الەم ەلدەرىندە «كورەيادا ءومىر ءسۇرۋ وتە ىڭعايلى» دەگەن پىكىر قالىپتاسقان. سەبەبى كورەيا رەسپۋبليكاسى ادام دامۋى يندەكسى بويىنشا دۇنيەجۇزى ەلدەرىنىڭ رەيتينگىندە 23-ورىندا تۇر. بۇل تىزىمدە كورەيلەر فرانتسيا مەن يتاليانى باسىپ وزسا, اقش پەن جاپونيادان ءسال عانا كەيىنگە قالعان. Numbeo سايتىنىڭ دەرەكتەرىنە سۇيەنسەك, كورەيا الەمدەگى ەڭ قاۋىپسىز 15 ەلدىڭ قاتارىنا كىرەدى. ال دەنساۋلىق ساقتاۋ دەڭگەيى بويىنشا تايۆاننان كەيىن ەكىنشى ورىندا كەلە جاتىر.
جارتى عاسىردا از عانا جۇرت بىلەتىن ەلدەن ازۋىن ايعا بىلەگەن الىپ مەملەكەتكە اينالعان كورەيا رەسپۋبليكاسى 60-جىلداردان باستاپ ءبىلىم مەن ءتۇرلى سالانى زەرتتەۋگە قوماقتى قارجى سالا باستاعان. سونىڭ ارقاسىندا ەلدە Samsung, Hyundai, LG سەكىلدى بۇكىل الەمدى ونىمدەرىمەن جاۋلاپ العان كورپوراتسيالار دۇنيەگە كەلدى, جاھان جۇرتىن تامساندىرعان ەڭ ۇزدىك مەديتسينالىق قىزمەت كورسەتۋ سالاسى مەن ءتۋريزمى قالىپتاستى.
ءبىر قىزىعى, كورەيانىڭ قارقىندى دامۋى باس قالاسى سەۋلدەن ەمەس, ءتۇپ تاريحى شاعىن عانا بالىقشى اۋىلىنان باستالاتىن پۋسان قالاسىنان باستاۋ الادى. 1950-جىلدارداعى قاتىگەز سوعىستى باسىنان وتكەرگەن كورەيا ءۇشىن بۇل قالانىڭ ماڭىزى بولەك, ءمانى ەرەك. ءۇش جىلعا سوزىلعان سوعىس كەزىندە ءار ەلدەن باس ساۋعالاپ كەلگەن ميلليونداعان بوسقىن ۋاقىتشا استانا پۋسانعا قاراي اعىلىپ, وسى قالانى پانا تۇتادى. كورەيلەردىڭ ءوزى بۇل تاريحي كەزەڭدى «ادامداردىڭ ءومىر سۇرۋگە دەگەن قۇشتارلىعى كورەي ەكونوميكاسىنىڭ دامۋىنا سەرپىن بەردى» دەپ سيپاتتايدى.
ماسەلەن, «LG تۇرمىستىق حيمياسى» – ەل دامۋىندا ماڭىزدى ءرول اتقارعان كومپانيالاردىڭ ءبىرى. كومپانيانىڭ العاشقى ءونىمى بەتكە ارنالعان ءتۇرلى جاقپا مايلار ەدى. قازىرگى تاڭدا LG – الەمدەگى ەڭ تانىمال برەندتەردىڭ ءبىرى. ال 1939 جىلى قۇرىلعان Samsung-ءتىڭ ەڭ العاشقى ساتقان تاۋارى كۇرىش ۇنى بولعان. بۇگىندە بۇل كومپانيا الەمدىك نارىقتا جوعارى تەحنولوگيالىق كومپونەنتتەردىڭ ءوندىرۋشىسى رەتىندە تانىمال. كورەيا جەرىندە دۇنيەگە كەلىپ, جاھان جۇرتىنا تانىلعان ءتۇرلى الەمدىك كومپانيالاردىڭ تاعدىرى مەن تاريحى پۋسان قالاسىمەن تىعىز بايلانىستى. ءبىر سوزبەن ايتقاندا, كورەي ەكونوميكاسىنىڭ دامۋى وسى بالىقشى اۋىلىنان باستاۋ الادى. بۇگىنگى پۋسان – پۋسان-ۋلسان-كەننام مەگا-سيتي. كورەي ونەركاسىبىنىڭ باستى سالالارىن دامىتۋدىڭ قوزعاۋشى كۇشىنە اينالعاندىقتان بولار, جەرگىلىكتى حالىق بۇل قالانى «پۋساننىڭ وزگەرۋى – بۇكىل ەلدىڭ وزگەرۋى» دەپ جوعارى باعالايدى.
