«تۇرعىن ءۇي ماسەلەسى – جاس وتباسىلار مەن ماماندار ءۇشىن ەڭ ماڭىزدى ماسەلەنىڭ ءبىرى. سوندىقتان بۇگىن مەن جۇمىس ىستەيتىن جاستارعا جالعا بەرىلەتىن تۇرعىن ءۇي باعدارلاماسى تۋرالى ايتىپ وتكىم كەلەدى. بۇل باعدارلاما استانا, الماتى جانە شىمكەنت قالالارىندا جۇمىس ىستەيدى. ونىڭ ناقتى ماقساتى – بەلگىلى ءبىر مەرزىمگە جاس ماماندارعا قولجەتىمدى باسپانا بەرۋ, سونداي-اق ءوز ءۇيىن ساتىپ الۋ ءۇشىن باستاپقى جارناعا قاراجات جيناۋىنا ىقپال ەتۋ. اي سايىنعى جالداۋ اقىسى وتە قولجەتىمدى – 5000 تەڭگە مەن 15 000 تەڭگە ارالىعىندا بولدى. باعدارلاما 10 مىڭنان استام جاس قازاقستاندىقتى قامتىدى. باعدارلاما شارتتارى باستاپقىدا كەلىسىمشارت ارقىلى بەكىتىلىپ, كەزەڭدەر بويىنشا پارامەترلەر ناقتىلاندى», دەپ جازدى ا.بالاەۆا.
سونىڭ ىشىندە تۇرعىن ءۇي بەرۋ مەرزىمى وزگەردى. بۇل رەتتە نەگىزگى قاعيدات وزگەرىسسىز قالدى: ياعني, تۇرعىن ءۇي ساتىپ الۋ قۇقىعىنسىز جالعا بەرىلدى.
«بۇل رەتتە كەيبىر ازاماتتاردىڭ پاتەردى وزدەرىندە قالدىرۋعا نيەت بىلدىرگەنىن جاقسى تۇسىنەمىز. الايدا مەملەكەتتىك شەشىمدەر زاڭعا جانە بارلىعىنا بىردەي ەرەجەلەرگە نەگىزدەلۋى كەرەك. ەگەر كەلىسىمشارتتا, ەرەجەلەردە ساتىپ الۋ قاراستىرىلماعان بولسا, وندا ونى وزگەرتۋ – باسقا ازاماتتار مەن قاتىسۋشىلار ءۇشىن ادىلەتسىزدىك بولار ەدى. ەڭ ماڭىزدىسى, مەملەكەت جاستارعا ۇدايى قولداۋ كورسەتىپ كەلەدى. قوسىمشا جاڭا, تۇراقتى باعدارلامالار ۇسىنىلدى.ماسەلەن, «وتباسى بانكىمەن» بىرلەسىپ 17 وڭىردە جەڭىلدەتىلگەن يپوتەكالىق باعدارلامالار ىسكە قوسىلدى. سونىڭ اياسىندا 12 مىڭعا جۋىق جاس مامان جاڭا پاتەرگە يە بولدى. ونىڭ 1,6 مىڭنان استامى جالعا بەرىلەتىن تۇرعىن ءۇي باعدارلاماسىنىڭ قاتىسۋشىلارى», دەپ ناقتىلادى مينيستر.
سونداي-اق جاس ازاماتتار «وتاۋ» جانە «ناۋرىز», «ناۋرىز جۇمىسكەر» رەسپۋبليكالىق باعدارلامالارى ارقىلى باسپانالى بولدى. بۇگىنگى تاڭدا بارلىق ماقۇلدانعان وتىنىمدەردىڭ 62%-ى 35 جاسقا دەيىنگى ازاماتتارعا تيەسىلى.
«2026 جىلعى 9 قاڭتاردا قازاقستان رەسپۋبليكاسىنىڭ قۇرىلىس كودەكسىنە قول قويىلدى. وعان قوسا زاڭناماعا, سونىڭ ىشىندە جاستار ساياساتى بويىنشا جەكەلەگەن تەتىكتەردى رەتتەۋگە بايلانىستى نورمالارعا وزگەرىستەر ەنگىزىلدى.سوعان سايكەس, 2026 جىلعى 27 ناۋرىزداعى № 136-نق بۇيرىق نەگىزىندە «جۇمىس ىستەپ جۇرگەن جاستارعا ساتىپ الۋ قۇقىعىنسىز جالعا بەرىلەتىن تۇرعىنجاي بەرۋ قاعيدالارىن بەكىتۋ تۋرالى» بىرقاتار بۇيرىقتاردىڭ كۇشى جويىلىپ, جۇمىس ىستەيتىن جاستارعا ارنالعان جالعا بەرىلەتىن تۇرعىن ءۇي باعدارلاماسى توقتاتىلادى. بوساتىلاتىن تۇرعىن ءۇي قورىن ودان ءارى پايدالانۋ ماسەلەسى تۇرعىن ءۇي زاڭناماسىنا جانە بەلگىلەنگەن كەزەككە سايكەس شەشىلەتىن بولادى, بۇل جەرگىلىكتى اتقارۋشى قۇرىلىمداردىڭ قۇزىرەتىندە», دەپ ءتۇسىندىردى ول.
قازىرگى جالعا الۋشىلارعا كەلەتىن بولساق:
جالداۋ مەرزىمى اياقتالعاندار شارت تالاپتارى مەن بەكىتىلگەن ءتارتىپ شەڭبەرىندە ارەكەت ەتۋى كەرەك. جالداۋ مەرزىمى كەيىن اياقتالاتىندار كەلىسىمشارت اياقتالعانعا دەيىن پاتەردە تۇرا الادى.
مينيستر بارلىق سۇراقتار بويىنشا اكىمدىكتەر مەن «وتباسى بانكتەن» كەڭەس الۋعا بولاتىنىن ايتىپ ءوتتى. ماسەلەنى كەيىنگە قالدىرماي, يپوتەكالىق باعدارلامالارعا قاتىسۋ مۇمكىندىكتەرىن الدىن الا باعالاۋ ماڭىزدى.
