ماتەريالدار سايتتاردا سول كۇيى تۇرا بەرەدى, بىراق ۇگىت-ناسيحات مازمۇنداس كونتەنت تىنىشتىق كۇنى باس بەتكە شىعىپ كەتپەۋى كەرەك, – دەدى ك.پەتروۆ.
جيىندا وبلىس اكىمى اپپاراتىنىڭ باسشىسى مۇرات ساندىباەۆ سايلاۋدى ۇيىمداستىرۋ جانە ونى ماتەريالدىق-تەحنيكالىق جاعىنان قامتاماسىز ەتۋ بارىسىندا اتقارىلعان جۇمىستاردى بايان ەتتى. ال جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى ءاليا مەكەباەۆا سايلاۋ ۋچاسكەلەرىنىڭ مۇمكىندىگى شەكتەۋلى سايلاۋشىلارمەن قالاي جۇمىس ىستەيتىنى تۋرالى ەسەپ بەردى.
ساراپشىلار وتىرىسىنان كەيىن ورتالىق سايلاۋ كوميسسياسى توراعاسىنىڭ ورىنباسارى جەرگىلىكتى سايلاۋ ۋچاسكەلەرىن ارالاپ, كوميسسيا وكىلدەرىنە ارنالعان سەمينار-ترەنينگتىڭ بارىسىمەن تانىستى.
قوستاناي وبلىسى