ۇلى ترانسفورماتسيا
ءدال قازىرگى ۋاقىتتا پۋسان باسقا ترانسفورماتسياعا دايىندىق ۇستىندە. ول – 2030 جىلى وتەتىن دۇنيەجۇزىلىك ەكسپو كورمەسى. «الەمدى وزگەرتۋ – جارقىن بولاشاققا قادام». بۇل – دۇنيەجۇزىلىك كورمەگە ۇمىتكەر قالانىڭ باستى ۇرانى مەن نەگىزگى ۇستانىمى. پۋسان قالاسىنا ساپار بارىسىندا ۇيىمداستىرۋشىلار ءبىزدى بولاشاق ەكسپو وتەتىن قۇرىلىس الاڭىنا ارنايى الىپ باردى.
پۋسان قالاسىنداعى ەكسپو-2030 دۇنيەجۇزىلىك كورمەسىن ىلگەرىلەتۋ جانە قولداۋ شەڭبەرىندە ازاماتتىق ىستەر كوميتەتىنىڭ توراعاسى و سونگىن مىرزانىڭ ايتۋىنشا, ايتۋلى ءىس-شارانى ءدال وسى قالادا وتكىزۋ – جەرگىلىكتى حالىقتىڭ ارمانى. پۋساندىقتاردىڭ بۇل ارمانى 2019 جىلى مامىردا دۇنيەجۇزىلىك ەكسپو-2030 كورمەسىنە ءوتىنىم ۇلتتىق جوبا رەتىندە راستالىپ, قاراشا ايىندا پۋسانداعى دۇنيەجۇزىلىك ەكسپو-2030 كورمەسىنە وتىنىمدەردى جوسپارلاۋ باسقارماسى قۇرىلعاننان جۇزەگە اسىرىلا باستاعان.
كورەي حالقى پورتتى قالادا ەكسپو-2030 وتكىزۋ ارقىلى «الەمدەگى كورشىلەرمەن جاھاندىق قيىندىقتار مەن كەدەرگىلەردى جەڭۋ تاجىريبەمىزبەن بولىسەمىز», سونداي-اق «جارقىن بولاشاقتى بىرگە قۇرۋعا مۇمكىندىك الامىز», دەيدى. سوندىقتان دا بولار, پۋساندىقتار دۇنيەجۇزىلىك كورمەنى «كورەيانىڭ ۇلى ترانسفورماتسياسىنىڭ باستالۋى» دەپ قابىلدايدى.
ايتا كەتەيىك, ەكسپو-2030 كورمەسىن وتكىزۋگە وڭتۇستىك كورەيانىڭ پورتتى قالاسىنان بولەك تاعى ءۇش ەل – يتاليا, ۋكراينا جانە ساۋد ارابياسى ءوتىنىم بەرگەن. ناقتى شەشىم كەلەر جىلى قاراشادا حالىقارالىق كورمەلەر بيۋروسىنىڭ 173-باس اسسامبلەياسىندا داۋىس بەرۋ ارقىلى قابىلدانادى. قازىردىڭ وزىندە كورەي بيلىگى دۇنيەجۇزىلىك كورمە ەلگە 50 ميلليوننان استام ءتۋريستى تارتىپ, جارتى ميلليوننان استام جۇمىس ورنىن اشۋعا مۇمكىندىك بەرەدى دەپ وتىر. حالىقارالىق بيۋرو شەشىمى پۋساندى تاڭداماسا دا ەل شەنەۋنىكتەرى قالا جاعالاۋىن الداعى بەس جىلدا ادام تانىماستاي وزگەرتۋدى جوسپارلاپ قويعان. بۇل جاعالاۋدى قايتا قۇرۋ مەن قارقىندى قۇرىلىس جۇمىستارى تولىعىمەن جۇزەگە اسىرىلادى دەگەن ءسوز.
