جۇلدىزدى بەلگىنى اشۋمەن قاتار, ەسكە الۋ كەشى كوپشىلىك نازارىنا ۇسىنىلدى. وندا كومپوزيتوردىڭ تۋىندىلارى دا ورىندالدى. قىزى ءلايلا ءسوز الىپ, قۇرمەت كىتابىنا اكەسىنىڭ ەسىمىن جازدى.
– ءار جاعدايدىڭ ءوز ورنى, ۋاقىتى بار. بۇگىنگى شارا سول ءوز ورنىندا, ءوز ۋاقىتىندا ىسكە اسىپ وتىرعانداي. 100 جىلعا جۋىق بۇرىن وسى توپىراقتا ۇلى كومپوزيتور, مەنىڭ اكەم سىدىق مۇحامەدجانوۆ دۇنيەگە كەلدى. قاراعاندى شاھارى – رۋحاني-مادەني ورتالىق. مەنىڭ اكەم ومىرگە كەلگەن وبلىس ورتالىعىندا تۇراتىن, وسى قالانى وركەندەتۋگە بار ۇلەسىن قوسىپ جۇرگەن جەرلەستەرىمە ريزامىن. بىرەر جىلدان كەيىن تۋعانىنا 100 جىل تولاتىن اكەمنىڭ اتاۋلى مەرەيتويى قارساڭىندا مىناداي يگى ءىستى جۇزەگە اسىرعان بارشاڭىزعا العىسىم شەكسىز, – دەدى قىزى ءلايلا سىدىققىزى.
ايتۋلى شاراعا ارنايى كەلگەن بەلگىلى وپەرا ءانشىسى كەنجەعالي مىرجىقباي كومپوزيتوردىڭ ءتول تۋىندىلارىن العاشقىلاردىڭ ءبىرى بولىپ ورىنداعانىن ەسكە الادى. سونداي-اق حاس تالانتتىڭ ەسكەرتكىشى قاراعاندىدا ورناتىلىپ, كونتسەرت زالىنا ەسىمى بەرىلسە دەيدى.
– 1981 جىلى عابيت مۇسىرەپوۆ ليبرەتتوسىن جازعان سىدىق مۇحامەدجانوۆتىڭ «اقان سەرى – اقتوقتى» وپەراسىنداعى باس كەيىپكەر پارتياسىنىڭ العاشقى ورىنداۋشىسىمىن. وراتورياسىن, «جۇمباق قىز» وپەراسىندا اداقتى, اباي ولەڭىنە جازعان تسيكلىن ورىندادىم. الدا كومپوزيتوردىڭ 100 جىلدىعى كۇتىپ تۇر. سوعان وراي قاراعاندىنىڭ ءبىر ايدىك عيماراتىنا, ول «شالقىما» كونتسەرت زالى ما, الدە باسقا ونەر وشاعى ما, ۇلكەن ورداعا ەسىمىن بەرىپ, تۋعان جەرى قاراعاندىنىڭ قاق تورىنەن ەڭسەلى ەسكەرتكىشىن ورناتۋ كەرەك. كومپوزيتور اتىندا رەسپۋبليكالىق انشىلەر بايقاۋىن ۇيىمداستىرۋ قاجەت دەپ بىلەمىن. تۇڭعىش «ايسۇلۋ» وپەراسى قاراعاندى اكادەميالىق مۋزىكالىق كومەديا تەاترى رەپەرتۋارىنا تۇراقتى بەكىتىلىپ, ساحناعا شىعىپ تۇرعانى ءجون. 100 جىلدىعىندا اس ءىشىپ, اياق بوساتۋمەن شەكتەلمەي, بارلىق شىعارمالارى رەسپۋبليكالىق دەڭگەيدە ناسيحاتتالىپ, ورىندالۋعا ءتيىس, – دەدى كەنجەعالي مىرجىقباي.
سىدىق مۇحامەدجانوۆ قاراعاندى وبلىسى, شەت اۋدانىنىڭ تۋماسى. قۇرمانعازى اتىنداعى الماتى مەملەكەتتىك كونسەرۆاتورياسىن پروفەسسور ە.برۋسيلوۆسكيدەن كومپوزيتسيا كلاسسى بويىنشا بىتىرگەن. كومپوزيتوردىڭ «ايسۇلۋ», «جۇمباق قىز», «اقان سەرى-اقتوقتى» وپەرالارى, «عاسىرلار ءۇنى», «شاتتىق مەكەنى» سيمفونيالارى, «دارحان دالا» سيمفونيالىق كۇيى, «دومبىراعا ارنالعان كونتسەرتتەر», «قوبىزعا ارنالعان كونتسەرتتەر» تۋىندىلارى, سكريپكا, قوبىز, دومبىراعا ارنالعان كونتسەرتتەرى قازاق مۋزىكاسىنداعى ءىرى قۇبىلىس دەپ باعالايدى ونەرتانۋشىلار.
ايتا كەتۋ كەرەك, 2024 جىلى كومپوزيتوردىڭ تۋعانىنا 100 جىل تولادى.
قاراعاندى وبلىسى
