جىرلار دا جۇلدىزدار سياقتى. جىرلار دا ادامدار سياقتى. جۇلدىزى جاندى دەيدى عوي كەيبىر تالانتتار جارقىراپ تانىلا باستاعاندا. دەمەك اركىم وزىنشە ءبىر جۇلدىز, جانۋ-جانباۋى وزىنە بايلانىستى. قازاق-قىرعىز دالاسىندا بايانعالي ءالىمجانوۆتىڭ جۇلدىزى جانعالى از ۋاقىت بولعان جوق. ەكىنشى شيرەك عاسىرعا جۋىقتاعان بولۋى كەرەك. بۇل كىسىنىڭ جۇلدىزىن جاققان – جىر, جىردان شىراق ۇستاعان اقىننىڭ شىعارمالارى ەندى الاش دالاسىن بىلاي قويىپ, الەم اسپانىنا بەت الدى. قازاق ولەڭىنىڭ مەرەيى مەن ءورىسى ءوستى دەڭىز. ءبىر توپ شىعارمالارى, اراسىندا ءارتۇرلى ولەڭدەرى بار, جيىرما تىلگە اۋدارىلىپ دالادان – قالاعا, وزەننەن – تەڭىز, مۇحيتقا, قۇرلىقتان قۇرلىققا وزىپ بارادى. جانە كىتاپتىڭ اتاۋى قانداي دەسەڭىزشى؟! «جەر ءيىسى» اتالىپتى. تاۋىپ قويعان! قازاق دالاسىنىڭ ءيىسى مەن رۋحى, كيەسى مەن جىرىنىڭ سارىنى ەۋرازيادان ەكىنشى ءبىر باسقا قۇرلىقتاردىڭ ءتىلى ارقىلى سول جاقتاردا وقىلادى دەگەن ءسوز. بايانعالي ءالىمجانوۆتىڭ شىعارماشىلىعى نەگىزىندە.
جىر دا جۇلدىزدار سياقتى. دىنىنە, تۇرىنە قاراماي, ونى بارلىق ادامزات بالاسى تانيدى, قابىلداي بەرەدى. جانىنا
جاقىن تۇتىپ ءوز تىلىندە وقىپ الا جونەلەدى. قاي ەلدىڭ بالاسى بولسىن جۇلدىزعا قاراپ ارزۋ ارمانىن ايتادى. جىر وقىپ, ءان تىڭداپ تەبىرەنەدى. ءالىمجانوۆتىڭ جىرلارى دا سولاي, الەمنىڭ جيىرما ءتىلى ارقىلى بىرنەشە جۇرتتىڭ اۋزىنا, ساناسىنا, ويىنا, رۋحىنا كوشەدى. وزگە دالالاردا دا بۇرشىك جارادى. جەتى تۇندە القارا كوككە ۇزاق تەلمىرسەڭىز, كەيبىر جۇلدىزدار جايىمەن اعىپ بارا جاتادى عوي. قازاق اسپانىن قالدىرىپ قايدا بارا جاتادى ولار؟ باسقا ەلدەردىڭ اسپانىندا دا جارقىراي بەرەدى. ءدال بايانعالي ءالىمجاننىڭ جىرلارىنداي!
جيىرما ءتىل دەگەندە, قىرعىز, وزبەك, ءتۇبى ءبىر تۇركى حالىقتارىنىڭ تىلىنە اۋدارىلعان شىعار دەرسىز. ولار دا بار. اعىلشىن تىلىنەن باستاپ, ورىس, يسپان, فرانتسۋز, قىتاي, اراب, تۇرىك, ازەربايجان, وزبەك, ماجار, قىرعىز, تۇرىكمەن, قاراقالپاق, تاتار, باشقۇرت, ۇيعىر, جاپون, موڭعول, ۋدمۋرت تاعى باسقا تىلدەرگە اۋدارىلعان ءار الۋان توپ-توپ جىرلار. ءبىر تىلدە جالعىز-جالعىز جىردان ەمەس, بىرنەشە ولەڭنەن. اراسىندا پوەمالارىنان ۇزىندىلەر بار.