«ارينە, بۇل ۇلكەن باسەكەلەستىك. سول سەبەپتى دە ءبىزدىڭ ۇكىمەت قانا ەمەس, سونىمەن قاتار جەكە كاسىپورىندار, قوعامدىق ۇيىمدار الداعى دۇنيەجۇزىلىك ەكسپو-2030 كورمەسىن دايىنداۋ جانە جارنامالاۋ پروتسەسىنە ءبىر كىسىدەي اتسالىسىپ كەلەدى. ەگەر پۋساندا ەكسپو كورمەسى وتكىزىلسە, بۇل تەك قالا ەمەس, جالپى ەل ءۇشىن دە وتە ماڭىزدى وقيعا بولارى ءسوزسىز. مەن ازاماتتىق ىستەر كوميتەتىنىڭ وكىلى رەتىندە جەكە جاۋاپكەرشىلىكتى سەزىنەمىن جانە وسى ءىس-شارانىڭ ماڭىزدىلىعىن تۇسىنەمىن. سوندىقتان 2015 جىلى قۇرىلعان ءبىزدىڭ كوميتەت 7 جىل بويى پۋسان ازاماتتارىنىڭ يگىلىگى ءۇشىن جۇمىس ىستەپ كەلەدى. كوميتەت پۋسانداعى ەكسپو-2030 كورمەسىن اقپاراتتىق قولداۋ جانە ىلگەرىلەتۋ ءۇشىن بارلىق قاجەتتى جاعداي جاساۋعا ەرەكشە كۇش سالىپ كەلەدى», دەيدى و سونگىن مىرزا.
كوميتەت توراعاسى ءبىزدىڭ «ەكسپو-2030 پۋسان قالاسى ءۇشىن قانداي ءرول اتقارادى؟» دەگەن سۇراعىمىزعا «حالىقارالىق كورمەنى وتكىزۋ قالانىڭ دامۋىنا ەلەۋلى وزگەرىستەر اكەلەدى» دەپ سەنىممەن جاۋاپ بەردى. «بىرىنشىدەن, تۋريستەر اعىنى ارتادى. سەبەبى ەكسپو – دۇنيەجۇزىلىك اۋقىمداعى وقيعا, ياعني كوپتەگەن شەت مەملەكەت وكىلدەرى پۋسانعا كەلەدى. ەگەر كورمەنى وتكىزۋ تۋرالى شەشىم وڭ ناتيجە بەرسە, جەرگىلىكتى حالىقپەن بىرگە شەتەلدىك تۋريستەرگە ىڭعايلى بولۋى ءۇشىن پۋسان قالاسىنىڭ جانە جاقىن ماڭداعى قالالاردىڭ ينفراقۇرىلىمىن جاقسارتۋ ءۇشىن الدىن الا جۇمىس جۇرگىزىلەدى. سونداي-اق پۋسان تۇرعىندارى وسى كورمەنىڭ ارقاسىندا ءارتۇرلى مادەنيەتپەن تانىسۋعا مۇمكىندىك الادى. مىسالى, ەگەر كورمەگە قازاقستان وكىلدەرى كەلسە, ءبىزدىڭ تۇرعىندار ءسىزدىڭ كەرەمەت ەلىڭىز تۋرالى كوبىرەك بىلە الادى», دەيدى ول.
جاھاندىق ماسەلە – تەحنولوگيالىق شەشىم
كورەيا دۇنيەجۇزىلىك ەكسپو كورمەسىنىڭ كەلەسى ورنى رەتىندە تىنىق مۇحيتقا قارايتىن پورتتى قالاسىن بەكەردەن-بەكەر ۇسىنىپ وتىرعان جوق. ويتكەنى پۋسان – كورەيا « ۇلى ترانسفورماتسياسىنىڭ» وتكەنى, قازىرى جانە بولاشاعى. ال ءوز كەزەگىندە پۋسان ەكسپو وتكىزۋ ارقىلى الەمگە تەحنولوگيانىڭ دامۋى, كليماتتىڭ وزگەرۋى جانە ءالى دە سالدارى تولىعىمەن جويىلا قويماعان COVID-19 پاندەمياسى كەزىندە تەپە-تەڭدىكتى ساقتاۋعا كومەكتەسەتىن تەحنولوگيالارعا نازار اۋدارۋعا ۋادە بەرىپ وتىر.
ء«سوز جوق, تىڭ تەحنولوگيا مەن دامىعان ەكونوميكا – جاقسى ءارى باقىتتى ومىرگە اپاراتىن بىردەن-ءبىر جول. الايدا ادامزات كليماتتىق داعدارىستىڭ, پاندەميا مەن تسيفرلىق الشاقتىقتىڭ بۇرىن-سوڭدى بولماعان جاھاندىق پروبلەمالارىنا تاپ بولىپ وتىر. ال بۇل جاھاندىق ماسەلەلەردى شەشۋ ءۇشىن تۇبەگەيلى جانە ناقتى وزگەرىستەر قاجەت». بۇل – قازاقستاندىق جۋرناليستەرگە «پۋسان ەكسپو-2030» تانىستىرىلىمىن وتكىزگەن ەكسپو-2030 دۇنيەجۇزىلىك كورمەسىن ىلگەرىلەتۋ جانە قولداۋ شەڭبەرىندە ازاماتتىق ىستەر كوميتەتىنىڭ سىرتقى بايلانىستار جانە ىنتىماقتاستىق ىستەرى ءبولىمىنىڭ مەڭگەرۋشىسى حۆان حيونگي مىرزانىڭ ءسوزى.
حۆان حيونگي مىرزانىڭ ايتۋىنشا, پۋسانداعى دۇنيەجۇزىلىك ەكسپو-2030 كورمەسى بارلىق قاتىسۋشىعا جاھاندىق ماسەلەلەردى تەرەڭىنەن تۇسىنۋگە مۇمكىندىك بەرەدى. ەڭ باستىسى – ماڭىزى مەن ءمانى بولەك بۇل اۋقىمدى ءىس-شارا بارشامىزعا قورشاعان ورتا مەن ادامزاتتىڭ جاڭا ءومىر سالتى تۋرالى ويلاۋعا جول اشادى.
كليماتتىڭ وزگەرۋى, ساندىق تۇرلەندىرۋدىڭ كەمشىلىكتەرى, ۇلتتار اراسىنداعى جانە ولاردىڭ ىشىندەگى تەڭسىزدىك – مىنە, پۋسان اسا ءمان بەرىپ وتىرعان ءۇش جاھاندىق ماسەلە وسىلار. پۋسان كوميتەتىنىڭ وتىنىمىندە وسى سۇراقتارعا قاتىستى ىشكى تاقىرىپتار دا قاراستىرىلعان. ال ءاربىر تاقىرىپ بۇۇ تۇراقتى دامۋ ماقساتتارىنىڭ ءۇش نەگىزگى تىرەگىمەن بايلانىستى, ولار – ادامدار, پلانەتا جانە وركەندەۋ.
ەگەر پۋساننىڭ دۇنيەجۇزىلىك كورمەگە ءوتىنىمى ءساتتى شەشىلسە, كورەيلەر جاساندى ينتەللەكت (AI), 6G, اقىلدى اۋەجايلار جانە تەڭىز پورتتارى سياقتى بولاشاقتىڭ جاڭا تەحنولوگيالارىنا باسا نازار اۋداراتىن كورمەلەردى ۇسىنباق. «ال بۇل تىڭ تەحنولوگيالار ەكونوميكا, قوعام مەن مادەنيەتتىڭ بارلىق سالاسىندا سەرپىلىس جاساۋعا جاڭا مۇمكىندىك تۋعىزادى», دەيدى كوميتەت وكىلى.