جۇلدىزدار دا جىرلار سياقتى. ءار قىرىنان جارقىراپ, ءارتۇرلى ساۋلە تاراتادى. ءبىر ولەڭدى بۇگىن بىلاي تۇسىنسەڭ, ەرتەڭ ودان دا تەرەڭىرەك ۇعۋىڭ مۇمكىن. و, باستاپقىدا ءتىپتى تۇسىنبەۋىڭ دە مۇمكىن. ادام دا سول سياقتى كۇردەلى قۇبىلىس. اۆتور تەرەڭ ادام بولماسا, شىعارما دا ولاي بىرنەشە قىرىنان جارقىرامايدى. ءيىسى قازاق-قىرعىز بىلەتىن بايانعالي ءالىمجانوۆ اقىن عانا ما؟ جازۋشى, دراماتۋرگ, جىرشى-جىراۋلىعىمەن قوسا ماناسشىلىعى نەگە تۇرادى بۇل كىسىنىڭ؟! سەگىز قىرلى, ءبىر سىرلى دەمەي مە قازاق؟! تاپ سونداي. بۇل كىسىنىڭ بىرنەشە كينو تۇسىرۋگە ەڭبەك سىڭىرگەن رەجيسسەرلىگى ءوز الدىنا, ستسەناريىن جازعان. ادەبيەت جانە ونەر زەرتتەۋشىسى رەتىندە دە از ەڭبەك ەتىپ جۇرگەن جوق. الەم جۇرتشىلىعىن ابدىراتقان پاندەميا كەزىندە «پاندەميا» دەگەن پوەما جازىپ, ونىسى جيناق بولىپ شىققانىن دا جاقسى بىلەمىز. ول تۋىندىسى جيىرما تىلدە جارىق كورگەن «جەر ءيىسى» دەگەن وسى كىتابىنا دا ەنىپتى. جاھان تىلدەرىندە شىققان كىتاپتىڭ تاعى ءبىر ارتىقشىلىعى ونىڭ مۇقاباسىندا دا كورسەتىلگەن: «نەگىزىنەن, ءار تىلگە ءارتۇرلى شىعارمالار اۋدارىلعان. تاعى ءبىر ەرەكشەلىگى – الەم حالىقتارىنا, تۇگەل تۇركى ەلدەرىنە ارنالعان ولەڭدەرى دە بار. ادامزاتقا ءۇن قاتقان قازاق اقىنىنىڭ ىزگى جىرلارى دۇنيەگە قاناتىن كەڭ جايار دەپ ۇمىتتەنەمىز», دەلىنىپتى.
شىنىمەن-اق مۇندا «اعىلشىن اۋەندەرى», «امەريكا اۋەندەرى», «يسپان اۋەندەرى», «فرانتسۋز اۋەندەرى» سياقتى جىر شوعىرلارى سول حالىقتاردىڭ تىلدەرىندە تۇس-تۇستان مەنمۇندالايدى.
ولەڭ, جىر, پوەمالار جيناعى قاراعاندىداعى «گلاسسير» باسپاسىنان شىققانى كەشە عانا دەسە بولعانداي.
«البيوننىڭ ءتۇرىپ تاستاپ تۇمانىن, ايعا اتىلعان ارىستانداي اعىلشىن» دەپتى اقىن «اعىلشىن اۋەندەرىندە». البيوننىڭ تۇمانى تۇرىلگەندە اسپانىنان جۇلدىز كورىنبەۋى مۇمكىن بە؟ كىم بىلەدى, بايانعالي ءالىمجانوۆ سول تۇماندى جىرمەن تۇرەر. سوندا... جۇلدىزدار دا جىرلار سياقتى جارقىرايدى.