الەمدى وزگەرتۋدى كوزدەپ وتىرعان كورەيا ەكسپو-2030 وتكىزۋ كەزىندە پۋساننىڭ نەگىزگى جۇك پورتتارىنىڭ ءبىرىن تولىعىمەن زاماناۋي قالاشىققا اينالدىرۋدى كوزدەپ وتىر. ماسەلەن, جولاۋشىلار تەرمينالى عيماراتىندا ءتۇرلى كونفەرەنتسيا مەن پرەزەنتاتسيا وتەدى. پورتتا كەڭسەلەر ءۇشىن قوسىمشا پاۆيلوندار, بىرنەشە تۇرعىن ءۇي كەشەنى جانە سەرۋەندەۋگە ارنالعان ساياباق, مادەني وشاقتار سالۋ جوسپارلانۋدا. العاشقى نىسانداردىڭ قۇرىلىسى قازىردىڭ وزىندە قارقىندى ءجۇرىپ جاتىر. بۇعان ءبىز ەسكى پورتتىڭ بىرىنە بارعاندا ءوزىمىز دە كوز جەتكىزدىك. ەڭ باستىسى, كورمە پاۆيلوندارى مەن باسقا دا ىلەسپە عيماراتتاردىڭ قۇرىلىسى ەسكى پورتتىڭ ورنىندا جۇرگىزىلەدى. وسىلايشا, كورەيلەر كورمە اياقتالعاننان كەيىن قالا تۇرعىندارىنا جاڭا عيماراتتار, ساياباقتار, ءتۇرلى نىساندارى بار اۋداندى تولىق پايدالانۋعا ۇسىنۋدى ماقسات تۇتقان. شەنەۋنىكتەردىڭ ايتۋىنشا, دۇنيەجۇزىلىك كورمە ءۇشىن قايتا جاڭارتىلاتىن زاماناۋي قالاشىقتىڭ جوباسى تولىعىمەن دايىن. بۇل جايىندا و سونگىن مىرزا: «پۋساندا ەكسپو-2030 وتكىزۋ – وزگەرىستەرگە جاسالعان ماڭىزدى قادام. بۇل – حالىقارالىق تاجىريبە الماسىپ قانا قويماي, بولاشاق ۇرپاعىمىزعا قالدىرار جولداۋىمىز. ءبىزدىڭ جاستارىمىز, بولاشاق ۇرپاعىمىز جاڭا ءبىلىم الادى, كليماتتىق داعدارىس, تەڭسىزدىك جانە قوعامنىڭ ستراتيفيكاتسياسى سياقتى جاھاندىق ماسەلەلەر تۋرالى ويلايدى. ەكسپو-2030 پۋساندا وتەدى دەپ ۇمىتتەنەمىن, ءبىز ءوز تاراپىمىزدان قولدان كەلگەننىڭ ءبارىن جاساۋعا تىرىسامىز», دەدى.
سۇحبات كەزىندە و سونگىن مىرزا قازاقستان تۋرالى ويىمەن دە ءبولىستى. «سىزدەردىڭ ەلدەرىڭىز تۋرالى, وكىنىشكە قاراي, از بىلەمىن. قازاقستان مەن كورەيا جىلدار بويى بەرىك دوستىق بايلانىستى ۇستانىپ كەلەدى. قازاقستاندا كوپتەگەن كورەيالىق ءىرى كاسىپورىن مەن كاسىپكەر تابىستى جۇمىس ىستەۋدە. مەن, سونداي-اق, استانا قالاسىندا وتكەن ەكسپو-2017 حالىقارالىق كورمەسىنە قاتىستىم. مەنى كورمەنىڭ اۋقىمى مەن سۇلۋلىعى تاڭعالدىردى. قازاقستان – پايدالى قازبالار مەن تابيعي رەسۋرستارعا باي وتە ادەمى ەل», دەدى ول.
پورتتى قالا پۋسان
پۋسان – كورەيانىڭ وڭتۇستىگىندە جاتقان ەڭ تانىمال شاھار. تاريحي جولى التى عاسىردان اسىپ تۇسەتىن قالا حالقىنىڭ سانى 3 جارىم ميلليونعا جۋىق. كولەمى جاعىنان كورەيا رەسپۋبليكاسىنىڭ باس قالاسى – سەۋلدەن كەيىنگى ەكىنشى قالانىڭ جەرگىلىكتى تەڭىز ايلاعى الەمدەگى ەڭ ۇلكەن بەس پورتتىڭ قاتارىنا كىرەدى. پۋسان 7 جاعاجايى, 7 اسپالى كوپىرى جانە 10 تاۋىمەن تانىمال. پورتتى پۋسانعا بارعاندا قازاقستاننىڭ باس كونسۋلدىعىنا ارنايى ات باسىن تىرەدىك.
ەستەرىڭىزدە بولسا, مەملەكەت باسشىسى قاسىم-جومارت توقاەۆ وتكەن جىلى 16-17 تامىزدا كورەيا رەسپۋبليكاسىنا مەملەكەتتىك ساپارمەن باردى. وسى ساپار اياسىندا ەكىجاقتى ىنتىماقتاستىقتى جانداندىرۋ ماقساتىندا پۋساندا قازاقستاننىڭ باس كونسۋلدىعىن اشۋ تۋرالى شەشىم قابىلداندى. پرەزيدەنت بۇل شەشىمىن ء«بىزدىڭ ستراتەگيالىق سەرىكتەستىگىمىزدى نىعايتۋعا جاڭا مۇمكىندىكتەر اشادى» دەپ ايقىنداپ بەرگەن ەدى.
«باس كونسۋلدىق رەسمي تۇردە وتكەن جىلى مامىر ايىندا اشىلعاندىقتان, جۇمىستى ەندى عانا باستاپ جاتىرمىز», دەيدى ەلدەن كەلگەن جۋرناليستەردى جىلى قارسى العان پۋسانداعى قازاقستاننىڭ باس كونسۋلى ايان قاشاباەۆ.
باس كونسۋلدىڭ ايتۋىنشا, كورەيادا 30 مىڭداي قازاقستاندىق تۇرسا, ونىڭ 200-دەن استامى وسى قالادا ءومىر ءسۇرىپ جاتىر ەكەن. ولاردى ءۇش كاتەگورياعا ءبولىپ قاراستىرۋعا بولادى. العاشقىلارى – تاريحي وتانىنا ورالعان ەتنوستىق كورەيلەر. ولاردىڭ اراسىندا ارالاس نەكەدەگى وتباسىلار كوپ. ەكىنشىلەرى – كورەيادا ءبىلىم الىپ جاتقان ستۋدەنتتەر. ماسەلەن, ءبىر عانا پۋسان قالاسىندا 100-گە جۋىق قازاقستاندىق ستۋدەنت بولسا, ولاردىڭ باسىم بولىگى پۋسان ۇلتتىق ۋنيۆەرسيتەتىندە ءبىلىم الىپ جاتىر ەكەن. ال ءۇشىنشى كاتەگوريا – كورەياداعى ءتۇرلى ءىرىلى-ۇساقتى كومپانيادا كەلىسىمشارتپەن جۇمىس ىستەپ جۇرگەن قازاقستاندىقتار.
«كورەياداعى بىرنەشە جوعارى وقۋ ورنى مەن قازاقستان اراسىندا ستۋدەنتتەردى تەگىن گرانتپەن وقىتۋ جونىندە ارنايى كەلىسىمدەر بار. ءبىر ايتا كەتەرلىگى, قازاقستاندىق ستۋدەنتتەردىڭ كوبى مەحانيكا مەن ءىت سالاسىن تاڭداعان. جاستاردىڭ دەنى سەۋل قالاسىندا ءبىلىم الادى. ول تۇسىنىكتى دە. سەۋل بىرىنشىدەن ەل استاناسى بولعاندىقتان باس قالادا ەڭ ۇزدىك وقۋ وردالارى ورنالاسقان. كورەياداعى ۇزدىك ۇشتىككە كىرەتىن وقۋ وردالارى وسى قالادا», دەيدى ا.قاشاباەۆ.
باس كونسۋلدىقتىڭ ءدال پۋسان قالاسىندا اشىلۋىنىڭ دا وزىندىك سەبەپتەرى بار. «قالا ەلدىڭ وڭتۇستىگىندە, ال سەۋل سولتۇستىك بولىگىندە ورنالاسقان. بۇرىن ايماقتا تۇراتىن, ءبىلىم الىپ جاتقان قازاقستاندىقتار قانداي دا ءبىر كومەك نە قۇجات كەرەك بولسا, 300 شاقىرىم جول ءجۇرىپ, سەۋلدەگى ەلشىلىككە بارىپ, ءارى-بەرى سارساڭعا تۇسەتىن. ال تولقۇجات جاساتۋ, احاج-دا قۇجاتتار راسىمدەۋ بويىنشا جۇگىنەتىندەر پۋساندا دا وتە كوپ. وزدەرىڭىزگە بەلگىلى, كورەيادا مەديتسينا ءتۋريزمى وتە جاقسى دامىعان. مۇندا دەنساۋلىعىن جاقسارتۋعا, ەم الۋعا كەلەتىن قازاقستاندىقتار كوپ. بۇدان بىلاي قانداي دا ءبىر قۇجات الۋ ءۇشىن سەۋلگە بارۋدىڭ قاجەتى جوق, بارلىق مەملەكەتتىك قىزمەتتى ايماقتا تۇراتىن قازاقستان ازاماتتارى باس كونسۋلدىقتان راسىمدەي الادى», دەيدى باس كونسۋل. ال جەرگىلىكتى بيلىك جاڭا ديپلوماتيالىق وكىلدىك ارقىلى ەكى ەل اراسىنداعى ەكونوميكالىق جانە مادەني ىنتىماقتاستىقتى نىعايتۋدى كوزدەپ وتىر. ورايى كەلگەندە ايتا كەتەيىك, قازاقستان – پۋسان قالاسىندا باس كونسۋلدىق اشقان التىنشى مەملەكەت.
ءتۇيىن. بەس جىل سايىن وتەتىن دۇنيەجۇزىلىك كورمە بۇكىل الەمنىڭ نازارىن اۋداراتىن ماڭىزدى ءىس-شارا ەكەنى – جالپاق جۇرتقا بەلگىلى جايت. بۇل ءتورت جىل سايىن وتەتىن وليمپيادا ويىندارى مەن فۋتبولدان الەم چەمپيوناتىنان بولەك, بىرنەشە ءىرى الەمدىك وقيعانىڭ ءبىرى بولىپ سانالادى. ال مۇنداي جاھاندىق ءىس-شارالاردى ۇيىمداستىرىپ, وتكىزۋدە كورەيا رەسپۋبليكاسىنىڭ تاجىريبەسى از ەمەس. ەستەرىڭىزدە بولسا, كورەيلەر 2002 جىلى ازيا ويىندارى, 2005 جىلى اتەس ءسامميتى سياقتى ءىرى حالىقارالىق ءىس-شارالاردى ابىرويمەن الىپ شىقتى. ال پحەنچحان قالاسىندا 2018 جىلى قىسقى وليمپيا ويىندارىنىڭ الاۋى جاندى. پۋسان مەگاپوليسىن جەكە الىپ قارايتىن بولساق, الەمنىڭ ەڭ ءىرى پورتتى قالالارىنىڭ تىزىمىنەن ويىپ تۇرىپ ورىن الاتىن شاھاردىڭ دۇنيەجۇزىلىك ەكسپو-2030 كورمەسىن قابىلداۋعا ءۇش نەگىزگى باسىمدىعى بار. ءبىرىنشىسى – قالا جاقسى دامىعان, ەكىنشىسى – پۋساننىڭ ورنالاسقان جەرى وتە ىڭعايلى, ءۇشىنشىسى – شاھار حالىقارالىق ءىس-شارالار وتكىزۋدە ۇلكەن تاجىريبەگە يە. ال وسى جەتىستىك پەن ەل ەكونوميكاسى ءۇشىن ۇلكەن جەڭىسكە جەتەلەگەن باستامالاردىڭ نەگىزى تاڭعى شىڭ ەلى تالعامىنىڭ بيىكتىگىندە جاتسا كەرەك...
استانا – سەۋل – پۋسان – استانا
